Sinulog festival queen 2014

CEBU, Philippines - Dakong ganti ang napanag-iya sa representante sa Tribu Tinubdan sa Kauswagan human niya naangkon ang titulo nga Sinulog Festival Queen 2014.

Ang 3rd year B.S. Tourism student sa University of Perpetual System Dalta nga si Christine Jael Abellanosa maoy nilangkat sa titulo karong tuiga. Nakadaog sab ang Tribu Tinubdan sa Kauswagan isip Best in Musicality gumikan sa maanindot nga live musical performance atol sa ilang group and solo presentation.

Usa ka dako nga hagit sa matag contestants nga makuha ang attention sa mga judges pinaagi sa kaanyag ug ka maayong pagdala sa ilang kaugalingon sul-ob ang nagkadaiyang disenyo sa festival queen costumes.

Dili lang ang kaanyag ang focus sa Sinulog Festival Queen lakip sab sa criteria for judging ang opening production number, solo performance ug group production presentation.

Tuod man, 11 ka contestants ang nagtigi sa mga corporate and special awards apan labing swerte gyud si Abellanosa, naangkon niya ang kadaghanan niini.

"Hakot award", paghulagway pa ni Miss Earth 2008, Karla Paula Henry, kinsa maoy host kauban si Vince Escario.

Ang mga nadawat nga award ni Abellanosa mao ang: Medicard's Miss Congeniality, Sinulog Festival Costume, Best Sinulog Festival Costume, Best in Musicality, Best in Solo Performance, Miss Devant, Miss Casino Femme, Miss PLDT ug Best in Group Production Presentation.

Miangkon si Abellanosa nga dili siya katuo nga makadaog siya sa maong indigay ug wala sab niya damha nga duna siya’y mahakot nga awards. "Worth it ang tanan gihaguan namo, tinuod gyud, Viva Pit Senyor."

Samtang 1st runner- up si Pauline Amelinckx, nga mirepresentar sa Tribu Himag-ulaw gikan pa sa Placer, Masbate; nakuha niya ang Best in Group Performance, Miss Phoenix Petroleum, Miss Sun Cellular ug Miss Sinulog Allphones.

Sumala pa ni Amelinckx nga dako ang iyang paglaum nga ipadayon pa unta sa mga taga Masbate ang pag-apil sa Sinulog gumikan kay usa kini ka pamaagi nga mapakita nila ang ilang talento.

Second runner-up ang representante sa Carcar City nga si Jaya Lozano ug siya sab ang Miss Lecit E ug Best in Runway. Third runner up ang Boholana nga si Luvina Joy Bullanday gikan sa Tribu Panglaoanon ug nakuha niya ang special award nga Miss Ever Bilena. Fourth runner up si Charrise Claire Lanchenibre gikan sa Banay Talamban ug siya sab ang napili nga Miss 2GO Travel.

Mipasigarbo sab sa ilang talento ang Sinulog Idol 2014 grand champion nga si Claudio Deiparine kauban ang runners up nga sila Sheila Mae Bucog ug Railyn Alicaya.

Siguridad sa Sinulog

Aron malikay nga mabiktima sa krimin diay mga tamdanan nga gihatag ang kapolisan:

*Magbilin og tawo sa balay. Kun wala’y mahabilin siguraduon nga lig-on ang trangka sa balay.

* Ibton ang mga appliances nga gi-plug aron makalikay sa sunog.

* Pasigahon ang suga sa gawas sa balay kun gabii.

* Dili modawat og bisita kun dili sinati.

Pamaagi aron maluwas sa kadalanan kun mosaksi sa kalihukan sa Sinulog

*Dili magsul-ob og mga mahalon nga alahas.

*Dili magdala og dakong kantidad sa salapi.

*Dili magdala og mahait nga hinagiban.

*Likayan ang pagdala og mahalon nga butang sama sa cellphones, i-pad, ug laptop.

*Likayan ang pagdala og sakyanan aron dili mahasol sa sobrang kahuot sa trapiko.

*Dili magdala og gamay'ng bata ra rota sa grand parade.

*Likayan ang paglakaw sa mangitngit mga lugar kung mag-inusara

Unsay angay  nga buhaton?

* Kun adunay kadudahan i-report sa kapolisan.

* Sayri ang numero sa kapolisan.

* Kun magdala og bata butangan og name tag.

* Maminaw sa pahibalo sa otoridad alang sa kahusay ug kalinaw.

*Tumanon ang lagda nga ipatuman sa otoridad.

*Ilabay ang basura sa  saktong labayanan (Bryner Diaz)