Nagyaya Lang!

Kagahapon, nanggawas na ang istorya ug hulagway unsa ka dako ang kadaut nga gibilin ni Super Typhoon Yolanda sa Visayas. Nagkataas ang listahan sa mga patay sa Tacloban City gumikan sa grabeng pagbaha. Ang mga panimalay sa Ormoc City wala nay mga atop. Ang kinatibuk-ang Leyte grabe pud ang nahiaguman. Dinhi sa Sugbo, ilabi sa northern Cebu dili matago ang makaluluoy nga imahi nga mugna sa ka bangis sa maong bagyo nga usa sa labing kusog sa kasaysayan sa kalibutan, labing kusog karong tuiga. Tataw nga tabangonon kaayo ang sitwasyon.

Apan kun unsa ka makahugno ang maong kamatuoran, mao pud ang kapungot nga akong nabatyagan kagahapon gumikan kay ang ABS-CBN, TV5 ug GMA-7 mga walay puangod ug kaluoy! Tiaw mo kana nga labihan na ka lanog ang panawagan para sa hinabang, sila padayon lamang gihapon sa ilang mga programa nga daw walay nahitabo? Kaniadtong sila didto sa Luzon maoy gikusokuso og bagyo, giputol nila ilang regular programming ug mipahigayon gilayon og telethon aron manawagan og hinabang? Gidungog nato sila. Karon, nganong daw wala man sila’y pagpakabana kanato? Mga butbuton! Muserbisyo matud pa sila kanato. Unya hain man? Mga walay kaikog!

Silang tanan palpak uy! Pagka Biyernes nga mao gyu’y pagkusokuso ni Yolanda sa Visayas, nag-regular programming gihapon sila. Nag-Showtime ug Eat Bulaga. Nagdrama pinaagi sa ilang mga teleserye. Nagkatawa katawa sila ug nahimuot didto sa kaulohan samtang kita dili napanguyawan ug gilubatlubatan gumikan sa hinaguros ni Yolanda. Samtang nanglupad na ang mga atop ug nangatumpag na ang mga  kabalayan ug nalukat na ang mga kahoy, sila didto naglingawlingaw pinaagi sa mga salida sa telebisyon. Maypa ang international media sama sa CNN ug BBC kay misungasong gyud aron paghatud og kasayuran sa padayong pagpanghagis ni Yolanda. Imbes nga ang atong mga estasyonan sa telebisyon maoy muhatag nato og balita, nagsalig na hinuon kita sa mga iningles nga media organization. Dakong kataw-anan!

Hinuon, mga alas kwatro kagahapon milusad na ang ABS-CBN og telethon aron manawagan og panabang. Good job! It's better late than never after all. Sa mga naapektuhan sa bagyo, sa mga namatyan ug nawad-an og panimalay, mag-ampo lang gayud kita. Nasayud ko nga dili kita talikdan sa Ginoo. Siya kanunay nga naggiya kanato. Alleluia!

Magdungog gihapon kita sa kahanginan pinaagi sa dyRC-Radyo Calungsod 648kHz, 10am to 12noon, Mondays to Saturdays. Pangitaa ko sa social networks: Libertine_real88@yahoo.com ug Penpointtwits (Twitter).

Pakpak: Late man tuod, apan maayo na lang nga gilusad sa ABS-CBN Manila ang ilang Special Telethon mga alas kwatro kagahapon sa hapon para sa mga biktima sa tanang kalamidad, particular na ang sa Super Typhoon Yolanda. Better late than never, di ba?

Pakpak: Maayo pud ang gibuhat sa ABS-CBN nga human og lusad nila sa nahisgutang telethon, diretso na ang ilang paghatag og impormasyon kabahin sa kadaot nga gibilin ni Yolanda. Tanang mga ahensya nga makahatag og pagpasabot sa impormasyon ilang gipang-interview. Gidiretso na nila kining maong coverage ngadto na sa TV Patrol Weekend .

Pakpak: Abtik pud kaayo ang GMA-7 Cebu. Biyernes sa gabii, mibyahi dayon sila paingon sa Bogo. Cebu nga nagdala og relief goods para sa mga naapektuhan didto. Nakatabang pa sila og limpyo sa dalan, sanglit daghan pang mga kahoy nga nag-ali sa agianan. Gipahibawo na pud sa GMA-7 Manila kagahapon nga gilusad na nila ang ilang relief campaign para sa mga biktima ni Yolanda.

Pakpak: Ang "Talk Icon" sa Sugbo nga si Jude Bacalso dali usab kaayo nga nakapanawagan og tabang. Usa siya sa mga nangulo sa relief campaign nga nanawagan sa tanang mga graduate sa UP Cebu. Kini mao ang: 1+2+3+1 = 1 kilo of rice + 2 canned goods + 3 packs of instant noodles + 1 liter of bottled water.

Dad-a karong adlawa, Nov. 10, Sunday, ang inyong hinabang ngadto sa  AS Building of UP Cebu , Gorordo Avenue, Lahug.  Adunay mga tents sa atubangang bahin sa tunghaan nga dumalahon sa mga UP Cebu student volunteers, pangutana mo diha alang sa dugang kasayuran.

Pakpak: Hugyaw ang subling panagtugbang nila ni Kapamilyang Leo Lastimosa ug Vilma Andales isip anchors sa TV Patrol Central Visayas sa ABS-CBN, matag alas singko sa hapon. Lig-onay! Kredibilidad nga malisud lumpagon!

Una nang nabalita sa Banat Hugyaw pipila ka bulan na ang milabay nga mipahuway usa si Atty. Haide Acuna isip co-anchor niining maong news program gumikan kay buot niyang mugahin og igong panahon sa iyang mag-usa na ka tuig nga baby girl.

Pakpak: Managlahi gyud ang weather forecasters nga milugwa sa local newscasts niadtong Miyerkules sa hapon. Sa TV Patrol Central Visayas si Oscar Tabada ug sa Balitang Bisdak si Al Quiblat. Managlahi pud sila og outfit. Si Tabada nag-blazer, samtang si Quiblat nag-polo shirt nga adunay logo sa PAG-ASA.

 Pakpak: Okay na paminawon karong panahona si Balitang Bisdak reporter Bexmae Jumao-as. Relax na siya kun mag-live report, dili na isog og tingog ug dili na maklaro nga nakulbaan siya.

Final Prediction sa GB

Wala masulod sa Final Prediction sa Global Beauties sa hayan makalangkat sa Miss Universe crown sa pageant night didto sa Moscow, Russia kagabii, si Miss Philippines Ariella Arida.

Ang Global Beauties, usa ka beauty pageant website nga gilangkuban og mga beauty expert sa tibuok kalibutan, diin ang ilang panagna kanunay gyud nga matinuod.

Panagna sa Banat Hugyaw

Apan para sa Banat Hugyaw dako kaayo og kahigayonan nga masulod si Arida sa top 5. Kini gumikan kay labihan ka lig-on sa sash nga iyang gisul-ob, buot pasabot ang sash nga Philippines dili mabentahaan sa milabay’ng tulo ka tuig sanglit kanunay nga runner-up ang atong mga pambato. Dugang pa niini, Pilipinas usab ang winner sa Miss World ug Miss Supranational karong tuiga.

Apil usab siya sa mga importanteng kalihukan sa Miss Universe pre-pageant activities, daghang sponsors ang ganahan kaniya ug labihan kadaghan sa iyang supporters didto sa Russia.

Labaw sa tanan, ang nasinati nga katalagman sa Pilipinas, ilabi na ang linog ug ang Super Typhoon Yolanda, naghatag kang Ariella og dakong publisidad aron sigurado gayud siya nga dili siya isalikway sa mga hurado.