Ellona natagak sa X-Factor USA

CEBU, Philippines - Nakugang ang mga  supporters ug ang mga hurado  sa dihang natangtang sa  X-Factor USA ang Pinay finalists sa maong show  nga si Ellona Santiago.

Kahinumduman nga positibo nga mga komento gikan sa mga hurado ang nadawat sa maong  Fil-Am finalist kung diin  gikanta  niya sa miaging gabii, ang  "Applause" ni Lady Gaga ug  "If I Were a Boy" ni Beyonce.

Matud pa nga gamay ra kaayo ang nakuha nga public votes ni Ellona busa natagak kini sa maong show.

Gani nisinggit og "boo" ang audience  gumikan kay wala sila kauyon sa pagkatagak  ni Ellona kinsa gituohan nila nga lig-on nga finalist sa X-Factor USA.

Ang  mentor ni Ellona nga si  Demi Lovato nakugang pag-ayo ug dunay nakadungog nga nilenggua kini og "This is ridiculous!".

Dugang pa ni Demi nga nasubo siya sa resulta hinungdan nga wala dayon siya makatingog sa dihang gitawag ang pangalan ni Ellona nga maoy matagak niadtong  Biyernes sa gabii nga episode sa X-Factor USA.

Samtang nagpasalamat si Ellona sa tanang nisuporta kaniya ug dakong garbo alang kaniya nga nilungtad og dugay ang pag-istar niya sa maong show.

"Just because I'm off the show doesn't mean my dream ends, keep a lookout for me. Thank you so much for all the people who voted me each week and kept me this far, and thank you even though many of you couldn't but continuously supported me along the way.I'm blessed, grateful, and the best is yet to come. I love you all!," suma pa ni Ellona.

Anne matinabangon

Ang mga fans ni Anne Curtis dili gyud mobiya sa ilang idolo bisan pa man sa mga isyu nga giatubang niini. Nisaludo sila og samot sa ilang idolo sa dihang nasayran nila nga kanunay diay tigbisitahan si Anne sa mga bata nga dunay sakit apan dili lang kini magdala og media. Pipila na ka mga batang masakiton ang natabangan sa aktres.

Mag-kiss o dili?

Makakilig matud pa nga eksena ang masaksihan karong hapon sa programang  "LUV U" sa ABS-CBN  ug daghan ang nag-atang kung madayon ang pag-kiss ni Nas Aguas sa partner niya sa maong programa nga si  Alexa Ilacad.

Piolo motikang sa Tacloban

Nagplano si Piolo Pascual nga mobisita sa Tacloban City ug sa maong dapit siya magselebrar sa Pasko.  Aktibo ang aktor sa paghatag og hinabang sa mga nabiktima sa bagyong Yolanda.

Phil mitubag na

Human sa pipila ka adlaw nga   pagpakahilom, mihatag na gyud og katin-awan si Phil Younghusband sa tsismis nga naglambigit sa iyang pangalan ngadto kang KC Concepcion. Suma pa ni Phil nga dili kini tinuod, gani kausa ra siya makahimamat ni KC atol sa interview niini sa The Buzz niadto uban sa iyang ex-girlfriend nga si Angel Locsin.

Tiya Pusit ug uyab buwag na

Nagbuwag na sila Tiya Pusit ug ang 27 anyos niya nga boyfriend nga si Nathan Villa. Giingong  wala magkasinabtanay ang duha sa pipila ka mga butang. Nasayran nga magpakasal na unta ang 65 anyos nga si Tiya Pusit ug ang iyang uyab sunod tuig.

Mihinay ang raket

Gikatahong nagkaproblema og maayo karon ang singer nga si Charice gumikan kay nagkahinay ang iyang mga raket sa ubang nasud. Usa kini sa rason nga magdaginot na ang singer sa iyang mga gastohanan.

Paabota lang

Gibutyag ni Iza Calzado nga wala siya'y tagoan ug gipasalig niya sa katawhan nga mosulti ra siya sa higayon nga makahukom na sila sa iyang boyfriend nga si Ben Wintle nga magpakasal. Una na nga gihimakak ni Iza ang taho nga matud pa nagplano na sila ni Ben nga magpakasal.

Boy Golden wala pa nahuman

Gipasalig sa mga nagdumala sa pelikulang Boy Golden nga makaabot sila sa deadline sa pag-submit  sa ilang materyales alang sa  Metro Manila Film Festival (MMFF).  Giingong wala pa mahuman ang shooting sa maong pelikula nga gibidahan nila ni Laguna Governor ER Ejercito ug KC Concepcion.

Derek nasakit

Temporaryong nahunong sa miaging adlaw ang taping sa For Love or Money sa TV5  gumikan kay naglain ang lawas sa usa sa mga bida niini nga si Derek Ramsay. Nakapundo hinuon og pipila ka episodes ang maong programa.

Tungod sa elepante

Magbutang kanunay si Lea Salonga og gamay nga istatuwa sa elepante sa iyang dressing room gumikan kay matud pa niya, mao kini ang maghatag kaniya og positibo nga enerhiya aron matarong ang iyang performance sa entablado.

Ibutang sa banyo

Giingong ibutang ni Sen. Chiz Escudero  sa banyo ang kalendaryo kung diin naka-pose og sexy ang iyang girlfriend nga si Heart Evangelista. Nasayran nga si Heart maoy 2014 calendar girl sa usa ka sikat nga ilimnong makahubog.

Wala'y uso ang sex video

Gibutyag ni Patricia Javier nga wala siya'y sex video ug tataw lang nga susama ra niya og nawong ang  naa sa sex video nga nikatap. Matud pa sa aktres nga minyo na siya busa imposible nga mabuhat niya ang maong butang.

Juday magmaya sa Pasko

Tsika pa ni Judy Ann Santos nga magmaya gyud og maayo ang pagselebrar niya sa Pasko karong tuiga. Gawas nga napili siya nga Best Reality Show Host sa 27th PMPC Star Awards for TV alang sa  programang MasterChef Pinoy Edition, padayon usab nga naglawig sa kahanginan ang game show niya sa ABS-CBN nga Bet On Your Baby .