Tinud-anay na gyud?

CEBU, Philippines - Nasigpatan napud og balik sila si Shaina Magdayao ug Piolo Pascual nga sweet kaayo nga nanunuroy sa mall. Padayon gihapon nga gipadayag ni Shaina nga wala'y dautan kung magkauyab sila ni Piolo apan iyang giklaro nga friends ra gyud sila sa aktor.

Crazy Love

Mosikad na karong buntag sa ABS-CBN ang Korean series nga Crazy Love nga gibidahan nila ni Park Sun-Young ug Go-Se-Won. Giingong kusog kaaron ang maong serye didto sa South Korea ug gipaabot  nga mao usab kini ang mahitabo dinhi sa Pilipinas.

Ryzza scholar sa iyang tunghaan

Scholar diay si Ryzza Mae Dizon Eton International School sa Heroes Hills, Quezon City busa makatigom gyud siya og maayo gikan sa iyang kita sa showbiz. Suma pa ni Ryzza nga dili siya moreklamo sa kapuno sa iyang skedyul basta ang importante nga dili maapektohan ang iyang pagtungha.

Pamilya ang prayoridad

Usa ka tuig na sa showbiz ang winner sa Protégé: The Battle for the Big Artista Break nga si Thea Tolentino ug nagpasalamat siya sa GMA-7 gumikan kay wala gyud pasagdi ang iyang showbiz career. Gibutyag usab ni Thea nga wala pa siya'y plano nga mosulod og seryosong relasyon gumikan kay prayoridad niya ang pagsuporta sa iyang pamilya.

Eugene wala'y tugpahay

Dili pa makapahuway si Eugene Dominggo gumikan kay human sa mga nagbaha niya nga pelikula, busy na usab siya karon alang sa laing pelikula niya nga entry sa Metro Manila Film Festival (MMFF) 2013 nga  "Kimmy Dora: Ang Kiyemeng Prequel." Suma pa ni Eugene nga dili pa maseguro kung kanus-a siya makabakasyon og balik sa ubang nasud gumikan sa kadaghang proyekto nga nagpaabot kaniya.

Marian magpasalamat sa Vietnam

Special guest si Marian Rivera sa usa ka TV show sa Vietnam sunod adlaw. Pasalamatan ni Marian ang mga tawo sa maong dapit nga nalingaw sa serye niya nga Dyesebel ug Marimar  nga gipasalida sa maong nasud.

Charice gidawat na sa lola

Malipayong gipahibalo ni Charice nga nadawat na sa iyang apohan ang relasyon nila ni Alyssa Quijano. Gani misugot na kini nga mobisita sa ilang pinuy-anan.

Madayon na gyud

Giingong dako ang posibilidad nga madayon ang pelikula nga pagabitoonan sa magsoung Robin Padilla ug BB Gandanghari. Giingong gisugdan na ang negosasyon ug malakip usab niini ang anak ni Robin nga si Kylie.

Daghan pa

Giangkon ni Janelle Manahan nga daghan kaayo sila og  sex videos sa uyab niya nga si anhing Ramgen Revilla. Panghinaut niya nga dili na manggawas ang ubang mga video gumikan kay personal kini nga butang.

Ryan sa Picture,Picture!

Si Ryan Agoncillo ang napilian sa mga kadagkoan sa GMA-7 nga mo- host sa bag-ong game show nga Picture! Picture! . Nagtimailhan kini nga magpabilin sa GMA ang TV host.

Gabby nag-topless

Tataw kaayo ang pamorma sa lawas ni Gabby Concepcion sa pelikulang When the Love is Gone gumikan kay dunay mga eksena niini  kung diin trunks lang ang iyang gisul-ob.

Pauleen mi-mature tungod ni Vic

Mapasalamaton kaayo si Pauleen Luna sa relasyon nila Vic Sotto gumikan kay ang TV host maot nagtudlo kaniya mo-mature ang iyang panghuna-huna. Suma pa ni Pauleen nga seryoso ang relasyon nila ni Vic ug kever lang siya sa ilang mga kritiko.

Komunikasyon giputol na

Gibutyag ni Cristine Reyes nga giputol na nila ni Derek Ramsay ang pagpadala og text messages sa usag-usa busa imposible nga mahitabo ang obserbasyon sa ubang mga tawo nga matud pa dako kaayo og tsansa nga magkabalik silang duha.

Aga gihangop gihapon

Nagpasalamat si Aga Mulach sa iyang fans gumikan kay bisan naa na siya sa TV5, padayon gihapon nga gihangop ang replay sa sitcom niya niadto sa ABS-CBN nga Oki Doki Dok nga gipasalida karon sa Studio 23.

Date nahunom

Gihunom na ni Paulo Avelino ang pakig-date ni KC Concepcion aron mahunom ang isyu nga matud pa duna sila'y tinagoang relasyon.  Giklaro hinoun ni Paulo nga susama sila ni KC nga single  apan naglikay lang sila sa intriga.