Tsansa ni Miss Philippines Ariella Arida nga maangkon ang diamond nexus crown

CEBU, Philippines - Miangkon si Bb. Pilipinas-Universe Ariella Arida nga dako ug bug-at ang pressure nga iyang gibati tungod kay ang iyang gipangsundan nga sila si Venus Raj, Shamcey Supsup, ug Janine Tugonon pulos mipakita og maayong labok diha sa Top 5 sa kasaysayan sa Miss Universe pageant.Mao kini iyang gihimong giya sa iyang pagpursige nga magmadaugon ug ibalik ang korona sa Pilipinas human sa 40 ka tuig.

Aduna ba’y tsansa nga iyang makuha ang diamond nexus crown sa Miss Universe karong tuiga? Misaysay ang mga international pageant analyst nga inanay nilang namatikdan ang pagsulbong sa 24-year-old nga Pilipina pinaagi sa nagkadaiyangpre-arrival reviews sa mga pageant enthusiast. Paghiabot na sa 86 ka mga kandidata didto sa Moscow, Russia, ilang napanid-an nga dako ang kausaban nga gipakita ni Ara. Hinuon expected na nila nga mo-undergo gyud ang tanang mga kandidata sa total transformation. Wa magpauwahi si Ara.

Matud pa sa www.missuniversepageant.org (Miss Universe Pageant Hot Spots), apil siya sa Top 10 nga mi-stand out sa ilang Welcome Dinner Party; apil sa Top 10 alang sa Best Glamshots diin Ice Princess ang tema. Ang maayong balita mao nga siya maoy napili ni MU official photographer Fadil Berisha ug midaug isip ultimate “Ice Princess.” Rason ni Berisha nga adunay katakos si Arida nga usab-usabon ang iyang panagway atubangan sa mga lente sa kamera. Nalakip usab siya sa 27 ka mga kandidata nga napili nga morampa atol sa Mercedez-Benz Fashion Week–Tony Ward Couture Fashion Show kauban si reigning Miss Universe Olivia Culpo, kinsa nagpa-picture uban kang Ara ug mitawag kaniya nga “gorgeous.” Napili usab siya nga usa sa lima ka mga kandidata nga molugwa sa Mercedes Benz commercial diha sa mga telebisyon sa Russia.

Ang au.ibtimes.com(International Business Times Australia) mibutang usab kang Ara sa Top 5 winnable candidates kauban sila si Miss USA Erin Brandy, Miss Israel Yityish Aynaw, Miss France Hinarani de Longeaux, ug Miss Great Britain Amy Willerton. Kahinumduman nga mihatag sa ilang scientific analysis and prediction ang IBTAu nga si Megan Young maoy mogawas nga mananaug sa Miss World 2013. Samtang ang ilovechile.com nga nahimutang sa Santiago, Chile, nagkanayon nga si Arida usa sa pipila ka mga kandidata nga adunay dakong tsansa nga modaug. Midugang sila sa pag-ingon nga maisip si Arida nga “important candidate.”

Ang Dubai-based nga mantalaan nga Emirates 24/7 miingon nga dili layo nga mahitabo ang double victory nila ni Megan Young ug Ariella Arida susama sa nahitabo sa Indian beauties nga sila si Sushmita Sen (Miss Universe) ug Aishwarya Rai (Miss World) niadtong 1994. Susama usab ang pangagpas sa tehranchronicle.com nga nagbase sa Tehran, Iran. Kini nagkanayon, “This year, Philippines, Australia, Russia, and USA are the hot favorites. We will see who would have the tiara sparkling on her head this year.”Lig-on usab ang barog ni Ara kun ang shineoasis.hubpages.com. Kini misaysay nga usa si Miss Philippines sa mga frontrunners nga nagagikan sa Asya.

Si Miss Universe 1969 Gloria Diaz naglaum usab nga si Ara maoy modaug sanglit personal choice niya ang dalaga. Apan midason ang labing unang Pilipinong Miss Universe nga ang pagdaug sa maong bangga nakamarka sa palad sa usa ka kandidata. Nagtuo siya nga usa kini ka destiny. Kun para gyud ni Ara ang korona, walay sarang makailog niini gikan kaniya.

Paborito sa mga corporate sponsor ang exotic ug fierce-looking beauty sa first-time beauty queen. Bentaha usab alang sa dalaga ang iyang determinasyon pagsakmit sa korona ug “risk-it-all” attitude. Pagkakaron, usa siya sa labing giatangan sa tibuok kalibutan.Halos tanan nga pageant site miabiba kang Ara ug mitawag kaniya isip top contender for the crown. Ilang gilauman nga padayonon ni Ara ang iyang kaikag sa korona ug magpabilin isip scene-stealer, attention-grabber, ug head-turner sama sa iyang presensya atol sa gipahigayon nilang party sa Soho Rooms. Padayon nga mihangyo ang atong pambato sa atong suporta pinaagi sa online voting diha sa MU Website ug mga pag-ampo nga hatagan siya sa lamdag sa Labaw’ng Makagagahum atol na sa final night karong Nobyembre 10 sa buntag, live telecast sa ABS-CBN. After all, ang kadaugan ni Ara, kadaugan sa tanang Pilipino all over the world.