Shooting sa GTB gipahunong!

CEBU, Philippines - Giprotestahan matud pa sa De La Salle Dasmariñas Student Council ang shooting sa ABS-CBN teleserye nga “Got To Believe” nga gibituonan nila ni Daniel Padilla ug Kathryn Bernardo. Kini kun sabton ang post sa usa ka ginganlan og Jheng Sakay ug gipatik sa www.fashionpulis.com kagahapon. Matud ni Sakay nga ang wala pag-shooting sa maong teleserye didto sa ilang tunghaan adtong Biyernes nagpasabot nga gidungog sa kadagkuan sa ilang eskuylahan ang panawagan sa mga estudyante.

Andam sa love scene

Andam matud pa sila si Jason Abalos ug Jessy Mendiola nga muhimo og love scene kun ugaling mao kini pangayuon sa script ug ipabuhat sa director nila. Si Jessy ug Jason, kauban si Jake Cuenca maoy mga bida sa Pinoy version sa sikat nga Mexican telenovela ni Thalia kaniadto, ang Maria Mercedes nga isalida na sa ABS-CBN sa primetime human sa Got To Believe.

Jamiel Ventosa winner

Ang pambato sa Sta. Rosa, Laguna nga si Jamiel Ventosa maoy midaog isip Manhunt International 2013 ug maoy representante sa nasud sa Manhunt International 2014 pageant didto sa Beijing, China karong May 2014. Ang 18-anyos nga si Ventosa mipildi sa 19 ka mga kandidato alang sa maong titulo adtong Biyernes sa gabii didto sa kaulohan. Si June Macasaet nga maoy midaog sa maong titulo sa milabay nga tuig ang kasamtangang naghupot sa international title niini.

Ryan pasok sa MHL

Pasok si Ryan Agoncillo isip guest star sa finale week sa toprating GMA-7 soap “My Husband’s Lover” ug nag-taping na siya adtong Biyernes. Matud pa ni Ryan nga gamay ra kaayo ang iyang partisipasyon sa serye apan dako kaayo og impact ngadto sa kinabuhi sa tulo ka mga bida: Eric, Lally ug Vincent. Asoy pa niya, bisag nagkabuang ang iyang schedule gipaningkamutan gayud sa iyang manager nga makalugwa siya sa taping sa maong serye gumikan kay garbo niya nga malakip niini.

Basher ni KC taga showbiz!

Gikumpirma ni Sharon Cuneta nga taga-showbiz ang labing bag-ong basher ni KC Concepcion apan dili artista. Ang nakasakit lamang matud pa kay kaila nilang duruha ug maayo nila sa atubang apan inig talikod diay gilibak sila.

Marian heavy drama ang project

Gikatakdang subling makigtagbo si Marian Rivera sa mga kadagkuan sa GMA-7 karong semanaha aron ipresenta ngadto kaniya ang proyekto nga iyang himuon para sa network isip tipik sa bag-ong kontrata nga iyang gipirmahan adtong Agosto. Suma pa ni Marian nga heavy drama ang umaabot niya nga proyekto ug may gihatag na nga ngalan sa iyang leading man, nga kun maaprobahan, unang higayon niya nga mapares.

Hubo Ronnie!

Magpa-sexy na ang balladeer nga si Ronnie Liang, pinaagi sa pelikula nga ubos sa direksyon ni Elwood Perez. Ang singer sa sikat kaayo nga kantang “Ngiti” maoy bida sa pelikula nga giulohan og “ Object of Desire.”