Hamis nga panit

CEBU, Philippines - Pipila kanato ang mogamit na lang sa bisan unsa nga produkto aron lang gyud mohamis ang panit.

Aduna'y uban nga  mogasto og dako aron  lang gyud maangkon ang hamis nga panit  nga makatagaktak sa atong bulsa.

Apan angayan nato nga huna-hunaon nga dunay mga alternatibong pamaagi aron dili na mogasto og dako sa pagpahamis sa panit.

Pipila niini ang makit-an ra sa atong kusina o ba kaha sa atong tugkaran busa oras na nga atong sutaon.

Mushroom

Sulod na sa taas nga panahon,  gigamit na ang mushrooms sa Chinese medicine. Gigamit na kini sa nagkadaiyang  skin care products nga gihangop sa mga tawo. Abunda kini  sa anti-inflammatory properties  ug makahayag usab kini sa panit.

Bugas

Dili lang diay kutob sa pagkaon kining bugas, mahimo usab kini nga gamiton sa pagpahamis sa panit. Butangan lang og gamay nga tubig ang pipila ka lusok sa bugas ug ipaghid sa panit. Motabang usab kini sa pagtangtang sa dead skin cells.

Pipino

Gawas nga makapawagtang kini sa nag-itom nga panit nga nagtuyok sa mata,  magamit usab kini nga cleanser sa inyong panit.

Carrots

Napuno kini sa  beta carotene ug nagsilbi usab nga  anti-oxidant. Ang pagkaon og carrots makatabang sa pagpahamis sa panit.  (Anden Miles, taho gikan sa http://womens2womens. blogspot.com)