Operation Tabang Bohol!

Nasayud na kita unsay nahitabo niadtong Martes, October 15. Nakita na nato unsa ka dako ang danyos nga gibilin. Nasinati nato ang kabangis sa kinaiyahan. Nangurog kita, nalisang, ug nangluspad sa matag pagtay-og sa yuta gumikan sa aftershocks. Ang Bohol ang labihan nga naapektuhan. Daghang kinabuhi ang nakalas, mga balay nga nangatumpag ug mga pamilya nga nawad-an og pinuy-anan. Daghan ang giuhaw ug gigutom. Daghan ang nagpanawag og tabang. Unsa may atong tubag?

Sa nagkadaiyang social networking sites, ilabi na sa Facebook ug Twitter nagbaha ang positibong pagsanong sa panawagan, sa panginahanglanon og pagkaon, tubig ug uban pang panginahanglanon. Nagkadaiyang mga personalidad ug grupo ang nagpahigayon og relief operations. Unta, kita misanong, mitampo ug mihatag og tabang pinansyal man o material. Ang ABS-CBN, GMA-7, Basilica del Santo Niño, OAD sa Tabor Hill, ug ang Freeman Foundation  pipila lamang sa daghan kaayong kahugpungan nga nagpahigayon og relief operations.  Hinaot nga kita dili magpabuta bungol niining maong panginahanglanon ug pangaliyupo og tabang.

Base sa mga post sa Facebook sa atong kauban nga si Anna Maris Igpit (wala usa siya’y column kay busy kaayo sa relief operations), kinsa usa sa mga frontrunner sa grupong “Bangon Bohol”, makita ang labihang panginahanglanon sa tubig nga mainom ingon man pagkaon. May mga  apektadong lugar pa nga wala maadto gumikan kay walay kaagian sanglit nangaguba man ang kadalanan ug taytayan.

Mutabang na kita dear okRYANians! Siguro dili bug-at sa bulsa kun mukuot kita bisan og P20 o P50 gikan sa atong bulsa. Sa maong kantidad makapalit na ta ana og pipila ka buok noodles o sardinas. Timan-i nga ang ginagmay natong tampo kun matapok daghan na kaayo. Penitensya lang usa kita. Dili lang sa ta magpa-load bisan usa o duha lang ka adlaw aron aduna kitay ikatampo. Maayo gani kay kita maoy mutabang, dili kita maoy tabangonon. Kana pa lang dako na nga grasya bisan pa man sa atong nasinati nga kalamidad.

Go go go na ta dear okRYANians! Operation Tabang Bohol na ta!