My Little Bossings gisaway

CEBU, Philippines - Ang TV host ug manunulat nga si Lourd de Veyra nipagawas og open letter alang sa iyang idolo nga si Vic Sotto kalabot sa pelikula niini nga My Little Bossings. Suma pa ni Lourd nga wala siya mahimuot sa pagtan-aw niya sa maong pelikula ug katungod matud pa niya nga mosaway gumikan kay nagbayad siya aron lang gyud makalantaw niini. Nasayran nga nagbaha ang mga produkto nga gipang-endorso   sa mga nalakip sa maong pelikula.

“Hindi kami nagbayad ng P220 para bentahan ng pancit canton, tinapay, sabong panlaba, cough syrup, at kung ano-ano pang produkto ang ine-endorse ninyong dalawa ni Kris Aquino. Ganoon na ba kayo ka-desperado? Hindi naman siguro,” suma pa ni Lourd.

Nakaingon ang TV host nga mura’g gi-shoot ang maong pelikula sulod sa tulo ka mga adlaw  ug nagduda siya nga gidali-dali ang paghimo niini.Nabantayan usab niya nga kulang sa exposure si Ryzza Mae Dizon. “Kulang sa exposure yung batang babaeng mataba. Ang ganung level ng pagka-cute, dapat nasa kanya ang 90% ng camera,” dugang pa ni Lourd.

Slater ug Rachelle Ann nag-date

Gikumpirmar sa Sugbuanong aktor nga si Slater Young nga naa sila karon sa “dating stage” sa singer nga si Rachelle Ann Go.  Aktibo si Slater sa pag-post og hulagway sa iyang Instagram account kung diin tupad niya si Rachelle Ann.

Standing ovation alang kang Rose

Nasulod na gyud sa Top 5 sa X-Factor Israel  ang Pinay finalist nga si Rose Osang Fostanes human sa hugyaw niya nga performance kagahapon ug  nakadawat na pud siya og laing standing ovation gikan sa mga hurado.

Gikanta ni Rose ang "Bohemian Rhapsody" nga gipasikat sa sikat nga British rock band nga Queen.

Wala makapugong sa pagtulo sa iyang luha ang judge ug  mentor ni Rose nga si Sheri Maimon samtang nagkanta ang Pinay finalist sa entablado. Pipila ka mga hurado ang nigamit sa mga pulong nga "amazing" ug  "wonderful" sa paghulagway nila sa performance ni Rose.

Laing  elimination round ang mahitabo karong adlawa, ug ang masulod sa  Top 4 mao  na’y magsangka sa final round sunod semana.

MMFF nakahipos na og P934 M

Mikabat na matud pa og  P934 million ang kita sa 2013 Metro Manila Film Festival sulod sa 12 ka adlaw, suma pa ni Metropolitan Manila Development Authority chairman Francis Tolentino.

Si Tolentino nga nahinabi sa ABS-CBNnews.com kagahapon wala nibutyag og pilay kita sa matag pelikula, apan niya pa nag-una gihapon ang comedy film "My Little Bossings" starring Vic Sotto, Ryzza Mae Dizon ug James "Bimby" Jap Jr..

Gisundan gihapon kini sa pelikula ni Vice Ganda nga "Girl, Boy, Bakla, Tomboy" ug ikatulo gihapon ang "Pagpag: Siyam na Buhay" nila ni Kathryn Bernardo ug Daniel Padilla.

Giangkon pud ni Tolentino nga nalabwan sa pelikula ni Vice ang Little Bossings niadtong Domingo, apan sa overall ranking, numero uno gihapon ang pelikula ni Ryzza ug Bimby.

"For that single day lang, 'yung kahapon lamang, 'yung 'Girl, Boy, Bakla, Tomboy' for single day lang 'yung kahapon. Pero [leading pa rin] sa overall ang 'My Little Bossings,'" niya pa.

Wala matino gikan kang Tolentino kun unsa nga pelikula ang nahimutang sa ikaupat ngadto na sa ika walo nga pwesto. Ang uban pang pelikula sa festival karong tuiga mao ang "Kimmy Dora: Ang Kiyemeng Prequel," "10,000 Hours," "Boy Golden: Shoot to Kill (The Arturo Porcuna Story)," "Pedro Calungsod: Batang Martir," ug "Kaleidoscope World."