Kris ninang ni Melai

CEBU, Philippines - Gibutyag ni Kris Aquino nga usa siya sa mahimong ninang sa umaabot nga kasal nila ni Jason Francisco ug Melissa “Melai” Cantiveros” didto sa General Santos City karong Disyembre. Ang anak sa TV host nga si James “Bimby” Yap Jr. mao usab ang ring bearer sa maong seremonya.

Elmo midepensa  sa inahan

Gihimakak ni Elmo Magalona nga kusog mubabag ang iyang inahan nga si  Pia Magalona sa nagkadaiya niya nga proyekto hinungdan nga dunay mga higayon nga nagmingaw ang iyang career. Gitataw ni Elmo nga dili malikayan nga makabalibad siya og proyekto kung ma-conflict kini sa uban niya nga schedule.

Mahugyaw ang viewers

Gibutyag ni Kim Chiu nga usa ka linahi nga istorya ang idalit sa umaabot nila nga serye ni Xian Lim sa ABS-CBN. Suma pa ni Kim nga gisuginlan na siya sa konsepto sa serye ug segurado siya nga mahugyaw niini ang viewers.

Alice dunay bag-ong inspirasyon

Giingong adunay bag-ong inspirasyon si Alice Dixson ug dako ang gap sa ilang edad. Nagdumili lang sa paghatag og dugang detalye ang aktres niini gumikan kay naka-focus siya karon sa pag-promote sa seryeng For Love or Money saTV5. 

Naunhan

Tsika pa ni Camarines Sur Governor Miguel Villafuerte nga malipayon siya alang kang Sarah Geronimo kinsa gidungog karon nga uyab ni Matteo Guidicelli. Kahinumduman nga nagplano niadto ni Villafuerte nga modiskarte sa pop princess.

Mike Tan gitangtang sa Katipunan

Giangkon ni Mike Tan nga sa niaging tuig pa siya gisaaran nga siya maoy modala   isip General Emilio Aguinaldo sa  historical docu-drama sa GMA 7 nga Katipunan busa nasagmuyo siya og maayo sa dihang wala siya mahinayon sa maong programa. Nahuwasan hinuon si Mike gumikan kay gipasaligan siya sa GMA-7 nga hatagan og laing proyekto.

Derrick, Charee ug Kristoffer gipasidunggan

Gipasidunggan sa bag-ohay lang nga Golden Globe Annual Awards for Business Excellence 2013 sila si   Derrick Monasterio,  Charee Pineda  ug Kristoffer Martin isip Filipino achievers. Ang tulo giisip nga dako og natampo sa entertainment industry ug sa susamang higayon, nihatag usab sila og oras sa pagserbisyo sa komunidad.