Proud Englisanon!

Hugyaw nga Domingo mga Sweet Kabutanding!   Sa dili pa ang tanan mo greet ko sa mga silingan nako sa Sitio Englis V Rama Avenue, Cebu City og Malipayong Piyesta kanatong tanan! Karung adlawa usa na pud ka dakong selebrasyon sa among sityo kung diin asa ko gikan, kung asa akong mga damgo naporma, busa bisag magkinaunsa pa ang kalibutan ang akong suporta sa among kapilya ug sa among mahal nga patron Senor San Roque naa 100%. Gani, usa sa mga anak sa akong manghud gipangalan nako og Gabriel Roque . Mao karung alas singko sa hapon ayaw kamo kalimot sa atong prosesyon pagkahuman ang bonggang bongga nga fireworks, musunod dayon ang street party ug raffle draw.Kinsa kaha ang makadaug sa brand new television? Pwede pamo mamalit og tickets nga tag- dos pesos lang. Hugyaw!

Niaging Biyernes, July 26, gisugdan ang pangadye sa among kapilya, excited ang tanan kay kining gabhiuna mao ang gabii sa mga bituon nga gikan sa laing planeta, ang “Gay’s Unlimited Night.” Kauban ang ubang mga miyembro sa Parish of the Aliance of Two Hearts- Parish Youth Coordinating Council, diin kung sa niaging tuig usa ka drama ang among gipasundayag ug gipakita sa mga miyembro ang ilang talento sa aktingan, karun sa walay pagduhaduha ang singing and dancing skills na usab ang among gibida! Bisan pa man sa dakong bundak sa uwan, kilat nga unlimited, pero ang kalangitan niduyog sa among kagabhiun kay pag-undang sa uwan..show must go on! Siyempre ang inyong Yur’s truly wala nagpaulahi best in presentation usab ko kauban si Johneca ug Jotjot, kami ang ni open sa show pinaagi sa Dream Girls presentation. Pagkahuman niini tagsatagsa nilugwa ang mga miyembro sa Gay’s Unlimited ug ubang miyembro sa PYCC hinungdan nga naHugyaw ang tanan! Napuno sa mga hagik-ik, katawa,singgit ug pakpak ang matag show sa mga miyembro sa Gay’s Unlimted kay ang uban dili makatuo nga ila kining mabuhat. Pero pagkahuman nila ug tan-aw nito-o na sila nga kaya kaayo sa mga miyembro ang magpakitang gilas.

Pagkahuman sa maong show unsay buhaton? Of course ang dakong kaon! Hahahaahahaha! Salamat kaayo sa ni sponsor sa among lafang nga akong BFF Frances “Angel” Gacasan kay hasta ang dukot nahurot, wala’y gipasaylo ang tambok sa humba nahanaw lang, ang iro nga nag-atang walay bukog nga nakaon kay giapil namo og kaon. Joke lang! hahahahaha! Pagkahuman sa lafangan nag-istorya na dayon kung unsay buhaton sa sunod tuig, o di ba ? Ana ka bongga maghunahuna ang mga Gay’s Unlimited usa ka tuig, murag na pressure ang among direktor nga si Andy Pangga Banate. Unsa na sad kaha ang pasabog sunod tuig? Mao na ang angay ninyong atangan! Salamat sa among over all coordinator  nga si tita Ezer Chan kauban sa gwapa nakong Mamu nga si Jacky King, ang shofa nga si Nancy Chan,ang seksi nga si Melchi Cang, ang Choreographer nga si Cliff Racuya (naa ming tanan sa imong kiliran karung Oktubre) mga make- up artists nga silang “Sister” Gretchen Sy, Jaymark, Joselito, Vincent ug labaw sa tanan ang mga performers nga dili nako matagsa tagsa kay wala koy listahan, sponsors sa mga nightly activities sa dance Contest, bingo social, Fatalbugan, Ginoong Esco, Little Miss Esco,Miss Esco, Concert, Street Dancing, sponsors sa kapilya nga painit, decorations, sa mga karo, fireworks ug sa mga wala nako naBisChika kahibalo namo kung kinsa mo. Salamat sa paghatag sa inyong oras ug panahon.

Nindot kaayo palandungon nga ang mga parehas namo og dugo naghiusa para sa pagpakita ug pagpalambo sa talent. Ang among pasundayag usa usab kini ka debosyon sa among patron Senor San Roque nga bisan asa pa man ang among naabtan, bisan kami nalayo sa among sityo tungod sa mga butang nga dili namo mapugngan apan nagpabilin gihapon sa among mga ugat ang usa ka dugong Englisanon!