Jake inamin na ang nangyari sa kanila ni Lovi

Ano kaya ang reaction ni Lovi Poe na ‘yung relasyon nila dati ni Jake Cuenca na hindi niya alam ang label, binigyan ng label ng aktor.

“Exclusively dating” daw sila at may hirit pa itong “We were dating for a long time and whatever we had, pareho kaming nag-enjoy. I still consider that a relationship. Kahit naman walang label, mahalaga sa akin ‘yun,” sabi ni Jake

Matanong nga kay Lovi ang ibinuking ni Jake, kaya pala may mga LQs sila at ang last ay sa pictorial ng Lihis, hindi sila nagpansinan at naunang umalis si Jake. Itinanggi ni Lovi ang LQ nilang ‘yun, pero mas naniniwala kami sa aming source.

Pero sabi ni Jake, friends na sila uli ni Lovi at ha­ngad niya ang maging masaya ito kung totoo man ang tungkol sa kanila ni Rocco Nacino. Hindi yata naniniwala si Jake na promo lang sa Akin Pa Rin Ang Bukas ang closeness nina Lovi at Rocco.

Nakausap si Jake sa presscon/launching ng RTL CBS Asia Entertainment Network sa pag-a-apoint sa Viva Communications, Inc. na maging Philippine representative for provincial distribution and airtime sales.

Kinumusta rin ng press kay Jake ang panliligaw niya kay Jessy Mendiola at ang karibal niyang si Sam Milby. Ayaw niyang madaliin si Jessy at handa siyang maghintay at kung si Sam ang pipiliin nito, tatanggapin niya ng maluwag sa puso.

Sa presscon ng Regal Entertainment movie na Status: It’s Complicated na showing sa November 6, tiyak na matatanong pa si Jake sa kanyang love life.

Aljur magkakaroon ng hot dance number

Fan pala ni Julie Anne San Jose si Aljur Abrenica dahil nang tanungin namin ang aktor ng guests sa kanyang Come and Get Me concert sa November 7 sa Music Museum at banggitin ang singer-actres, may pahabol itong “Sobrang hinahangaan ko si Julie Anne, kaya isa siya sa ni-request kong maging guest.”

Guest din si Rochelle Pangilinan at isang sensual, hot dance number ang kanilang gagawin. Kasama rin sa concert  si Vin Abrenica na kahit exclusive ta­lent ng TV5, walang makitang problema si Aljur dahil sa concert sila magsasama.

Ginusto rin niyang maging guest si Kris Bernal na kapareha niya sa Prinsesa ng Buhay Ko at isang sobrang nakakakilig na number ang kanilang ga­ga­win na ma­gugus­tuhan daw ng AlKris fans. Umaasa si Aljur na maiintindihan sila ng fans naman nila ni Kylie Padilla.

Sa tanong kung magta-topless siya sa concert, depende raw kung ire-request ng au­ience at nagbirong magma-macho dan­cing siya. Matagal nang plano ang concert ni Aljur at ngayon lang matutuloy, kaya kahit puyat sa taping, nag-i-effort pa rin siyang mag-rehearse para solid ang performance sa gabi ng concert.

Gary E. grabe ang love scene kay Charee

Ang taray-taray ng comment ni Gary Estrada na “I don’t f-----g know her” patungkol sa isang controversial personality na nagsasabog ng lagim ngayon sa mga katulad niyang politician. At malaki ang pa­sasalamat ng actor-politician na hindi niya kilala ang nasabing babae dahil hindi siya nasasabit sa kontrobersiya.

Isa si Gary sa politician na gusto ang pork barrel dahil malaki ang naitutulong nito. Nabigyan siya nina Senators Jinggoy Estrada at Bongbong Mar­cos ng three classrooms each sa distrito niya sa Quezon. Six classrooms naman ang naibigay ni Sen. Juan Ponce Enrile. Sabi nito, basta may check and balance lang, maganda ang napupuntahan ng pork barrel.

Samantala, pinuri ni Gary si Charee Pineda, kapareha niya sa Akin Pa Rin Ang Bukas dahil magaling na artista. May love scene at bed scene ang dalawa sa nasabing soap at pinuri nito si Gary dahil gentleman at hindi nag-take advantage.

Dance of the steel bars kasali sa Filmfest sa California

Hindi kami sure kung pang-exhibition o in competition ang Dance of the Steel Bars movie nina Dingdong Dantes, Joey Paras at Patrick Bergin na i-screen sa 2013 Santa Cruz Film Festival (SCFF) sa California. Naka-schedule ang screening sa November 10, 9:15pm., sa Pacific Arts Complex.

Wala pa ring feedback kung dadalo sina Dingdong at Joey na parehong busy. Ang una ay nagti-taping ng Genesis at ang huli ay nagti-taping ng Galema.

Dagdag na saya kay Joey ang mapanood ang pelikulang kasama siya sa isang filmfest abroad. Mas gaganahan itong mag-promote ng Bekikang na showing na bukas, October 23.