Bangon SugBohol!

Happy Sunday mga SweetKabutanding! Bisan pa man sa mga naagian nato nga mga pagsuway happy mode lang gihapon kita. Niaging Biyernes malipayon kaayo ko nga nakakuyog sa Bohol para sa usa ka misyon, ang GMA Operation Bayanihan. Sa pagtikang nako didto sa Tubigon, Bohol kauban nako ang among Station Manager nga si Ms. Ann Marie Tan, Executive Producer sa BuenaManoBalita Vlad Fernando, gikan sa Balitang Bisdak Jessie Campos, cameraman Philip Patricio ug ang anchor sa Balitang Bisdak si Kapusong Bobby Nalzaro kay katong adlawa live manukad sa Tubigon, Bohol ang Balitang Bisdak. Nibilib gyud ko kay ang tibuok puwersa sa GMA 7 Cebu News and Public Affairs present atong adlawa unya anaa pa ang among head sa GMA Manila nga si Ms. Cel Amores nga full support ang gihatag dili lang sa programa apan para usab sa Kapuso Foundation nga gipanguluhan ni Ms. Mabelle Rusiana, kinsa didto na pagkahuman sa linog niadtong Oktubre 15.  Una namong misyon kay ang pagpakaon sa mga 300 ka indibidwal nga nakasinati sa maong linog, apan lahi kining among gihimong feeding kay ang among gipakaon ang lamian kaayo nga Cebu's Original Lechon Belly courtesy of Mr and Mrs Marlon Gochan, kauban usab ang mga staff niini, sa walay paglangaylangay gisugdan na nila ang pagtagudtagud sa mga lechon belly nga kami mismo galaway. Hehehhehehe! Unya pag-ingon sa in-charge nga pwede na molinya, dako kaayo ang among kalipay sa dihang nag-apud apud na mi sa lechon with matching puso. Ang ilang kalipay nga katong adlawa malahi na usab ang ilang kan-on dili lang permi sardinas o noodles. Ako pa silang gipakatawa nga "lechon lechon din pag may time." Nahuman ang among feeding nga halos ang tanan nagbalik balik kay daghan kaayo ang lechon nga among giandam. Nibiya kami sa lugar nga bitbit ang kalipay sa among kasingkasing nga nakapalipay kami og mga indibidwal nga bisan pa man sa krisis nga ilang giatubang mopahiyom ug mopasalamat sa ilang nadawat. Nitikang dayon kami sa Plaza sa Tubigon, Bohol para mo assist ni Ms. Mabelle nga nanghatag og relief goods. Makaingon ko dili ana kasayon ang pagpanghatag, bisan pa man gusto nimo nga mamahimong hapsay apan usahay ang katawhan dili na manumbaling, ang ilaha lang makakuha sa maong hinabang. Wala na man gani nila nabantayi ang aftershocks nga ako na shock! Bisan ang uban wala sila'y coupon nahatagan gihapon sila sama sa tubig, relief packs ug uban pa. Ang among singot nag-abot pero okey lang. Go lang ng go lang ang among team. Pagkahuman, nanihapon kaming tanan nga naa pud ang lechon, wala pud mi nagpaulahi..hahahahhaa! Kauban ang host sa BuenaManoBalita nga si Alan Domingo (halos usa na ka semana nga naa sa Bohol atong panahona), Nikko Sereno nga parehas ni Alan dugay na nga nagcover sa Bohol, pero nakita nako sa ilang mga mata ang kalipay nga nakahatag og Serbisyong Tinud-anay. Pero mao ni ang exciting, kay sa balay nga among gi-istaran lami na kaayo ang akong concert (hagok!), unsa man pagkahitaboa nga nakamata ko pagka ala una sa buntag, ang akong gibuhat na lang kay nag emote emote mode ug ang kamingaw sa palibot kalit lang adunay nagtingog ilawom sa yuta nga murag nasuko nga gusto mu-olbo-- nag aftershock na diay o linog ba kaha to! Deadma lang ko slight pero medyo nakulbaan. Pagbasa nako sa facebook didto nagtrending ang nahitabo. Dili na lang ko mo BisChika sa gibuhat nilang EP Vlad ug Ms. Ann. Hahahahhaha!

Pagkabuntag, usa na pud ka adlaw nga puno sa paglaum ug panghinaot nga wala na'y mga aftershocks. Namahaw ang among team unya maabot na pud ang laing puwersa sa GMA7 Cebu News and Public Affairs nga silang Atty Rose Versoza, Ms. Chelo Vallena, Chona Carreon, Rhandi Gorion,Ademar Ochotorena, Leofil Labistida, Suzzane Alueta . Pero sa dihang naghuwat mi ni sir Bobby Nalzaro, nag aftershock na pud busa ang ending na ko best in paghid na sa whiteflower. Human sa pagpangaon, pag-abot sa AMRO (All Terrain Medical Relief Operation), Chonghua Hospital, Philippine College of Surgeons, Perpetual Succor Hospital, Cebu City Medical Government, JARAC Construction, Mandaue Shipping & Lighterage Corp and Prime Movers, ug pagload sa mga angay dad-on sa mga bukirang bahin sa Bohol gisugdan na  namo ang Medical Mission and Relief Operation sa Sagbayan ug Inabanga, Bohol. Tulo ka barangay ang among nabisita ug nahatagan sa mga hinabang. Didto ko natandog sa usa ka inahan nga nisugat kanamo ug ni BisChika nako nga dako kaayo ang iyang kalipay nga naabot mi sa ilang lugar.Tungod sa kalipay nakahilak si Nanay pero nagpugong na lang pud ko sa akong mga luha kay basin agaw eksena ang peg.

Niuli ko sa Cebu nga puno sa pag-ampo nga unta sa hinayhinay makabangon na ang Bohol nga karun nahitabo na. Sa mga minahal nakong mga higala nga naa sa Bohol padayon sa pagbangon ug ayaw kamo kabalaka nga kining tanan nga inyong naagian dunay solusyon ug daghan ang motabang kaninyo. Ayaw wagtanga ang inyong paglaum ug labaw sa tanan ang pagsalig sa Kahitas-an. Hangtud sa sunod nato nga panagkita….#BangonSugBohol #BangonBohol #GMAKapusoFoundation #BuenaManoBalita #BalitangBisdak #KayaNatoNi!