Sa loob ng siyam na araw mga namatay sa showbiz nagkasunud-sunod

Sa loob lamang ng siyam na araw ay tatlong mga kilalang personalidad sa entertainment business ang namaalam – ang butihing ama ng Asia’s Songbird na si Regine Velasquez na si Mang Gerry Velasquez (Feb. 3), ang comedian-activist na si Arvin `Tado’ Jimenez (Feb. 7) at ang actor-environmentalist na si Roy Alvarez (Feb. 11).

Matagal nang may iniindang sakit si Mang Gerry bago ito tuluyang namaalam. Vehicular accident naman ang ikinamatay ng komedyanteng si Tado nung February 7 nang mahulog sa bangin ang kanyang sinasakyang bus patungong Mountain Province. Si Roy naman ay inatake sa puso sa edad na 63 at kabilang sa tumatakbong teleserye sa GMA, ang TV remake ng Villa Quintana.

Derek at Angel, nagpakitang-gilas

Alam mo, Salve A., huwag mong palagpasin ang movie for TV na Bawat Sandali ng Studio 5 Original Movies na nagsimulang mapanood sa ere on TV5 last February 4 sa pamamagitan ng The Lady Next Door na pinagtambalan nina Alice Dixson at Artista Academy teen heartthrob na si Mark Neumann at dinirek ni Joel Lamangan. Ito’y sinundan ng balik-tambalan nina Nora Aunor at Tirso Cruz III sa When I Fall in Love na dinirek din ni Joel Lama­ngan last February 11 na susundan ng The Replacement Bride nina Jasmine Curtis-Smith at Daniel Matsunaga na dinirek naman ni Mac Alejandre. Ang final episode for this month ay ang Bawat Sandali nina Derek Ramsay, Angel Aquino, at Yul Servo na dinirek din ng premyadong director na si Joel Lama­ngan kasama ang actor-director na si Eric Quizon.

Napakaganda at kakaiba ang istorya ng Bawat Sandali na pinaghalong tragic love affair na may crime mystery na sinulat ng writer-actress na si Raquel Villavicencio.  Muling pinatunayan ni Angel Aquino kung gaano siya kahusay na artista at isa namang rebelasyon si Derek dito.

Rachelle Ann ayaw pang aminin si Slater

Fourteen months mawawala sa Pilipinas ang singer-actress na si Rachelle Ann Go kaya tiyak na mami-miss siya nang husto ng ex-PBB grandwinner na si Slater Young, ang bagong lalaking espesyal sa kanya ngayon.

Nakatakdang umalis patungong London si Ra­chelle para gampanan ang papel ng bar girl na si Gigi  Van Tranh sa West  revival ng Miss Saigon na siyang naglagay kay Lea Salonga sa internatio­nal stardom.  Ang role na Gigi ay unang ginampaman sa London ng singer-actress na si Isay Alvarez.

Ayaw pa tahasang aminin ni Rachelle na sila na ni Slater although aminado ang dalaga that they’re dating. Manonood umano si Slater sa Miss Saigon musical play sa London na magsisimula sa buwan ng Mayo.  Next month na aalis si Rachelle patu­ngong London in preparation for the play. Bago si Slater ay naging nobyo ni Rachelle sina Christian Bautista, Gab Valenciano, at John Prats. 

*  *  *

Happy Valentine sa lahat ng mga couples and uncouples!  Enjoy the day!