Pagtungas sa Down To Mars!

CEBU, Philippines - Masaypan nga K-Pop group, apan ang tinuod, kasagaran kanila ang dugong Pinoy ug gipasigarbo nila nga duna sila’y orihinal nga mga kanta.

Ang grupo nga Down To Mars nga gidumala sa GMA Artist Center nitikang dili pa lang dugay dinhi sa Cebu ug kini naglangkob  nila ni    Kenji Chua Jang Amparna, Kiro Rivera, Daisuke Hagihara ug Jeongwon Song.

Ang maong grupo gilangkuban og  Pinoy apan half sila nga Japanese, Chinese ug  Korean, apan ang pinulongan sa Pilipinas maoy ilang gigamit sanglit dinhi na man sila nagdako.

Suma  pa ni Daisuke  nga managhigala na sila daan sa wala pa nahulma ang ilang grupo ug susama sila nga dunay talento sa pagkanta ug sayaw.

Nadtong 2011, adunay naka-discover kanila sanglit ang uban nila mga sakop aktibo na usab sa modeling.

“Maraming nagsabi na K-Pop daw kami, siyempre nakakataba sa puso, pero proud po ang grupo namin na kami ay galing sa Pilipinas,” matud pa ni Daisuke.

Gipili nila ang pangalan nga “Down To Mars” gumikan kay gibase nila kini sa “Down to Earth” nga nagpasabot nga mapaubsanon silang tanan ug ilang gipasalig sa ilang fans nga magpabilin ang maayo nila nga batasan.

Gisaysay ni Daisuke nga kung dili maayo ang batasan sa usa ka performer sigurado nga dali ra kaayo kining malawos ug mawagtang sa industriya.

“Kung may problema sa attitude, paano ka magugustohan sa mga taong tutulong sana sayo?,” hirit pa niya.

 Usa sa dili makalimtan sa Down To Mars ang pag-perform nila sa World Expo atol sa National Day of Korea sa Yeosu, South Korea sa miaging tuig.

Matud pa ni Daisuke nga samtang nagpadulong sila sa venue sa maong event, adunay mga babaye ang nagsunod-sunod kanila ug nasuta nila nga gusto ra diay kini magpahulagway kanila.

“Akala kasi nila na K-Pop kami,  dahil daw sa mga hitsura namin. Nakakatuwa ang experience na yun. Malaking karangalan para sa amin na mag-perform sa World Expo dahil ang Department of Tourism ang nagpili sa amin para mag-perform doon sa Korea bilang representative ng Pilipinas,” dugang pa ni Daisuke.

Ang laing sakop sa Down To Mars nga si Jeongwon nibutyag nga gumikan sa ilang kasuod, ilaha nga gipaningkamotan nga dili gyud sila mag-away aron dili maamong ang grupo.

“Sa iisang bahay lang kami tumitira, seguro kung may awayan, dahil mag-aagawan sa banyo, hahaha. Siyempre naman, bawal talaga ang mag-away dito. Kung merong kunting misunderstanding, aayosin naman kaagad para hindi lumalaki ang hidwaan,” matud pa ni Jeongwon.

Pagkakaron, walay  ka-kompetensya ang Down To Mars dinhi sa Pilipinas gumikan kay nahilom na man ang grupong XLR8.

Ang Down To Mars maoy nagpasikat sa awit nga My Everything, Oh We Are, Fool Paradise, Fly5, ug Nandito Lang.

Tsika pa sa laing sakop niini nga si Kenji nga magpadayon gihapon ang pagmugna nila og mga kanta nga mahimong patok sa publiko.

Dugang pa ni Kenji nga bukas usab siya ug ang iyang mga kaubanan nga mosulod sa acting world kung duna sila’y mga offer nga madawat.

Gumikan kay susama sila og mga interest, dali ra kaayo ang pagmugna og mga kanta.

Nagkanayon si Kenji nga magsuon na ang trato nila sa usa’g-usa gani, magtinambagay sila sa tagsa-tagsa nila ka mga problema.

Usa sa nakat-onan ni Kenji sa pagkalakip niya sa Down to Mars mao ang paghatag og importansya ngadto sa mga higala.

Nagkanayon si Kenji nga gawas sa lovelife, makahatag usab og kalipay sa kinabuhi sa tawo ang mga higala.

Gasa sa mga lig-on!

Wala’y kompetisyon gumikan kay kontento na sila sa mga hugyaw nga pelikula nga ilang nahimo pipila na ka dekada.

Mao kini ang baruganan sa mga direktor nga nalakip sa Sineng Pambansa National Film Festival All-Masters Edition. Malantawan na sugod karong September  11-17 sa tanang sinehan sa SM ang  12 ka mga pelikula nga nalakip sa maong film festival.

Suma pa sa executive director sa Film Development Council of the Philippines nga si Ted Granados puros mga lig-on ang nalakip sa Sineng Pambansa ug dili kini kompetisyon, kungdi dalit kini sa mga beteranong direktor nga nakamarka na sa industriya sulod sa dugay na nga katuigan.

Nasayran nga gigahinan sa FDCP og P1.5 million ang matag pelikula ug ang direktor na ang mag-igo sa pagpanindot sa ilang mga mugna.

Ang mga direktor nga nisalmot niini mao sila si  Elwood Perez (Otso), Gil M. Portes (Isang Tag-araw ni Twinkle), Romy Suzara (Tinik), Maryo J. de los Reyes (Bamboo Flowers), Mel Chionglo (Lauriana), Peque Gallaga ug Lore Reyes (Sonata), Tikoy Aguiluz (Eman), Chito Roño (Badil), Joel Lamangan (Lihis) ug Jose Javier Reyes (Ano ang Kulay ng mga Nakalimutang Pangarap).

Malantawan usab ang Bahay ng Lagim nga mugna ni anhing Celso Ad. Castillo , apan ipadayon gihapon ang pagpasalida niini sanglit nasuta nga na-save pa ang raw copy sa maong proyekto.

 Lakip usab sa ipasalida sa maong film festival ang restored version sa pelikula sa National Artists nga sila si Lino Brocka ug Manuel Conde nga nag-ulohan og Maynila sa mga Kuko ng Liwanag (1975) ug Genghis Khan (1950).

 Ang direktor sa Lihis nga si Direk Joel Lamangan nanalipod sa iyang obra nga gibidahan nila ni Jake Cuenca ug Joem Bascon nga matud pa dili law-ay ang init nga eksena sa duha ka mga bida.

Suma pa sa direktor nga nag-agi og lapad nga pagpasabot ang iyang gibuhat ngadto nila ni Jake ug Joem hinungdan nga nisugot ang maong mga aktor.

“Alam naman natin na medyo nauso ang istorya na yan dahil sa MHL (My Husband’s Lover), hahaha, pero alam ninyo ,matagal na po ginawa ang script ng Lihis, seguro walang producer ang gustong kumuha nito dahil kabaklaan daw, hanggang nauso ang MHL , ayan, marami nang tao ang gustong mag-produce. Hindi naman talaga kabaklaan umiikot ang istorya, tungkol lang ito sa pagmamahalan na nabuo na hindi inaasahan,” suma pa ni Direk Joel sa dihang nahinabi sa mga sakop sa E-Group (Cebu Entertainment Group) adtong Lunes atol sa presscon diha sa SM City-Cebu.

Samtang ang direktor sa Bamboo Flowers nga si Maryo delos Reyes  nisaysay nga honorarium lang ang gidalit niya sa mga bituon sa maong pelikula.

“Sinabi ko sa kanila na hindi talaga malaki yung budget sa pelikula, naintindihan naman ng mga artista at masaya ako sa pinakita nilang kooperasyon sa proyektong ito,” suma pa ni Direk Maryo. (BANAT NEWS)