Perfect Moment

Ryzza Mae Dizon, Mutya Johanna Datul ug Tom Rodriguez! Mga personalidad nga madaugon karong mga panahona. Si Ryzza adunay kaugalingong programa  ang The Ryzza Mae Show sa GMA-7 Lunes hangtud Biyernes sa dili pa mag Eat Bulaga ug naghupot sa titulo nga “youngest talk show host in the country” sa edad nga otso anyos. Si Mutya bag-o lamang nakoronahan nga Miss Supranational 2013 didto sa Belarus, ang maoy labing unang Pinay nga nakalangkat sa maong korona gikan sa lima ka tuig pa lamang nga international pageant.  Si Tom labihang sikata karon gumikan sa kontrobersyal ug toprating niya nga teleserye sa GMA-7 primetime, ang My Husband’s Lover.

Apan silang tulo wala dayon miabot sa maong dapit nga ilang nahimutangan karon. Si Ryzza miapil sa Wowowillie sa milabay nga tuig sa usa ka segment diin patag-anon ang contestant sa title sa kanta, apan wala siya katag-an. Sanglit nagtuo ang iyang inahan nga kun makadaog ang iyang anak sa usa ka pa-contest sa television , dako kini og ikatabang sa ilang kawad-on, gipaapil niya kini sa   Little Miss  Philippines sa Eat Bulaga. Apan natagak si Ryzza sa elimination round ug labihang hilak kay ganahan gayud siya mag-artista ug gibuhat matud pa niya ang tanan. Apan nabadlis na ang iyang kapalaran ug gitawagan si Ryzza sa Eat Bulaga aron paapilon sa wild card edition sa nahisgutang indigay, mibalik siya and the rest is history.

Si Tom Rodriguez, taod-taod pud nga nagpaabot nga mahatagan og break sa industriya sukad siya nasulod sa showbiz niadtong 2009 isip usa sa mga housemates sa Pinoy Big Brother. Nasulod siya sa Star Magic  ug nahatagan og ginagmay nga roles sa nagkadaiyang teleserye. Sa YES Magazine September issue, gisugilon ni Tom nga labihan sa kalisud nga iyang nasinati to the point nga maghunahuna siya kun duna pa ba siya’y makaon sa sunod adlaw. Niadtong tungura matud pa nalig-on ang iyang pagtuo sa Kahitas-an. Ug niadtong 2011 gidungog ang iyang pag-ampo dihang gihatagan siya og project sa TV5 nga ang talent fee matud pa triple sa iyang gidawat sa ABS-CBN, unya nalakip siya sa book 2 sa Angelito: Batang Ama ug sa remake sa movie nga ‘Temptation Island.”  Ug sa milabay nga tuig nasulod siya sa sikat kaayo nga teleserye sa ABS-CBN, Be Careful With Heart and finally, nadawat siya sa audition sa My Husband’s Lover.

Si Mutya misalmot sa Mr. and Miss Olive C Campus Model niadtong 2011 ug wala siya manimaho, sanglit matud pa sa tagdumala sa maong indigay, ang Creworks Asia, daot pa ang nahisgutan. Katigi niya adtong tuiga ang Sugbuanong si Muriel Orais nga maoy narayna. Pagka sunod tuig misalmot siya sa Mutya ng Pilipinas ug mitapos siya isip finalist. Karong tuiga misalmot siya sa Bb. Pilipinas Gold ug gikoronahan isip Bb. Pilipinas Supranational human usab siya napili nga Bb.  Photogenic ug Bb. Best in Evening Gown. The rest is history!

Ang mensahe dear okRYANians simple ra kaayo. Kun mapalpak ka kausa, kaduha o bisan katulo, ayaw pagpakawala sa paglaum ug ayaw paghunong pagpanimpad kay muabot ra gayud ang tukmang panahon para kanimo. Dugang pa niana, sa higayun nga mapakyas ka, ayaw kahiubos sa Ginoo, hinunua mas pahugti pa ang imong pagtuo. There is a perfect moment for each one of us, in God’s time! Pakpak!