Miriam engaged na

CEBU, Philippines - Engaged na ang  beauty queen turned-actress nga si Miriam Quiambao ngadto sa boyfriend niya nga si Ardy Roberto kinsa usa ka speaker, author ug entrepreneur.

Ang proposal  nahitabo adtong Domingo sa buntag, October 6, kung diin gikunsabo ni Ardy ang ilang mga higala ug gisurpresa ang beauty queen  pinaagi sa pagdala og rosas ug banner nga dunay mensahe nga “Miriam, will you marry me.”

Gihulagway ni Miriam ang maong hitabo nga  “answered prayer” gumikan kay taud-taud na siya nga nangandoy nga makabaton og partner nga makauban niya sa tibouk niya nga kinabuhi.

Nag-post siya og hulagway sa Instagram ug duna kini  caption nga “ 1 John 4:18, There is no fear in love.”

Suma pa sa www.rappler.com, gihulagway sa suod sa higala sa duruha, ang kanhi beauty-queen nga si Joyce Burton Titulo, nga “whirlwind courtship” ang nahitabo tali nila ni Miriam ug Ardy.

Managsama nga ikaduha na kining kaminyuon para nila ni Miriam ug Ardy.

Tuig 2004 sa dihang gikasal si Miriam sa usa ka Italian businessman nga si Claudio Rondinelli apan nagbuwag sila human sa duha ka tuig nga panag-uban. Ang asawa usab ni Ardy mipanaw niadtong Enero gumikan sa balatian nga lupos.

Kahinumduman nga ang 38-year-old TV personality nga si Miriam maoy napili nga 1999 Miss Universe First Runner-up.

Best soap

Gibutyag ni Carla Abellana nga ang seryeng “My Husband’s Lover” maoy giisip niya pagka-karon nga “best soap” nga iyang nabuhat. Suma pa ni Carla nga bug-at nga emosyon ang gitagana niya sa maong serye.

Abra gitabangan ni Jason

Ang pag-produce na pud og mga konsyerto maoy tirada karon sa aktor nga si Jason Abalos. Nasayran nga usa si Jason sa mga producer sa bag-ohay lang nga concert sa rapper nga si Abra.

Aple.de Ap miduaw sa Zamboanga

Miduaw sa Zamboanga City ang international singer nga si Apl.de.Ap ug nitabang kini sa rehabilitasyon sa  siyudad nga naapektohan sa gubat  sa miaging buwan tali sa  militar ug sa mga miyembro sa Moro National Liberation Front (MNLF).

Willie nanghatag og relief goods

Nang-apod apod si Willie Revillame og relief goods  sa mga naapektohan sa gubat sa Zamboanga City. Gisakyan ni Willie ang iyang private plane paingon sa maong dapit.

OTJ gilinyahan sa US

Gilinyahan sa mga Pinoy didto sa  Amerika ang special screening sa pelikulang  On the Job. Gibidahan ang maong pelikula nila ni  Piolo Pascual, Gerald Anderson,ug Joel Torre

Special guests

Gipadayag ni Martin Nieverra nga ang kanhi niya partner nga si Pops Fernandez ug ang ilang mga anak maoy special guests sa umaabot niya nga 3D concert sunod buwan sa Smart Coliseum.

Manglarga karong adlawa

Karong adlawa molarga ang kanhi mag-uyab nga sila si Cristine Reyes ug Derek Ramsay paingon sa Hawaii alang sa ilang show sa maong dapit. “I don‘t know what‘s going to happen in the future,” nagkanayon si Derek.

Sidlak TV5!

Giingong nagplano karon ang TV5 nga magpatabang sa usa ka sikat nga advertising firm alang sa pagpasikat og maayo sa ilang network.

Sebastian mitingog na

Gitataw ni Sebastian Castro nga wala gyud siya’y sex video busa hugtanon niya nga gihimakak ang report nga matud pa duna sila’y video scandal ni Enchong Dee.