“Dreams Do Come True”

Kagahapon, September 21, mao ang ika-73 nga kasumaran sa pagkatukod sa dyRC 648khz, ang labing unang sibyaanan sa Sugbo, apan gisaulog namo adtong Biyernes. Lakbit lang, singko anyos ko sa Pilar, Camotes dihang nakaila ko og unsay radyo ug kana gumikan sa dyRC. Maminaw na gyud ko og balita niadtong panahona  sa maong sibyaanan,  ug kanunay nakong atangan ang "We We Jamboree"  matag Domingo.

Pero katong nag-internship nako para sa akong kurso nga Mass Communications, sa Bantay Radyo ko mitekang kay since high school pa lang volunteer reporter na man ko nila. Pero naghandum gyud ko nga ugma damlag makatrabaho gyud ko og dyRC, usa sa mga rason man gani kini nganong ang maong kurso akong gikuha. Apan, nanirado ang dyRC, usa ka buwan sa dili pa ko mu-graduate sa college adtong October 99. Naa pa gyud ko sa Bantay Radyo adtong tungora, dihang gipahibawo nga bag-ong management na ang mu-takeover ug gisugo ko ni Roel Ponce Cabañero, kinsa nagsugod usab isip reporter sa dyRC kaniadto, pagpangayo'g reaksyon sa mga personalidad kabahin sa pagpanamilit na sa maong estasyon. Nag-dial ko sa telepono nga bug-at akong dughan kay naguol ko nga dili na ko makatrabaho og dyRC kay nanirado na.

Milungtad ko og usa ka tuig sa Bantay Radyo ug nanimpad ko sa The Freeman Newspaper because I wanted to learn more and push myself more, adtong 2001. Lima ko katuig nga defense beat reporter hangtud nga na-burnout ko ug dihang gitanyagan ko sa president sa Star Group of Publications sir Miguel Belmonte aron maoy muduma sa entertainment section sa Banat News adtong December 14, 2005, misugot gyud ko dayon. January 1, 2006 ko dihang milingkod isip entertainment editor, ug paglabay sa lima ka buwan, gitanyagan ko ni Fred Languido aron magprograma sa dyLA. Misugot ko apan nakulbaan ko gumikan kay taod-taod na pud nga wala nako makatingog sa radyo. May 15, 2006 nahimugso ang okRYAN sa dyLA0909.

Milungtad ko og upat ka tuig ug upat ka buwan, dihang wa nako damha nga gitanyagan ko sa station manager sa dyRC Junino Bonito Padilla nga magprograma sa dyRC. Naglibog ko gumikan kay maayo man kaayo akong relasyon sa management sa dyLA, wa gyud koy masulti nga dili maayo sa tanang tawo sa maong estasyon.  Giampoan nako og maayo ang akong desisyon, apan sa katapusan mipatigbabaw gyud ang kamatuoran nga sa daghang katuigan naghandom ko nga makatrabaho sa dyRC. Nan kay anaa na man sa akong mga kamot ang katumanan sa maong pangandoy, mibiya ko sa dyLA ug mitingog sa dyRC niadtong September 21, 2010.

Dreams do come true my dear okRYANians. Hayan dili diha-diha dayon dunggon sa Kahitas-an apan mahitabo gayud kini sa tukmang panahon. Pwes padayon sa pagpangandoy ug ayaw pagpakawala sa paglaom. Labaw sa tanan, isalig ang tanan sa Ginoo. Pakpak!

Magdungog gihapon kita sa dyRC..Radyo Calungsod 648kHZ, 10am to 12noon, Mondays to Saturdays. Pangitaa ko sa Facebook: [email protected]