Eskina Tampo

CEBU, Philippines - Bongga nga fireworks display, mahalon nga restaurant, outdoor view o bisan paman simpleng recreational view,  syempre dili mawala ang nagsidlak-sidlak nga diamante nga singsing o pamana ni lola ngadto sa lola sa imong mama. Mao kini ang mga naglakip sa usa ka bonggang wedding proposal ngadto sa dalaga nga gihigugma sa tiunay. Dalagitang dili kasarangan, sama sa perlas nga inampingan ug tinugyan lamang sa lalaki nga makahatag og kalipay sa hangtod sa hangtod.

Sa daling pagdagan sa panahon ug natad sa teknolohiya, nawala ang konserbatibong Pinoy nga daw maulaw o maikog sa pag-express sa feeling o pagbati ngadto sa opposite sex, bisan paman ang simpleng pagpangayo sa kamot sa dalaga kay  dili kaayo uso sauna ang pag-anunsyo niini sa katilingban. Gani sa traditional nga pagpangayog kamot sa ilang minahal mag-una kanunay sa panimalay, ang lalaki magdalag gasa sa pamilya, makig-istorya, heart to heart talk, pasalig ug panaad nga higugmaon sa kanunay ang ilang anak .

Apan karon, ang tradisyonal nga pamaagi mas gipanindot, mas exciting, kulbahinam sa bahin sa lalaki kung makaangkon ba kini og tando ug balibad sa kaminyuon nga gihinam-hinam.

Ikaw? Andam ka na ba  kung  mokalit og abot ang  wedding proposal?

Sa mga babaye, susama nako, ang pinaka-kulbahinam nga part sulod sa usa ka-relasyon mao ang kalit nga wedding proposal, wala damha ug labaw sa tanan muabot sa oras nga wala ta maka-plano sa atong mahimong reaksyon. Ilabi na kung ang atong partner dili pa sigurado nato nga ato ikauban hangtod sa hangtod.

Tuod man matag-relasyon nato makaingon gyud tah nga mao na ang atong ikauban hangtod sa hangtod apan what if tunga-tunga sa inyong panag-uban maka-realize ka nga dili diay siya ang gusto nimong ikauban? Kung  mo-propose na, andam ka ba nga mobalibad? O motando nalang pakitag respetar?

Darling, dili tanang wedding proposal kinahanglan nga tam-is nga tando ang mo-kitib sa imong baba aron mahimong malipayon ang imong pares. Dili sab mahimong mo-tando ka agig kaikog ngadto sa mga mag-effort nga mahimong successful ang matag-wedding proposal, gani kung imo nang buhaton,  hulga na sab na sa bag-ong dagan sa relasyon ang pakigbatok sa aftermath sa maong proposal. Tuod man nindot nga experience nga hatagan kitag effort sa atong  minahal sa kinabuhi. Ang pagbalibad sa usa ka-wedding proposal dili timailhan nga gitapos nimo ang inyong relasyon, mahimong isibog lang usa ang petsa o plano sa pagpakasal o diba kaha cool down lang usa sa relasyon kung dili pa gyud ka sigurado sa maong tawo.  Ayaw og kahadlok girl sa pagpadayag sa imong gibati, bisan paman sa bongga nga wedding proposal nga uso karon,  it doesn’t mean kung mobalibad ka dili naka sulod sa uso, it’s just so happen nga dili paka sure.

Alang nako, ang kaminyuon usa ka-sagrado nga butang alang sa mga tawo  nga sigurado sa usag-usa nga makig-kuyog sa kasakit ug kalipay.  Kung  unsay IN o Uso karon mahimong dili i-practice, gani mas gusto ko nga pribado ug romantic ang usa ka-wedding proposal, mas maayo kini kay para nako dili kaayo ulaw ug ugaling makabalibad ko sa akong pares o unsa man gani ang among masabotan.

Pero bisan unsa paman, aduna gihapon ta’y  choice sa usag-usa kanato busa, express yourself and speak your mind out, walay mawala apan dunay mausab sa imong kinabuhi. Go Girl! =)

(Madungog si Lady Dada s a 107.5 Win Radio gikan sa adlaw nga Lunes hangtud sa Sabado,  9am-11am/ 3pm-5pm)