Makalipay, makapaabtik, maka Sexy!

Tomatoes para happy

CEBU, Philippines - Kun magul-anon ka, kaon og kamatis. Ang mga researchers sa Tianjin Medical University nakadiskubre nga ang pagkaon og kamatis kaduha ngadto sa ka unom ka higayon sulod sa usa ka semana, makapawala sa depression dul-an og 50 per cent. Kini gumikan sa lycopene, ang chemical nga maoy makapapuwa sa tamatis nga usa usab ka anti-oxidant nga mubatok sa depression. Ang maong "super-antioxidant" makatabang usab aron mapanalipdan ang imong panit batok sa UV rays.

Spinach para mubata

Kining maong green leafy vegetable dili paborito sa tanan. Apan kun masabtan nimo ang mga benepisyo niini, hayan mausab ang imong hunahuna. Ang spinach adunay fibre, iron ug vitamins A, C  ug K, ang sustansya nga anaa sa spinach makapalambo sa collagen production nga makapabata ug makapahimsog sa imong panit. Maka pa-tone usab ang spinach sa imong muscles, suma pa sa pagtuon sa Karolinska Institute nga nagbase sa Stockholm.

Lemon para detox

Kung gibati ka'g kakapoy, nagpasabot kana nga kinahanglan nimong limpyohan ang imong sistema pinaagi sa detox. Usa sa mga pamaagi mao ang pag-inom og lemon gumikan kay tugob kini og vitamin C. Mas epektibo usab kini kun imong isagol og green tea.

Nuts para magka abs

Ang nuts sama sa cashews, almonds ug peanuts puno og monounsaturated fat nga makatabang kaayo aron masuyop gyud sa lawas ang mga bitamina.  Usa ka pagtuon nga namantala sa American Journal of Clinical Nutrition nagkanayon nga ang monounsaturated fats makatabang kaayo sa pagpaubos sa timbang. Puno usab og fibre ang nuts busa makatabang kaayo kini sa digestive system.

Blueberries pawala sa stress

Ang vitamin C sa blueberries makatabang pagpakalma, suma pa sa usa ka pagtuon sa mga tigpanukiduki didto sa Alabama.