Dugay nang wala magtingog

CEBU, Philippines - Nagdumili pagbutyag sa rason ngano, apan giangkon ni Jacklyn Jose nga taod-taod na sila nga wala nagtingganay sa iyang anak nga si Andi Eigenman. Niya pa, dili na lamang siya manghilabot sa lovelife niini aron wala nay gubot ug ang iya na lang hilabtan mao ang anak niini nga si Ely. Pero matud ni Jacklyn mupadangat gihapon siya og suhestiyon ngadto kang Andi pinaagi sa mga tawo nga nagpalibot niini.

Medyo palpak

Giangkon ni Kris Bernal nga maayo man tuod ang rating sa 'Prinsesa ng Buhay Ko" nila ni Aljur Abrenica, dili kini sama kalig-on sa nangagi nilang mga proyekto sa GMA7 sukad sila nagloveteam. Pangagpas ni Kris mao nga mas ganahan ang mga tawo nga mag-drama sila inay magromantic -comedy.

Walay follow-up

Wala pay follow-up project si Kris Bernal human natapos kagahapon ang iyang proyekto sa GMA-7, ang "Prinsesa ng Buhay Ko" kauban si Aljur Abrenica. Matud niya pahimuslan niya ang higayon nga mag-acting workshop o mukat-on og bag-o nga iyang matampo sa Sunday All Stars. Dungan niini, makahatag na matud pa siya og igong panahon ngadto sa gidungog niya nga uyab nga si Carl Guevarra.

Maayo ang katrabaho

Matud ni John Lloyd Cruz nga dili matud pa lisud para niya ang pagtrabaho para sa ilang sitcom ni Toni Gonzaga sa ABS-CBN matag Domingo sanglit maayo matud pa ang ilang director ug ang iyang mga co-stars. Nalipay matud pa sila gumikan kay sulod na sa duha ka semana, number one ang ilang show. Maglisud hinuon siya pagpapili hain ang mas sayon niya: mupahilak ba o mupakatawa.

Game show ang gusto

Giangkon ni Kuya Kim Atienza nga pangandoy niya nga maka-host og game show ugma damlag. Ganahan siya og trivia/ quiz show para gaan matud pa dad-on. Musuway matud pa siya og acting panagsa apan dili gayud kini mamahimo niyang i-career sanglit pamilyado na siya, bug-at na sa schedule. Apan matud pa sa It's Showtime host, kun mahatagan og higayon ganahan siya og susama sa role ni Joel Torre sa OTJ-bida-kontrabida.

Magpahungaw sa gibati

Mubakasyon si Heart Evangelista kauban si Senator Chiz Escudero aron saulogon ang iyang birthday sunod bulan. Karong February 14, mismo ang 29th birthday ni Heart apan sa Asya ra matud pa sila mubiyahe sanglit dili siya mahimong mawala og dugay gumikan sa iyang gihimong pelikula, Trophy Wife kauban sila si Cristine Reyes para sa Viva Films.

Naanad na!

Mahulagway ni Heart Evangelista nga daw nabato na ang iyang kasingkasing kun ang hisgutan mao ang panaghiuli nila sa maayong kabubut-on sa iyang pamilya, ilabi na tali niya ug sa iyang mommy. Sa kadaghan na niya matud pa og masakit nga kasinatian, labing bag-o nahitabo niadtong panahon sa Pasko, matud sa aktres daw naanad na matud pa siya ug dili na gani siya madutlan og mga eksena tali sa inahan ug anak, sukwahi kaniadto nga muhilak gayud siya.

Si Daniel na lagi!

Gideklara na ni Robin Padilla nga ang iyang pag-umangkon nga si Daniel Padilla na maoy mangulo sa henerasyon sa ilang pamilya karon sa showbiz. Matud ni Robin may mga nahimo na si Daniel nga wala nila masuwayi kaniadto. Kini sama sa pagkanta, paghimo og romantic projects ug nag-action na pud. Apil si Daniel sa pelikula sa pamilya Padilla nga nag-ulohan,  Ama, Ina at Mga Anak" nga showing na karong January 30, sa mga sinehan lukop nasud.

Pirated Family

Human sa pag-guest ni Richard Gomez sa Madam Chairman ni Megastar Sharon Cuneta sa TV5 ugma sa gabii, aduna gyud diay silay regular nga sitcom nga himuon. Kini mao ang "Pirated Family" nga pagabituonan ni Sharon ug hulip sa Madam Chairman. Si Goma matud pa maoy mamahimong leading man ni Sharon.

Ayaw na gyud Phil

No comment na gyud si Phil Younghusband kun ang pangutana kabahin kang Angel Locsin. Sukwahi na kini sa gipadayag niya niining bag-o lamang nga love gihapon niya si Angel. Nangayo siya og dispensa ngadto sa press nga nangutana kaniya kabahin kang Angel sanglit dili na matud pa siya mutubag niini.

Challenge Masters

Sila si Matteo Guidicelli ug Robi Domingo maoy magsilbi nga "challenge masters" sa umaabot nga The Biggest Loser Pinoy Edition Doubles nga magsugod na karong February 3 sa ABS-CBN. Buot pasabot, sila maoy maglisudlisud sa mga contestants busa panawagan ni Matteo nga magmalig-on lamang gayud sila kay mutabang man pud sila ni Robi aron malampusan ang mga challenges. Si Iza Calzado maoy host niini.

Justin hubog ug nagmarijuana, gikasuhan!

Gikiha si Justin Bieber sa kapolisan sa Miami niadtong nilabay nga adlaw gumikan matud pa sa pagmaneho niini og sakyanan nga hubog, pagmagahi pagtahan sa iyang kaugalingon ug gumikan kay nagpasiugda kini og drag race.

Suma pa nahitabo kining tanan didto sa Miami Beach, diin gipasirad-an matud pa sa grupo ni Justin ang usa ka dalan aron magpalumba sila sa ilang mga sakyanan diin naaktuhan siya nga nag-drive og yellow Lamborghini nga inabangan niya.

Dungan niini nahagbong matud pa si Justin sa sobriety test, nagsupak-supak sa kapolisan nga nisita kaniya ug expired na pud matud pa ang lisensya sa 19-anyos nga "Baby" hitmaker.

Suma pa ni Miami Beach Police chief Raymond Martinez namahayag matud pa si Justin nga nag-smoke siya og "marijuana and he did consume a beer."

Nasobrahan ka lapad ang agtang!

Gipahungaw ni Nicki Minaj pinaagi sa iyang IG (Instagram) account ang iyang kasagmuyo sa cover photo nila ni Kobe Bryant sa special music edition sa ESPN magazine.

Matud ni Nicki nga nasobrahan ra ang retouch sa hulagway, dili na hinuon nindot tan-awon gumikan kay labihan ka lapad ra sa iyang agtang.

Human niini, gipabahaan ni Nicki ang iyang mga follower og hulagway nila ni Kobe alang sa maong edition nga walay retoke.

Hinuon nagpasalamat siya sa kahigayonan nga nakauban niya ang sikat nga NBA player gumikan kay lingaw matud pa kaayo ang ilang photo shoot.

Sheryn mubirit sa ASAP ugma!

Balik Pilipinas na usab ang Crystal Voice of Asia nga si Sheryn Regis. Nasayran nga tua na nakabase sa Sugar Land, Texas, USA ang garbo sa Sugbo sukad niadtong Marso 2010. Nipauli siya sa Cebu aron motambong sa Sinulog.

Milantaw usab si Sheryn sa 34th Cebu Popular Music Festival niadtong Enero 17 sa Cebu Coliseum kung diin usa siya sa mga produkto niining tinuig nga kompetisyon sa mga bisayang kanta sama nilang Raki Vega, Anna Fegi ug Vina Morales. Kahinumduman nga nakadaog siya isip Best Interpreter sa kantang "Banay" nga mao usab ang nakadaog nga Grand Prize winner niadtong tuig 1999. Napuno sa siyagit ang Cebu Coliseum sa dihang gitawag siya sa entablado aron mohatag og mensahe ug mikanta og "Through the Fire" ni Chaka Khan diin mihangyo ang mga nanan-aw pinaagi sa pag - ingon og "Sample! Sample!"

Dungan sa pagsaulog sa iyang ika-10 nga anibersaryo sa showbiz, magpabilin si Sheryn sulod sa pipila lamang ka bulan para sa mga TV guesting ug shows sulod ug gawas sa nasud ug usa na niana ang ASAP 19, ugma Domingo, Enero 26. Kahinumduman nga usa siya sa regular artist kaniadto human mahimong 1st Runner-up ni Erik Santos sa Star in a Million Season 1 sa tuig 2004.

Para sa latest updates ni Sheryn, i-LIKE sa FB ang ETalent Management & Entertainment ug i-FOLLOW siya sa:

Facebook: facebook.com/sheryn.regis

Twitter: @sherynregisreal

Instagram: @sherynregis