Napamatud-ang katakus

CEBU, Philippines -  Balanse nga oras sa pagtungha ug sa pagpakita sa iyang abilidad sa pagkanta maoy pamaagi sa paghupot sa iyang kaugalingon sa 20 anyos nga si Rayllyne Grecia Alicaya.

Kanunay nga masaksihan sa mga kalihukan sa kagamhanan sa Siyudad sa Sugbo si Ray sukad siya nahimong 2nd Runner-up sa Sinulog Idol 2014.

Suma pa niya nga importante kaayo nga dili itago ang talento gumikan kay pinaagi sa pagpakita niini, daghang tawo ang malipay ilabi na nga usa kini ka gasa nga gikan sa Kahitas-an.

Suma pa ni Ray nga dako og natabang ang pagsalmot niya sa Sinulog Idol gumikan kay nadiskubrehan usab niya nga makaya ra pud niya ang ubang mga butang.

  "Una sa tanan, pag-apil nako sa Sinulog Idol, usa kini ka gasa nga niabot sa akong kinabuhi. Nahatagan na pud ko’g laing kasinatian nga dili gayud naku makalimtan ug madala-dala ni nako hangtud sa matiguwang ko. Dako ni og natabang nako ilabi na sa  pagkaplag nako sa  ubang abilidad na mahimo pa diay nako. Sama sa pagsayaw, pagkanta nga adunay kinabuhi ug emosyun nga dala niini, ug ang kalipay nga akong masinati kung anaa nako sa entablado," saysay pa ni Ray

Q and A

Banat News Hugyaw (BNH): Kumusta na, sukad ka na-runner-up  sa  Sinulog Idol 2014?

Rayllyne: Mao gyud ni ang kasagaran'g ipangutana sa mga tawo nga ako'ng masugatan sa amoa ug sa eskwelahan. Para naku, mao  ra man gihapon, normal lang. Hinuon aduna na'y mga ni-idolo nako, nidayeg ug tawagun na ko nila nga IDOL isip ako'ng ngalan.

BNH: Unsay mga nakat-onan nimo gikan sa  mga kompetisyon nga imong nasalmutan?

Rayllyne: Daghan gyud kaayo ang mga butang nga akong nakat-onan sulod sa pag-apil nako og mga kompetisyon. Gikan sa sinugdanan hangtud sa natapos ang kompetisyon, I consider it as my learning experience. Sa amu'ng panaghigalaay, pagtinabangay, kini gamay lamang sa daghang mga naagian namo  nga dili gayud naku makalimtan. Sama sa  pag -apil nako sa Sinulog Idol, dili gyud ma-ilisdan og bisan unsa nga bililhong butang kay matud pa sa among  coaches, daghang mga maayo apan kami ang napilian ug nagiyahan sa oportunidad nga ipakita sa mga tawo ang among abilidad sa pagkanta. Dili gayud naku makalimtan ang mga pangasaba, ug ang mga sayup sulod sa kompetisyon nga nahimu nako nga giya arun kini matarung ug mamahimong ehemplo sa ubang nangandoy nga maparihas nako.

BNH: Kumusta imong relasyon sa ubang Sinulog Idol winners? Kinsay labing suod nimo nilang duha ug ngano man?

Rayllyne: Maayu kaayo among relasyun nila ni Claudio (champion) ug Shey (first runner-up). Mas nagkasuod mi og taman kay kami mang tulo ang pirmi magkuyug kung aduna'y mga kalihukan ang atong lugar. Ang labing suod naku nilang duha kay si Shey kay bisag sa makadiyut namu'ng panag-uban, daghan na kaayo mi og naagian . Dungan mi nga mag-ampo sa  di pa magsugod ang show.

BNH: Unsay dili nimo malimtan nga kasinatian niadtong imong pag-apil sa Sinulog Idol ?

Rayllyne: Aduna'y dakung impact sa akung kasingkasing ang First Night sa Sinulog Idol diin aku ang nakaangkon sa title nga  "Star of the Night". Didto ko  nakaingon nga kaya gyud diay nako ug gihalug (gigakos) ko og taman sa aku'ng papa dungan sa pag-ingon nga proud kaayo siya nako.

BNH: Adunay mga kanta karon nga nitumaw pero wala'y klaro ang mensahe, unsa imong ikasulti ana?

Rayllyne: Mutoo ako nga tanan'g kanta nga gimugna sa mga composer, aduna'y rason ug ngano kini nila gipadayag. Magdepende kini sa ilang emosyon ug mga naagian sa kinabuhi. Dili man gud kita tanan makasabot sa gibati sa tawo. Aduna kita'y gitawag nga "Individual Differences" diin mao kini ang nagpakita nga kita adunay kalainan sa matag usa. Para nako, tanang kanta naa'y mga mensahe, magamay man kini o madako. Dili lang mamatikdan ang tanan'g gipadayag sa kanta ilabi na kung dili gayud tagamtamon ug sabton ang buot ipaabot niini.

BNH: Naa na ka'y uyab ron?

Rayllyne: Hahahaha naa na :)

BNH:  Target nimo nga edad nga magminyo ka.

Rayllyne: Seguro naa sa 26-27apan magdepende kini sa panahon. Ang pagminyo  man gud , usa ka balaang sakramento  diin kamo sa imong partner  mupanumpa sa usa'g usa nga hangtud sa katapusan magkuyog mo. Kini usa ka timaan nga  lahi na ang imong kalibutan kay aduna na man kay responsibilidad ug angay atubangon sa umaabot nga panahon. Siguro  kung mahuman na nako ang ako'ng responsibilidad ug panaad sa aku'ng pamilya, diha na ko maghuna-huna sa aku'ng kaugalingun.

BNH:  Mga kataw-anan nimo nga kaagi nga dili nimo malimtan.

Rayllyne: Daghan man ko'g mga experiences na kataw-anan apan kato ni sa panahon sa akong  pagkabata diin pirme ko nga  sugsugun nga baboy-baktin nga dili ko kadaug sa akong lawas ug ang akong pagkalagum . Dili kaayo ko ganahan mugawas sa  balay sa una kay maulaw ko sa akong hitsura, hehehe.

Fast Facts

Name:  Rayllyne Grecia Alicaya

Nickname: Ray

Age: 20

Date of Birth: November   19, 1993

Nationality: Filipino

Favorite song: The Prayer (Celine Dion)

Favorite movie: August Rush, The Notebook , 

Favorite TV  stations : ABS-CBN , GMA

Celebrity Crush : Channing Tatum!

School: Cebu Normal University

Course: B.A. Psychology

Motto: “Trials are not the reason to give up but a challenge to improve ourselves. Difficulties are not excuse to back out but an inspiration to move forward”   “Put God in the center of everything you do, because he can make impossible things possible.”