Restaurant nina Raymond at Richard nasa pinakamataas na building sa buong Pilipinas

Ang Gramercy Tower pala ang pinakamataas na building sa buong Pilipinas. Nakikilala na ang Gramercy Tower dahil dito ang venue ng 71 Gramercy, ang bar/restaurant na pag-aari ng magkapatid na Richard at Raymond Gutierrez at ng kanilang mga business partner.

Ang sabi ng mga dumalo sa birthday party ni Raymond noong Jan. 21, sobrang taas ng building kaya nabingi sila nang sumakay sa elevator na nagdala sa kanila sa 71st floor Gramercy.

Worth it daw ang pag-akyat nila sa pinakatuktok ng Gramercy Tower dahil kitang-kita ang kagandahan ng buong Metro Manila at ng Laguna lake.

Enzo nag-mature sa bigote at balbas

Ni-reinvent ni Enzo Pineda ang sarili. Nagpatubo si Enzo ng bigote at balbas bilang pahiwatig na ready na siya na gumanap ng mature roles.

Itinaon ni Enzo ang kanyang new look sa presscon kahapon ng Basement, ang horror movie ng GMA Films. Nanibago kay Enzo ang mga reporter at kapwa niya artista dahil sa kanyang balbas at bigote.

Kinilig naman si Louise delos Reyes sa question ng mga reporter na hindi ba siya nagkaroon ng rashes sa mukha dahil sa balbas at bigote ng kanyang boyfriend?

Mga bida sa Basement ang mag-dyowa pero isang eksena lang ang magkasama sila. Napansin ng press na in love na in love si Louise kay Enzo.

TJ mag-isang nag-aasikaso ng burol ng ama

Awang-awa naman kay TJ Marquez ang lahat ng mga dumalo sa presscon dahil nakaburol pa ang kanyang ama.

Nag-iisang anak pala si TJ kaya siya lang ang nag-aasikaso sa burol at libing ng tatay niya. Namumula ang mga mata ng young actor dahil sa pag-iyak pero kakaiba ang professionalism na ipinakita niya. Umapir pa rin siya sa presscon, kahit nakaburol ang kanyang ama.

Bago kayo magtanong kung sino si TJ, kasali siya sa cast ng Basement at napapanood siya sa ilang mga programa ng GMA 7.

Mga babaeng pamagat mainit sa Siyete

Ang sipag mag-promote nina Marian Rivera, Alden Richards, Jennylyn Mercado, Yasmien Kurdi, Mark Herras, at Mark Anthony Fernandez ng kanilang mga bagong primetime show sa GMA 7.

Ilang araw na silang visible sa mga TV program ng Kapuso Network dahil ipino-promote nila ang Carmela at Rhodora X.

Parehong pangalan ng mga babae ang mga title ng mga bagong teleserye ng GMA 7 pero mahalaga ang mga role nina Alden, Mark, at Mark Anthony.

May mga nagtatanong kung bakit may letter H ang Rhodora X? Hindi ko alam ang sagot kaya ipapatanong ko sa writer ng show.

Alyssa tsugi sa Startalk

Simula sa Jan. 26, tuwing Linggo na nang hapon ang Startalk at 4 p.m. ang timeslot ng aming show.

May mga suggestion na ilagay ang Startalk sa 2 p.m. slot para mapanood ito pagkatapos ng Sunday All Stars pero may ibang dahilan ang management kaya wala nang urungan ang tapatan ng Startalk at ng Buzz ng Bayan.

Ang hottest showbiz news ang ihahatid ng Startalk sa Linggo. Halos wala nang pahinga ang aming mga researcher na masipag sa paghahanap ng mga kontro­bersiyal at maiinit na showbiz news.

Kasama pa rin sa Startalk sina Papa Joey de Leon, Butch Francisco, Heart Evangelista, at Ricky Lo.

Siyempre, nalungkot ako sa pagkawala ni Alyssa Alano na nakasama namin sa Startalk sa loob ng anim na taon. We will miss you, Alyssa. Good luck!