Mr. Bean, bubungad sa umaga

MANILA, Philippines - Nagbabalik ang kwela at makulit na si Mr. Bean kasama pa ang bagong live action series na Power Rangers RPM at adventure cartoon na Jackie Chan’s Fantasia sa bagong Team Animazing ng ABS-CBN.

Panoorin ang adventures at misadventures ng isa sa pinakaminahal na karakter sa buong mundo na si Mr. Bean at tunghayan kung paano niya lulutasin ang pang-araw araw niyang mga suliranin sa naiiba at nakakatawang paraan. Hindi man nagsasalita ang papel na ginagampanan ni Rowan Atkinson ay tiyak hahagalpak pa rin kayo sa kakatawa dahil sa kanyang kilos at itsura.

Ngunit bago ang katatawanan, sumabak muna sa bakbakan kasama ang matatapang na RPM rangers ng Power Rangers RPM sa ganap na 9 AM sa kanilang pagligtas sa mundo mula sa tuluyang kapahamakan dulot ng mapanirang Venjix computer virus. Nasakop na ng virus ang karamihan sa mga siyudad at sa Power Rangers na lang nakasalalay ang kaligtasan ng nag-iisang siyudad na ligtas - ang Corinth. Magtagumpay kaya sila sa misyon nila o tuluyan ng manaig ang pwersa ng Venjix?

 Samantala, sasabak naman sa isang maaksyong paglalakbay si Jackie Chan at ang kanyang mga kaibigan para hanapin ang pitong kayamanan ng mundo na sabay sabay nawala kasama ang kilalang scientist na si Dr Wong sa  Jackie Chan’s Fantasia, 9:25 AM. Kinakailangang makuha nina Jackie ang nawawalang mga kayamanan bago ito mapasakamay ng kampon ng kasamaan.