Two Minutes

Yes, lakip ko sa nakasaksi sa baha adtong Sabado sa gabii nga mikuyanap sa downtown. Pero wala ko kakita sa kataas sa tubig diri sa nataran sa tubig kay nag-gym man ko adtong mga taknaa. So gikan sa Ramos, pasado 9p.m., misakay ko'g dyip padung sa downtown, kay adto ko manukad para Punta Princesa. Pag-abot namo sa eskina Junquera ug Sanciangko labihan pa ka taas sa tubig, kusog pa kaayo'g bul-og. Wala ra kaayo ko mangusyoso kay naa pa ko sa ikatulo nga dekada sa akong pag-rosaryo adtong tungora. Ug mikanaug ko sa eskina Osmeña Boulevard ug Sanciangko. OM Gee kadaghang napundo nga pasahero. Nagpadaplin ko kay akong humanon akong pag-rosaryo, samtang mga pasahero nag-ilogay na pagsakay sa nagnihit nga mga dyip.

Mipadaplin ko ug kalmado nga padayon nga nag-rosaryo samtang misamot kadaghan ang mga tawo kay gamay pa man gyud kaayo ang masakyan. Dihang nahuman nako, nag-ampo dayon nga may muabot nga mga dyip nga igo nga makakarga sa daghang mga napunod nga pasahero. Ug may mibutho nga duha ka dyip padung sa Labangon pero aduna nay sakay daan. Hinungdan nga nag-ampo na pud ko nga unta mupada ang Ginoo og bisag tulo ka mga dyip nga bakante para makarga tanan ug makapahimulos og hamugaway nga pagbyahe. Usa ka Amahan Namo, usa ka Maghimaya Ka Maria, usa ka Santa Maria ug usa ka Himaya Sa Amahan ug akong gipakapin og personal nga pag-ampo ang akong nalitok. Mutuo mo og sa dili dear okRYANians, mga duha ka minutos lamang human nako og ampo, may mibutho dayon nga tulo ka mga dyip nga padung sa Labangon ug wala pay sulod. Puwes wala mag-ilog ang mga tawo, walay duot-duot ug kapyot nga nahitabo. Ug gipakapinan pa Niya kay sa front seat gyud ko nakalingkod sa 12D nga dyip (GWA786) ug ako ray pasahero nga naglingkod didto sa kinatibuk-ang byahe kay diili man buot ang driver nga maglisud siya maong usa ray iyang palingkuron niya pa. Hamugaway gyud di ba? Pakpak!

Ang akong mensahe mao nga imbes nga magbagutbot kita isip reaksyon sa kusog nga uwan ug grabe nga pagbaha, mulitok na lamang kita og pag-ampo nga haom aron malingkawasan nato ang sitwasyon nga atong nasugamakan nianang tungora. Saputon gyud magbasa sa akong news feed sa Facebook uy nga magpadungog-dungog sa ilang mga kontra, mamalikas pa, ang uban walay hinungdan nga bagutbot. Please, just say a prayer and feel good. Sigurado gayud nga dunggon ang imong pag-ampo kun maoy angay! Pakpak!

Matag Domingo nako mag-okRYAN dear okRYANians. So dinhi na kita maghisgot-hisgot og mga butang nga sarang makatabang sa atong lawas ug kalag. Pakpak!

Magdungog gihapon kita sa okRYAN sa dyRC-Radyo Calungsod, 10am to 12 noon, matag Lunes hangtud sa Sabado. Naa pud koy Facebook sa ganahan lang: [email protected].