Lauren nataypan ni Alden

CEBU, Philippines - Gibutyag ni Alden Richards nga temporaryong ihunong ang tandem nila ni Louise delos Reyes ilabi na nga nahuman na ang serye nila nga Mundo Mo’y Akin kagabii. Suma pa ni Alden nga hatagan sila sa GMA-7 og lain na pud nga kapares sa telebisyon.  Kung si Alden ang pasultihon, target niya nga si Lauren Young ang sunod niya nga maka-loveteam.

Gladys mosukol

Gibutyag ni Gladys Guevarra nga iyaha gyud nga atubangon  ang kaso  batok kaniya nga gipasaka sa iyang ex-boyfriend nga si Jojo Diamse . Kahinumduman nga nidangop si Jojo sa Quezon City –Regional Trial Court niadtong Huwebes ug gipasakaan niya ang singer og kasong attempted murder, grave oral defamation ug grave coercion. Suma pa ni Jojo nga nidangop na siya sa korte gumikan sa pagpanulong, pagmaoy ug ang pagsuway ni Gladys og ligis kaniya.

Raymart nag-andam og tubag

Nagpakahilom lang si Raymart Santiago sa mga negatibong komento nga gisabwag sa iyang asawa nga si Claudine Barretto batok kaniya. Giklaro hinuon sa aktor nga kung dili siya makaagwanta, dili gyud siya maglipod-lipod sa pagtingog ilabi na nga duna na siya’y giandam nga mga tubag.

Prayoridad ang anak

Nagkatawa nga gibutyag ni Marco Alcaraz nga silang duha gyud sa iyang asawa nga si Lara Quigaman ang nagpuli-puli og bantay sa ilang anak. Suma pa ni Marco nga usahay na lang sila nga mag-date ni Lara gumikan kay prayoridad nila ang pag-atiman sa ilang anak.

Simple ang show

Napuno sa mga pagdayeg si Marian Rivera gumikan kay dili kini magbitbit og mga assistant sa higayon nga mosulod siya og mga kan-anan. Gusto sa aktres nga masinati og balik nga mokaon nga wala’y nagbantay kaniya.

Jose mag-inusara

Mag-inusara na lang si Jose Manalo sa iyang show karong gabii sa Zirkoh Comedy Bar  gumikan kay padayon nga dili mopatim-aw sa publiko ang partner niya sa maong  raket nga si Wally Bayola. Padayon nga nikatap ang video scandal ni Wally uban ni Yosh Rivera hinungdan nga wala pa kini nipatim-aw.

Kasal na lang ang kuwang

Ang mga ginikanan ni  Toni Gonzaga nga sila si Crisanta ug Carlito Gonzaga dakong  uyon sa relasyon sa ilang anak ngadto kang direk Paul Soriano. Suma pa ni Mommy Crisanta nga gusto niya nga si Paul ang mahimo niya nga son-in-law.

First time

Sa labing unang higayon, adunay kaugalingong Christmas album si Jamie Rivera. Ang maong album gi-release sa Star Records ug nagtangag sa titulo nga "My Christmas Gift. Nailhan si Jamie sa kadaghanan isip "Inspirational Diva” sa Pilipinas.  (Sanden J. Anadia)