Sakang at piki ‘di na kailangang paopera

MANILA, Philippines - Sa Gandang Ricky Reyes Todo Na Toh (GRR TNT) ngayong Sabado alas-nuwebe ng umaga sa GMA News TV ay itatampok ang isang Korean cli­nic sa Makati City. Dito’y may Yakson Myunga proseso na makakapagtuwid ng mga binting sakang o piki na ‘di kailangang gamitan ng operasyon.

Para rin sa katawan at isipa’y ipapayo ni Mader Ricky ang yoga. Dadalhin niya tayo sa isang clinic na dinarayo ng mga nagnanais maging malusog at manatiling maganda ang hubog ng katawan.

Para sa mga dumaraing ng pagod, depresyon at kalungkutan ay dadalhin tayo ng GRR TNT crew sa isang retreat house sa Tagaytay. Naghahandog ito ng pambihira at komportableng pahingahan, mga gawaing nakakarelaks at ang paglalapit sa kalikasan sa mga taong naging abala sa kanilang mga gawain sa magulong lungsod.

Para mawala ang pagkainip ay isang Pinay ang nahilig sa pagbuo ng iba’t ibang puzzle. Bisita ang babae sa show at ipakikita niya ang kanyang Puzzle Mansion na binigyan-parangal ng Guiness Book of World Records. Hahanga kayo sa mga puzzle na ginawa niya at naka-display. Ang mga ito ang lumutas ng problema niyang pagsasawa at pagkainip.

Siyempre pa, ang ehersisyo ay dapat sabayan ng wastong pagkain. Dada­yuhin natin ang Cucina ni Bunso para sa segment na “Cooking with Bunso” kung saan idedemo ni Chef Mel Martinez ang masasarap at masusustansiyang pagkaing siya mismo ang nagluluto.