Dili makaayo sa Pilipinas ang gusto sa Hong Kong

Ang gihimo sa Hong Kong nga pag-pressure sa Pilipinas dili makaayo natong mga Pilipino. Tinuod nga daghang mga Pilipino nga nagtrabaho ug nanginabuhi sa Hong Kong apan dili kini igong katarongan nga ipaubos na lang gayod nato ang atong pagkatawo. Kinahanglang ipakita usab nato nga bisan pobre kitang nasud apan aduna usab kita’y prinsipyo ug garbo.

Wala makontento ang Hong Kong sa pagpangayo’g pasaylo ni Mayor Joseph Estrada sa Hong Kong sa nahitabong hostage taking sa Manila diin dunay mga Hong Kong National nga napatay. Ambot kun nganong gihimo kini ni Estrada. Aron ba sa pagpahumot sa iyang ngalan ug pagpangandam sa Presidential election sa 2016.

Klaro kaayo nga ang tuyo sa Hong Kong nga si Presidente Noynoy Aquino ang mangayo’g pasaylo. Tamparos kini natong mga Pilipino kun buhaton kini ni Noynoy. Dili angay nga magpadala kita sa hudlat sa laing nasud. Ipakita nato karon nga dili kita sama kaniadto nga sayunsayonon lang sa ubang nasud sa pagpanghadlok.

Kaniadto, gidaugdaog ug giyatakan na ang atong katungod  sa mga Katsila, unya sa mga Amerikano ug gisundan sa mga Hapones. Ipakita natong mga Pilipino nga dili na kita sama kaniadto nga daling mapukling sa pagpanghudlat sa laing nasud. Ipakita nato sa tibuok kalibotan nga lig-on ug isog kitang mga Pilipino karon kun ang atong katungod na ang ilang yatakan.

Dili ako pabor nga si Noynoy mangayo’g pasaylo sa Hong Kong. Usa ka tinalawan kun ang atong presidente mangayo’g pasaylo sa Hong Kong nga dili man nato gusto nga mahitabo ang hostage taking niadtong  2010. Busa, barogan nato ang atong pagka-Pilipino. Karon na ang sinugdanan niini.