Marian, Dingdong ug Richard wala’y offer sa TV 5

CEBU, Philippines - Giklaro sa chief entertainment content officer sa TV 5 nga si Wilma Galvante nga wala nila tanyagi nga mobalhin sa Kapatid Network ang Kapuso stars nga sila si Richad Guttierez, Dingdong Dantes ug Marian Rivera. Suma pa ni Galvante nga wala’y koneksyon sa showbiz project ni Marian  ang taho nga nagdungan og dinner sila si Marian ug Manny V. Pangilinan. Usa lang kini ka business meeting  gumikan kay endorser man si Marian sa usa ka telecommunication company nga gipanag-iya ni Pangilinan. Kalabot usab kang Richard, dili kini ang gipasabot nga Guttierez nga motrabaho sa TV 5, kundi ang iyang kaluha nga si Raymond kinsa makabaton og showbiz talk show sa maong network.

Thalia mihatag og mensahe ni Jessy

Ang Mexican superstar nga si  Thalia mitunol sa iyang blessing ngadto kang Jessy Mendiola kinsa maoy modala sa karakter niya niadtong '90s nga Maria Mercedes.

Nilugwa ang dagway ni Thalia sa  taped message atol  sa trade event sa ABS-CBN  aron ipaila-ila ang Pinoy version sa Maria Mercedes. "Thank you to Jessy! All the luck in the world. You're going to make an amazing job. All the production and all the cast, good luck," nagkanayon si Thalia. Si Jessy maoy ikaupat nga Pinay nga ni-portray  sa mga niaging serye ni Thalia.

Pipila niini naglangkob nila ni Marian Rivera sa Marimar , Carla Abellana sa Rosalinda ug Erich Gonzales sa "Maria la del Barrio" .

Samtang makauban ni Jessy sa Pinoy version  sa Maria Mercedes mao sila si Jake Cuenca, Jason Abalos, Vina Morales, Dominic Ochoa, Nadia Montenegro ug Vivian Velez.

Manileña ug Cebuana ang hawod

Nagmadaugon ang duha ka mga pambato sa nasud sa gipahigayon nga Mrs. Asia International 2013 didto sa Kuala Lumpur, Malaysia sa milabay nga gabii. Suma pa sa www.philstar.com ang medical technician nga si Stephanie Malibiran nakoronahan isip Mrs. Asia International Tourism samtang si Lubesly Tellidua, kinsa negosyante nga taga Cebu napili nga first runner up sa maong indigay sa kaanyag.

Nasayran nga sila si Malibiran ug Tellidua kanhi mga mananaog sa Mrs. Philippines-Globe 2012, ug maoy gipili aron makigtigi alang sa Mrs. Asia International. Suma pa ang 30-anyos nga si Malibiran usa ka hands-on mom ug nagtrabaho isip researcher ubos sa Tropical Disease Foundation sa Makati Medical Center. General surgeon ang iyang bana ug napili siya nga Most Beautiful Face sa Mrs. Philippines-Globe 2012.

Samtang si Tellidua, nalakip sa Top 10 finalists sa Mrs. Philippines-Globe 2013.  Ang 33-year old nga Cebuana, usa ka single mom sa tulo niya ka mga anak. Licensed special education teacher, ug nagtudlo nga libre sa kabus nga mga bata.

“These victories show that we should not downplay the roles women play as a wife, partner, mother  and significant things they can do to contribute in our society,” nagkanayon si Morena Carla Cabrera-Quimpo, Mrs. Philippines-Globe pageant director.

Francis midiskarte ni Ella

Giangkon ni Francis Magundayao nga midiskarte siya kang Ella Cruz. Apan segurado si Francis nga dili siya sugton ni Ella gumikan kay dili pa kini andam mosulod og relasyon gumikan sa kabata pa sa ilang mga edad.