Sexy Ra Kaayo? Korean Jinri sa Cebu nagtubo

CEBU, Philippines - May mga babaye nga fans sa FHM-Philippines nga nakugang sa August issue sa maong magazine gumikan kay sexy ra matud pa kaayo ang cover girl niini nga si Jinri Park, kinsa dinhi sa Sugbo magdako.

Pero ang mga kalalakin-an namakpak kay bitamina matud pa sa ilang mga mata ug dili law-ay ang hulagway ni Park.

May mga miingon nga men’s magazine matud pa ang FHM busa dili na angayang kahibudngan ang mga hulagway nga ibandera niini.

Nasayran pinaagi sa FB page sa maong magazine nga ang nakiwawan nga fans sa hulagway ni Jinri, mga nakauyon sa ka nindot matud pa sa cover ni Marian Rivera adtong milabay nga Enero.

Si Jinri, Korean, apan giisip na niya nga Pinay siya sanglit dinhi na siya sa Pilipinas nagdako.

Suma pa, sais-anyos pa lamang si Jinri dihang mibalhin dinhi sa Sugbo  ang ilang pamilya. Sa usa sa mga international schools dinhi sa dakbayan siya mitungha.

Karon, ang 25-anyos nga si Jinri disc jockey na sa RX 93.1 sa Manila ug makita usab siya sa sitcom sa GMA-7 Vampire Ang Daddy Ko.

Labing una kini nga FHM cover ni Jinri, bisan og makatulo na siya ka higayon nga nalakip isip “Girls of FHM”  ug nahimo pang kolumnista.

Para niya ang FHM maoy nagbukas sa iyang mabulukon nga showbiz career dinhi sa Pilipinas, diin aduna na pud siya’y buko shake business.

  I always tell this to other magazines and newspapers when I get interviewed that I think FHM was really my stepping stone to getting into DJing, showbiz and other things. Even though it wasn’t my first cover, FHM was my first mainstream cover. You have a wide range of audience and that started it,” nagkanayon si Jinri. Ang banggiitang si Xander Angeles maoy photographer niining mga hulagway ni Jinri.

MHL Fever na sa Cebu!

Mobisita karong adlawa dinhi sa Sugbo ang mga bituon sa trending drama series sa GMA-7 nga My Husband’s Lover aron mohatag og libre nga kalingawan sa mga Sugbuanon nila nga fans.

 Ang giila karon nga hottest love team sa Primetime TV nga sila si Dennis Trillo ug Tom Rodriguez, (TomDen), uban ang promising Kapuso leading lady nga si Carla Abellana, maoy molingaw sa mga Sugbuanon sa duha ka nagsagunson nga mga Kapuso Mall Show sa Gaisano Grand Mall Mactan (3pm) ug SM City Cebu (5pm).

 Mohugyaw usab sa mga Sugbuanon sila si Kevin Santos ug Kuh Ledesma nga nakaangkon usab og dugang popularidad gumikan sa maong serye. Ang laing mga bituon sa MHL nga sila si Bettina Carlos ug Victor Basa maoy mga hosts sa maong event.

“We are all excited to bring to Cebu what the Cebuanos have all been waiting for—the actors that breathe life to the characters of Eric (Dennis), Vincent (Tom), Lally (Carla), David (Victor), Danny (Kevin), Elaine (Kuh), and Vicky (Bettina) in My Husband’s Lover. And we are delighted by the fact that through this, we will be able to thank them not only for their undying support but also for the continuous trust they give to GMA Network. With this, we really hope they will have a good time!,” suma pa ni Oliver Amoroso, ang  Assistant Vice President for GMA Regional TV.

 Nasayran nga gawas sa Pilipinas, mikisaw usab ang MHL sa ubang nasud gumikan sa istorya niini kalabot sa duha ka lalaki nga nagkahigugmaay. (BANAT NEWS)