Love God and do what you will!

CEBU, Philippines - Singko-anyos siya dihang sa labing unang higayon gipatungtong siya sa entablado aron mukanta. Usa kadto ka programa sa ilang barangay. Una niini, patindugon matud pa sila sa ilang mga ginikanan sa ilang sala matag human og panihapon aron pakantahon. Ingon niini ang gidak-an og buot sa Rector sa Basilica del Santo Niño nga si Fr. Jonas didto sa iyang yutang natawhan sa Loon, Bohol. Gikan sa maong kasinatian, karon madungog na si Fr. Jonas nga mukanta sa kasagaran sa iyang mga wali nga makapahugyaw og maayo sa mga musimba. Apan dili kay kutob ra siya sa pagkanta panahon sa iyang mga misa, sanglit nakagama na siya og ubay-ubay nga albums ug naka duet na ang pipila sa mga inila nga mang-aawit sa nasud.

“Aduna na ako’y lima ka recording album. Ang tulo, ginamit pa ang casette tapes. Niadtong early 90’s pa kini nahimo. Nakauban nako ang mga Seminaristang Agustino sa first two albums (Tunog Agustino ug Sa’yo Iaalay). Ang ikatulo gimugna sa pari nga OAR (Fr. Jorge Peligro), Usa ko sa mga interpreters. Ang ikaupat maoy akong solo album (If I Ever Sing Another Song) na-release in 1999 .Ang maong kanta nahimong hit song sa Iloilo apan niadtong tuiga nagpreparar na ko sa akong post-graduate studies sa Rome, Italy. Busa, hamubo lang nga panahon ang pagpatukar niini sa FM stations. Niadtong milabay nga tuig, naka-release mi og bag-ong album didto sa University of San Agustin, Iloilo City. Nagsulod kini halos sa akong mga original compositions with the cover title “One In A Song.” Mao lang kini ang available sa pagkakaron. Mo-order mi og balik sa University of San Agustin aron ibaligya namo sa tindahan sa Basilica Minore del Sto. Niño, Cebu City.”

Nindot ug tibuok ang tingog ni Fr. Jonas. Gani sa bag-ohay pa lamang gipahigayon nga Huniño Songwriting Contest, nahugyaw ang kadaghanan dihang nakig-duet siya kang kanhi Pinoy Dream Academy scholar Apple Abarguez sa kantang “Please Be Careful With My Heart.” Labaw nga nahugyaw ang mga nanan-aw dihang gisumpay-sumpay niya ang tanang mga kanta nga iyang paborito.

Paglabay sa pipila ka adlaw,  si Fr. Mejares ang misaulog sa santos nga misa sa pagbukas sa Cebu Broadcaster’s Month diha sa Capitol Social Hall. Wala siya mikanta atol sa iyang wali, apan mihalad siya og duha ka mga awit sa dayon na niyang human, dungan sa pagkomedya nga hayan dili na siya dapiton pag-usab sa mga magsisibya, kun ugaling dili sila makauyon sa iyang tingog. Apan sagol pakpak ug abiba ang nadawat ni Fr. Jonas gikan sa mga magsisibya sa Sugbo, pasabot nga labaw pa sa nauyonan ang iyang tingog. Pwes, atong ilailahon og maayo si Fr. Jonas, pinaagi niining duha ka bahin nga artikulo:

BNH: Palihug suginli kami unsa imong kasinatian growing up? Kumusta ang imong pagka bata?

Fr. Jonas: Nagtubo ako sa usa ka pamilya nga adunay dakong pagtahud sa Diyos. Mahilig ko sa musika ug sports, labi na ang game of basketball.

BNH: Pila kamo ka magsuon? Unsay panginabuhian sa imong mga ginikanan?

Fr. Jonas: Aduna ako’y usa ka igsoon nga lalake (kamagulangan namo), ug duha ka babaye (mga manghud na nako). Sa gagmay pa kaming bata, ang among amahan gipiyalan pagdala og usa ka dako nga panagatan. Samtang ang among inahan, niadtong higayona, maoy nag-asikaso sa panginahanglan sa balay. Miabot ang higayon sa ilang pagkaginikanan nga nanginabuhi sab sila pinaagi sa abot sa usa ka “restaurant” sa among lungsod (Loon, Bohol). Diha’y punto, kabahin sa akong kinabuhi (mga 11 anyos ako) nga gikuha ko sa akong Lola aron mouban kaniya kay miadto man ang akong Lolo sa USA ug mipuyo didto og pipila ka tuig. Nagkauban mi sa akong Lola hangtud nga miabot ang panahon nga misulod ako sa seminaryo.

BNH: Unsay nakapadasig nimo nga magpari? Nganong sa OSA man?

Fr. Jonas: Ang akong Lola maoy instrumento sa akong bokasyon, tinabangan sa akong duha ka uyuan nga pari nga pareho kanako Agustino sab. Sila ang hinungdan kun ngano nga sa Order of St. Augustine ako misulod.

BNH:   Palihug paghulagway sa imong kaugalingon. Makamao ba nga masuko ang usa ka Fr. Jonas, luyo sa imong mapahiyumon nga panagway?

Fr. Jonas: Usa lang ako ka yano nga pagkatawo nga gitudluan sa maayong pamatasan sa akong mga ginikanan ug apohan. Determinado sa kinabuhi ug andam nga moatubang sa nagkalain-laing matang sa pagsuway. Talagsa ra gyud kong masuko, pero kana kung adunay klaro nga hinungdan ug kun kini nahisukwahi sa akong gibarugan nga prinsipyo.

Si Padre ug ang Musika

BNH: Kaliwat ba gayud ninyo ang mga nindot og tingog? Ig unsa nimo ang singer nga si Luke Mejares?

Fr. Jonas: Ang akong mga ginikanan maoy unang nagtudlo kanako sa pagkanta. Ang akong amahan maantigong mogitara ug motukar sa electronic organ. Kaming tanan sa pamilya gigasahan og maayong tingog sa pagkanta, pero ang pinakamaayo sa “musical intsruments” ang among kamagulangan. Nakat-on siyang maggitara sa edad nga pito ka tuig. Ang paryente ni Tatay nga si Uncle Nonoy Mejares maoy nagpadako ni Luke Mejares.

BNH: Unsa ang kanta nga maoy labing una nimong nakat-onan? Unsa nga kanta ang para nimo makapadasig nimo sa higayon nga ikaw adunay suliran kaniadto ug karon? Ngano man?

Fr. Jonas: “Rain” gently falls... ang unang kanta nga akong nakat-unan. Pero ang pinakapaborito nako kaniadto ug karon nga makapadasig kanako sa higayon nga duna ako’y suliran mao ang “ You Light Up My Life.” Undanon kaayo ang kanta nga nagdala og kahayag og paglaum, Haum usab ang musika sa iyang mga pulong nga nahipatik.

BNH: Unsay kanta nga labing una nimong nasuwat? Pila na tanan ka kanta ang imong nahimo? Unsay imong labing ganahan?

Fr. Jonas: Sa ubay ubay nang kanta nga akong nasuwat, dili na gyud ko makahinumdum kung unsay pinakauna.. Lisud sab ning magkatiguwang ta da... hehehehehe... ang pinakapaborito nako mao ang “Sa’Yo Iaalay”. Ako kining nasuwat sa seminaryo sa dihang galibog ko kung mopadayon pa ba ko sa akong tinguha nga magpari.

BNH: Nakauban na nimo og concert sila si Coco Martin, Sitti  kinsa pa imong gihandom nga makauban o maka duet?

Fr. Jonas:  Sa grasya sa Diyos, akong nakauban sa konsiyerto si Jose Marie Chan, Jed Madela, Yeng Constantino, Tata Villaruel. Luke Mejares. Naka-duet mi ni Sheryn Regis ug Apple Abarquez tungod sa Hunino. Akong gihandum nga maka-duet si Vina Morales, Lea Salonga, Angeline Quinto ug Anne Curtiz... hehehehehe..

Atangi ugma puhon ang sumpay sa pakighinabi sa BNH kang Fr. Jonas diin iyang gibatbat ang mga kabag-ohan sa Basilica ug ang mga plano pa nila alang niini.