Andam na ba ang imong iregalo?

CEBU, Philippines -  Nagkaduol na gyud ang adlaw sa Pasko, daghan kanato ang  natarantar na sa paghuna-huna kung unsa ang iregalo sa atong mga minahal sa kinabuhi o ba kaha sa atong mga kinugos (inaanak).

Importante gyud unta kaayo ang listahan aron tulin ang pagpangompra, apan ang uban kanato puwerti mang bisiha hinungdan nga wala gyud kahimo og lista.

Puwes, pahimutang na mo, dinhi sa Banat In, among paambitan diha kaninyo ang tips sa pagpili og regalo ug kinahanglan nga simple ug praktikal. Ang importante nga malipay gyud ang tawo nga makadawat niini.

Alang sa mga bata

Adunay moingon nga ang mga ginikanan ra sa bata ang maka-appreciate sa imong regalo sa mga bata nga gikugos pa. Okay ra kini gumikan kay segurado man pud nga magamit sa bata ang imong gihatag. Kung kaya sa budget, mahimo ka nga mohatag og gatas. Puwede ra man pud nga mohatag ka og mga importanteng gamit sa mga bata, sama sa sapatos, sinina, shampoo, baby powder, diaper ug uban pa.

 Kung ang bata nagtungha na, nindot kaayo nga hatagan nimo siya og regalo nga gamit kaayo sa iyang pagtuon. Mahimo ka nga mohatag kaniya og  libro o educational wall chart.  Kung mahimo, likaye ang paghatag og candy gumikan kay mahurot dayon kini.

Alang sa mga ginikanan

Dako na kaayo ang pahiyom sa atong mga ginikanan kung makadawat sila og regalo gikan sa ilang anak. Bisan unsa pa na ka simple, sigurado nga ilaha kini nga ikalipay, gumikan kay wala sila maghuna-huna og presyo niini. Ikalipay na kaayo nila nga gihatagan ninyo sila og dakong importansya gumikan kay nakahuna-huna gyud mo nga hatagan sila og regalo,

 Nindot nga ideya nga hatagan ninyo inyong ginikanan og sapatos o ba kaha tsinelas ug lakipan dayon kini og Christmas letter.

Mahimo usab sila regalohan og cake nga nakamarka gyud ang ilang pangalan o ba kaha dalhon nimo sila og restaurant.

Alang sa hinigugma Kahibalo gyud ka kung unsa mga butang nga paborito sa imong hinigugma. Nindot usab kaayo nga mohatag ka og personalized T-Shirt o ba kaha hatagan nimo siya sa paborito niya nga pagkaon.

Siyempre sa matag butang nga imong iregalo kaniya, pakapinan dayon nimo kini og love letter. Ang uban kanato moingon nga karaan na kaayo nga estilo ang love letter apan mas sweet kini kumpara sa text message.

Alang sa higala

Hatagan gyud og bili ang higala,  bisan unsa pa na ka barato ang imong ihatag, dako kaayo nga kalipay ang ilang bation nga imo sila nga mahinumduman.

Mahimo ka mohatag sa imong higala og chocolates o ba kaha cake. Kung ganahan ka mohatag og butang kaniya, kinahanglan nga mohaom kini sa paborito niya nga kolor.

Pipila sa mga nindot nga iregalo sa imong higala, mao  ang panyo, personalized calendar, ballpen, T-Shirt,  ug accessories.