Miss Campus Role Model Philippiness

Musalmot sa duha  mga ka dagkong kalihukan sa Sinulog Festival ang mga mananaog sa Campus Role Model Philippines aron pagdasig usab sa mga kabatan-onan sa Kabisay-an nga muapil sa nahisgutang indigay sa kaanyag ug pangutok nga gisugdan didto sa kaulohan lima na ka tuig ang nilabay.

Ang mga mananaog nga sila si Jessilen Karina Salvador ug Mary Nicole Gee gipaabot nga nitekang kagabii sa Sinulog Festival Queen competition ug  mutungtong usab sa float sa Quick & Fast International Logistics nga apil sa Sinulog Grand Parade ugma puhon.

Si Salvador half-sister ni Maja ug nilugwa sa Supah Dance segment sa Sunday variety show sa ABS-CBN ASAP, duha ka semana na ang nilabay kauban ang iyang maguwang nga award-winning actress.

Gihulagway niya ang iyang maguwang nga buotan ug matinabangon ngadto kaniya, gani mao gayud kini ang naningkamot aron magkauban sila sa nahisgutang segment sa ASAP.

Nasayran nga ang Campus Role Model Philippines, usa ka indigay nga gipasiugdahan sa RDH Entertainment sa publicist ug marketing consultant nga si Richard Hinola ubos sa pag-abag usab sa Quick and Fast International Logistics. Gisabak kining maong kalihukan sa Carmela Tadeo Foundation Inc., sa negosyante nga si Carmela Tadeo.

Tumong sa maong indigay mao ang pagbaid sa mga mananaog aron sarang sila nga ikapasigarbo ngadto sa katilingban ug kapanaminan sa mga kabatan-onan. Ang mga mananaog sa maong indigay, adunay college scholarship nga madawat ug dili mag-maintain og grado apan kinahanglan lamang nga dili sila mahagbong sa ilang mga subjects.

Si Tadeo nga nahinabi sa Banat News Hugyaw kagahapon namahayag nga siya ug Presidente sa maong foundation nga si Mary Ann Gonzales, kumbinsido nga edukasyon gayud ang hagdanan paingon sa kalampusan, busa ang ilang kahugpungan magsilbi nga taytayan sa katumanan sa mga damgo niining maong mga batan-on.

Asoy pa ni Tadeo nga siya mismo produkto sa kaluoy sa mga tawo nga adunay malumo nga kasingkasing hinungdan nga nahiabot siya sa iyang nahimutangan diin aduna na siya’y 10 ka mga gagmay’ng negosyo nga maoy nahimong tinubdan sa iyang scholarship program.

Suma pa niya nga kaniadto kinahanglan niya nga manarbaho sa iyang mga kaparyentihan aron makalampos lamang sa pagtuon ug pagtungtong niya sa college, may naangkon usab siya nga scholarship busa naningkamot siya og maayo nga makalampos.

Gani buot unta niya nga mukuha og mass communication, apan wala kining maong kurso sa scholarship grant nga iyang nadawat, hinungdan nga nikuha siya og accountancy ug malampuson nga nahimong CPA.

Spiritual adviser niya ang inila nga preacher nga si Bo Sanchez ug karon nga aduna na siya'y kapasidad nga makatabang, baruganan niya ang pagtabang usab sa mga nanginahanglan sanglit testimanento siya nga kun aduna lamang gayu’y kahigayonan ang usa ka tawo sama sa iyang nasinati kaniadto, aduna gayud kini kalampusan nga makab-ot sa kinabuhi.

Ang maong beauty and brain contest, mubukas na sa iyang ganghaan alang sa mga haom nga kabatan-onan sa Kabisay-an ug Mindanao alang sa pageant nga ipahigayon didto sa kaulohan karong Nobiyembre.  Alang sa nagtinguha nga musalmot sa beauty and brains pageant, pagpakisayod pinaagi kang Hiñola sa [email protected]

Karong bulana usab gitakda nga mutekang ang mga mananaog sa Campus Role Model Philippines sa isla sa Bantayan aron mupahigayon og outreach project sa dapit nga labihang naapektuhan sa bagyong Yolanda. Nasayran nga ang Business Development Officer sa foundation nga si  Lotis Desamparado Anire lumad sa maong isla busa naningkamot usab siya nga makahatud og tabang ngadto sa iyang mga ka tagi isla.

Apan dili kay ang mga mananaog lamang sa nahisgutang indigay ang adunay kahigayonan nga mamahimong scholar sa foundation, sanglit matud pa ni Tadeo aduna usab sila’y programa alang niadtong mga utokan apan walay ikasarang nga mga batan-on. Kinahanglan lamang nga muduso sila og resume ingon man kopya sa report card, diin ang general average 85% pataas.

Kun madawat ang aplikante, mamahimo siyang scholar sa foundation diin abagahon niini ang tuition ug board and lodging ug pasudlon sila sa usa sa mga negosyo nga gipanag-iya ni Tadeo aron aduna sila’y allowance. Apan giklaro niya nga priority gayud ang pagtuon sa scholar busa flexible ang ilang oras sa pagtrabaho. Suma pa niya aduna na matud pa sila’y ubay-ubay karon nga mga scholars ubos niining maong programa. Ug sanglit "Pay It Forward" ang ilang baruganan, kinahanglan nga sa higayon nga makatapos na sa pagtuon ang maong scholar, siya na pud maoy musuporta og usa ka estudyante sa kolehiyo nga tinuod nga tabangonon.

Alang niadtong nagtinguha nga mamahimong scholar sa nahisgutang foundation, ipadala ang kopya sa imong resume ug report card ngadto kang Gonzales pinaagi sa electronic mail: [email protected]