Sto. Niño paglaum ko

Gihangyo ko ang tanan, lakip ang mga kaparian, sa pag-ingon: Wala ako mag-inusara. Ang Santo Niño uban kanako. Siya ang akong paglaum.  Diha ra kutob ang akong wali. Bitaw, akong ipadayon.Mao kini ang kamatuoran nga atong gisaligan. Ang Santo Niño paglaum sa katawhan. Pakpakan nato ang balaang Bata sa dihang giuyog ang Cebu ug Bohol sa makusog ug nagdahunog nga linog, nga morag adunay kauban nga tingog, Nalisang tang tanan. Morag katapusan na sa kalibutan ang atong nabatyagan. Kampanaryo sa Basilica nahugno, ug kini atong gikasubo. Apan usa ka kahibulongang butang ang nahitabo. Walay tawong natap-ukan o naantimano ang pagkaigo. Katalagman nalikayan, tungod kini sa tabang sa Batang Balaan. Niini ako nakaingon kay sayud kita nga aduna man o walay importanteng okasyon, mga tawo atubangan sa simbahan magkatipon. Pero, niadtong tungora, wala gayud bisag usa. Miabot ang daghan nga aftershocks. Tungod niini daghan kanato ang nanimaho kay nahadlok namang maligo kay basig samtang kita naligo, aftershock kalit nga moabot, unya sa tualya kita makalimot. Unya mogawas tang walay saplot. Ay ambot,..Mongisi ang nahimuot, pero kasagaran nato galain ang buot... Dili na lang nato hisgutan ang nahitabo sa Bohol, labi na ang Loon kay magsakit lang ang akong kabubut-on, kay usa man ako ka Bol-anon.

Adto kita sa bagyong Yolanda nga sa atong nasud mibisita.Diha diha misamot kita pagkataranta. Nadugangan pa og maayo ang atong kaguol ug kalisang kay daghang kinabuhi ang nawagtang. Dili dali ug dili sayon ang pagwala sa atong kasubo sa kamatayon sa atong mga kadugong Pilipinhon. Seguro, adunay kauban kanato dinhi nga nagbangutan pa sa pagkamatay sa kapikas, igsuon, higala o ginikanan. Hinuon, daghan usab kanato ang nagpabiling malig-on, ang hugot nga pagtuo sa dughan ug kasingkasing gitapion. Daghan kanato, midangop kang Senyor Sto. Niño. Kaniya gibutang ang dakong paglaum sa mga tawo.

Dili nato ikalimud mga higala nga sa atong pagkahimugso niining kalibutana, aduna kitay gitakin nga kaluha. Tawgon nato siya og si kamatayon. (kinsa tong misimba niadtong December 31, alas  9 sa gabii dinhi, taas ang kamot) sa wala makasimba niadtong higayona, hala, ang tupad ninyo tan-awa ug ingna: Mamatay sab ka...Tambok ka man o niwang, bata ka man o tigulang, dato ka man o pobre, ang kamatayon dili magdumili, pagkuha sa imong  kinabuhi. Ang atong kinabuhi adunay utlanan dinhi sa ibabaw sa kalibutan. Busa angay natong mahinumduman nga kinahanglan kitang magbinuotan. Kay kun magpabilin kita nga dautan, wala kitay maayo nga sangputanan. Ang Balaang Kasulatan nagsulat: "Wala pay mata nga nakakita, wala pay dalunggan nga nakadungog, wala pay hunahuna nga nakatugkad unsa kanindot ang giandam sa Ginoo sa tanan nga mahigugma kaniya!" (1 Corinto 2:9). Higugmaon ta ang Ginoo pinaagi sa paghigugma usab sa mga tawo. Kay kun kita magpabilin nga mahigugmaon sa Diyos ug sa katawhan, maangkon nato ang kinabuhing walay katapusan.

Aron mamahimong makahuluganon kining atong panagtipon sa sayong kabuntagon, atong ipadayag ang atong dakong pagsalig ug pagtuo sa Ginoo. Ang tawo nga mawad-an og pagsalig,ang tawo nga mawad-an og pagtuo, mawad-an usab og paglaum. Sa pag-ampo, magpabilin kitang malaumon ug matuohon nga ang Ginoo nag-andam og lugar para sa matag usa kanato didto sa iyang gingharian.

Dili kita magpabilin sa kasubo pagkahugno sa atong kampanaryo, dili kita magpabiling magul-anon sa pagkatumpag sa atong balay, buildings o mga tulay, kay kining tanan mga pagsuway nga lumalabay. Dili kita angay nga magpadayon sa atong pagbangutan tungod sa pagkahanaw o pagkawala sa atong mga pinangga. Hinuon, magmasaligon kita nga moabut ang panahon kanus-a kita mahiusa pagbalik kanila. Ang angay natong buhaton mao ang pagpuyo subay sa mga lakang ni Kristo, kinsa mao ang dalan padulong sa kinabuhing dayon. Uban kaniya, wala kita mag-inusara. Siya ang Sto. Niño, paglaum mo, paglaum ko, paglaum sa katawhan...

Kining maong wali, gibatbat ni Fr. Jonas atol sa "Installation of Hermana & Hermano Mayores 2014" atol sa unang novena-mass niadtong Huwebes, January 9. Si Fr. Jonas maoy Rector sa Basilica del Sto. Niño.