Dingdong ug Anne magpares

CEBU, Philippines - Plantsado na matud pa ang pelikula nga paresan nila ni Anne Curtis ug Dingdong Dantes. Ang Star Cinema ug Viva Films maoy mo-produce niini. Kahinumduman nga makadaghan na nga higayon nga nakatrabaho si Dingdong sa Star Cinema.

Nahibalik na sa Pilipinas

Gikatahong nahibalik na sa nasud sila si Sarah Lahbati ug Richard Gutierrez human sa pipila ka buwan nga pagbakasyon didto sa Europe.  Giingong kinahanglan na ang presensya ni Richard alang sa pagpadayon sa shooting sa umaabot nga pelikula niini sa GMA Films.

Espesyal nga regalo

Giregalohan ni Aljur Abrenica og mahalon nga alahas ang iyang girlfriend nga si Kylie Padilla. Apan nagdumili pagtug-an si Kylie kung unsa kini nga alahas basta iyaha lang kini nga sul-ubon sa espesyal nga mga okasyon.

Nakauyon sa Be Careful

Usa ang BBC World anchor nga si Rico Hizon nga magsige og tan-aw sa seryeng Be Careful With My Heart  nga gibidahan nila ni Jodi Sta. Maria ug Richard Yap.  Makita kini sa laing nasud pinaagi sa The Filipino Channel.

Nagtingog na gyud

Puwerting lipaya ni Charice gumikan kay nagtingog na sila sa iyang lola human sila nagkakita niini atol sa iyang concert sa Laguna dili pa lang dugay.  Gipaila-ila niya kini ngadto sa iyang girlfriend nga si Alyssa Quijano.

Trending ang Bulong

Nahimuot pag-ayo si Angelica Panganiban human nahimong trending sa nagkadaiyang social networking sites ang pelikula nila ni Vhong Navarro nga Bulong nga gipasalida sa ABS-CBN niadtong Domingo sa gabii. Suma pa sa aktres nga bisan sa kadugay na sa maong pelikula, gikagat gihapon kini sa publiko.

Andrea naanad sa intriga

Wala’y plano si Andrea Torres nga mopatol sa isyu nga matud pa duna sila’y relasyon ni Sef Cadayona. Nagkanayon ang aktres nga naanad na siya sa mga intriga. Nasayran nga makadaghan na nga higayon nga makit-an sila si Andrea ug Sef nga magkuyog sa pagpanuroy.

Tinabangay

Gibutyag ni Yasmien Kurdi nga dili sila magpalabwanay ni Jennylyn Mercado sa seryeng Rhodora X. Suma pa sa aktres nga nagtinabangay sila ni Jen aron hugyaw ang resulta sa maong serye.

Daniel gipangandoy ni Janella

Gipangandoy ni Janella Salvador nga iyang makauban sa proyekto ang iyang giidolo nga teen star nga si Daniel Padilla.  Misikat si Janella gumikan sa iyang karakter isip anak ni Richard Yap sa seryeng Be Careful With My Heart sa ABS-CBN.

Banda ni Dion nagpadayon

Kung bakante ang oras ni Dion Ignacio, ang pagtukar sa banda nila ni Arci Muñoz nga Philia maoy iyang gikalingawan. Siya ang guitarist samtang lead vocalist usab si Arci. Aduna na pud sila’y album nga gidumala sa Sonix State Recording.

Mikatawa lang

Mikatawa lang si BB Gandanghari sa mga istorya nga matud pa duna siya’y gihambin nga sakit. Suma pa niya nga dunay saktong pag-atiman ang iyang lawas busa dili angay tuohan ang maong istorya.

Mag-agad sa sitwasyon

Gibutyag ni Gwen Zamora nga wala pa gyud masulod sa ilang huna-huna sa iyang boyfriend nga si Raymund Romualdez, ang anak sa mayor sa Tacloban City nga si Alfred Romualdez ang kaminyoon. Suma pa ni Gwen nga paabuton nila ang hingpit nga pagbangon sa Tacloban sa dili pa sila magminyo.Ang  Tacloban maoy usa sa naapektohan pag-ayo sa bagyo  nga niigo sa nasud sa miaging tuig.

Pagtungha giatiman gyud

Tsika pa ni Julia Barretto nga bisan sa ka-busy niya sa taping sa seryeng Mira Bella, iyaha gyud nga gipaneguro nga dili siya maka-absent sa iyang pagtungha. Makita na sunod buwan ang Mira Bella sa ABS-CBN.

Amahan ni Regine mipanaw na

Mipanaw na ang amahan ni Regine Velasquez nga si Gerardo "Mang Gerry" Velasquez kagahapon sa hapon nga taud-taud nga dunay gihambin nga sakit. Sa wala pa kini mipanaw, nakatambong pa si Regine sa presscon alang sa Valentine Concert niini nila ni Martin Nievera.  (Sanden J. Anadia)