Thank You Megan Young!

Niadtong niaging Sabado, dakonatong garbo nga ang nakoronahang labing maanyag nga dalaga sa tibuok kalibutan usa ka Pinay. Siya kay pamilyar natong tanan kay pirmi nato makita sa telebisyon, usa ka artista ug maayo nga tv host. Si Megan Lynne Young, 23, ang unang Pilipinang gikoronahang Miss World didto sa Bali, Indonesia.

Una nakong nailaila si Megan niadtong  2009, kung diin nag host ming duha sa Mr. Cebu. Simple, walay arte, hilumon ug brayt nga babaye. Kahinumdom ko ako pa siyang gipangutana kung interesado ba siyang moapil og beauty pageant, iyang tubag dili pa kuno, basin daw sa mga musunod nga tuig. Sayo niining tuiga, nigawas na ang pangalan ni Megan sa mga pageant websites ug forums nga moapil kuno sa Bb. Pilipinas. Siya giatngan sa mga pageant fans sa screening pero walay Megan nga niabot. Wala kini nipadayon og screen. Pero niadtong screening sa Miss World-Philippines, nahugyaw na lang ang tanan sa dihang nitungha kini, andam ug na- transform gikan sa usa ka pa cute nga artista into a regal beauty queen. Pag Miss World-Philippines coronation night, klaro na kaayo nga makoronahan si Megan. Siya lamang ang andam na kaayo mo compete sa Bali kung diin naa lang siya’y pila ka semana nga pagpangandam.

Nagsunod ako sa biyahe ug inadlaw kalihukan ni Megan sa Ms. World. Positibo kaayo ko nga siya motapos og taas nga pwesto. Mao nga pag pageant night, ako gyud kining giatngan sa livestreaming online. Ug wala ako nasipyat, siya gayud ang nakoronahan. Dako kaayong garbo natong mga Pilipino ang kadaugan ni Megan. Taliwala sa kontrobersiya, problema ug mga paghagit nga giatubang sa atong nasud karon, naghatag kini og paglaum ug kalipay kanatong mga Pilipino, nga kita world- class gayud. Ang beauty pageant susama sa Miss World, dili lamang kini indigay lang sa pagwapa ug pa seksihay, usa kini ka entablado kung diin hatagan og higayon ang lain- laing nasod sa pagpakita sa lain laing kultura, tradisyon ug katahom sa ilang mga lugar. Ang Miss World tagline nga “Beauty with a Purpose” nagsulti ug nagpakita nga ang kaanyag sa usa ka tawo dapat gamiton sa maayong tumong. Klaro kini sa mga charity works ug projects sa organisasyon ug sa mga lain laing mga programa matag kandidata. Usa ako sa mga nag- representar sa Pilipinas ug namasin nga mauli ang idlas nga korona ug dugay na gyud natong ganahan maangkon. Mao nga ang kadaugan ni Megan, dili lamang kadaugan niya ug sa nasud, gikab-ot usab niya ang damgo namong mga niaging beauty queens ug pageant fans. Mao nga Megan Young, daghan kaayong salamat sa pagmatuod sa among mga damgo. Mabuhi ka! Mabuhi ang kaanyag sa Pinay!