Press Freedom Week

Sinugdanan sa pagsaulog sa mga sakop sa prensa [media], sa Press Freedom Week niadtong Domingo, Septiyembre 15, nga naatol pod nga birthday sa editor in-chief sa The Freeman, sir Jerry Tudag. Mao tingali ‘to ang hinungdan nganong, gipasaylo na lang siya namo. Bisa’g wa makakuyog sa parade, ug hangtod na sa misa ug kalingawan human sa parade. Bisan gani ako, wa man makakuyog sa parade. Kay kinahanglan lagi nga sa sayo sa  buntag, naa pa gyod ko sa balay, aron dawaton ang mga newspapers nga ihatod sa gamay nakong newsstand. So didto na ko sa misa ug kalingawan makatambong.

Hinungdan pod, nga giandam na gyod nako ang akong kaugalingon, nga dili makakaon. Nagtagana na lang ko’g kwarta. Aron kun gutmon, makakaon sa duol nga mga karenderya duol sa CCTN, Channel 47 diin, didto duol ang kalingawan. Mao pod ang hinungdan nganong mas nasayo ko’g abot sa venue, kay sa mga nanguyog sa parade. Mao say hinungdan nga sa dihang gigutom na unta ko, mogawas na unta ko, aron mokaon. Apan sa dayon nakong gawas, gisugat ko nilang Andy Padigos [ug sa iyang sidekick, ambot nganong duna na ni siya’y sidekick], ug ni sir Jess Padin, ug gitunolan ko’g pagkaon.

Kay gigutom man ko, wa gyod ko mangutana’g pakan-on ba ang wa mokuyog sa parade. Mga pila na sad ka minutos, nag-distribute na sad sila si Sir Jess og mga snacks. Wa gihapon ko moreklamo. Kay lami man ang gipanghatag nga snacks. Misamot nga wa gyod ko moreklamo sa dihang nag-distribute na sila’g mga pagkaon para sa paniudto kay mas daghan, ug mas lamiang mga pagkaon ang giapod-apod.

Grasya, balibaran? Total, wa man pod sila magsulti, hasta sila’s mam Connie Tolentino, Divine Sanchez Hizon Ngujo ug uban pang mga sakop sa HRD, nga dili makakaon ang wa mokuyog sa parade. Wa tingali sila’y gipinig. So, nauli kong, gawas nga busog, naka-bring house pa gyod, kay daghan ma’g sobra sa ilang gipanghatag. Busa, hasta ang akong manghod, ang akong alalay nga si Val Relatado, ug ang iro sa akong manghod nga si Bonbon, wa gyod gutma. Wa gyo’y gutom.