Bag-ong mga serye

CEBU, Philippines - Remember, mga Yadz that today is the 5th day of the second to the last month of 2013. Bag-o lang pod natapos ang Barangay Elections.  Atol sa eleksyon, nagsaulog pod ang Sitio URASE sa pyesta ni San Hudas de Thadeo [dili Hudas Escariote, ha], nga maoy ilang Patron Saint. Unya, kay nindot na man ang among kapilya, gimisahan na gyod. Ambot kun wa pa ma nindot ang among kapilya, momisa ba pod kaha ang pari, or wa lang namo pamisahe, kay maulaw mi kaniadto sa among kapilya nga dili nindot. Kun unsay tubag ana, si Lord ra gyo’y nasayod. Dili ba nag-ingon man ang bag-o natong Santo Papa, nga kinahanglang mag-simple living ta? Na, kamoy hukom. Pero duna pa gyod ko’y namatikdang dili ko makatuo nga mahitabo. Tanang nanambong sa misa, nangalawat, apil na tong nagpunay’g panglibak sa mga kandidatong wa nila magustohi. Duna pa’y nakigpuyo puyo lang, dili kinasal, nangalawat. Duna pay palautang nga way bayad bayad, ug uban pa. Tungod tingali kay nakatampo sila’g para pakaon sa pari, nagtuo tingali sila, nga pasayloon na sila ni Lord, busa puwede na silang mangalawat. Mao ra gyod na’y nakita nakong rason. Pero ari na lang ta’s mga bag-ong serye ron uy, aron dili maglabad ang atong utok. Bag-o  lang nahuman ang serye nga Juan de la Cruz, ug gipulihan ni sa bag-o nga nag-ulohan og Honesto. Nakalantaw ko’s unang adlaw ani atong Lunes, pero kay unang adlaw pa man ni, wa pa ko makahukom kun makagusto ba ko ani. Kay dili sama atong Dugong Buhay ug niining Annaliza, nga sa sugod pa lang, na-hostage dayon ko. Human ra ba ni sa TV Patrol . Busa dili gyod ko makapasalig nga motan-aw ko pirme. Kay nagtapos na ra ba pod mi sa among salida, busa, magsugod na pod mi sa bag-o namong serye, para gihapon sa Channel 47.