Brigada News FM Manghugyaw na sa Sugbo!

CEBU, Philippines - Mosikad na dinhi sa Sugbo sunod semana ang labing bag-o nga radio station sa FM band, ang Brigada News FM kung diin ang format niini susama sa madunggan sa mga AM radio stations.

Ang assistant manager sa maong istasyon nga si Bernilo Cabusao nisaysay dinhi sa Banat News Hugyaw (BNH) nga dako ang iyang pagtuo nga hangpon sa publiko ang Brigada News FM gumikan sa kakusog sa signal niini nga nahimutang sa 93.1 mHZ

“Duna usahay ang uban nga mga tawo nga inigkahuman og paminaw og commentary nga programa, mobalhin dayon og laing istasyon aron maminaw na pud og music. Pero dinhi sa Brigada News FM, naa ta’y balanse nga programming. Gawas sa mga  news ug commentary programs, mo-play pud mi og mga music, “ nagkanayon si Cabusao.

Dugang pa niya nga dili basta-basta ang mga personalidad nga maglangkob sa maong istasyon gumikan kay beterano na kini sa natad sa pagpanibya sama nila ni Chester Abadilla, Romeo Limpangog, John Tam Ybañez, Eric Manait, Tantan Sabalones, ug daghan pa.

Manukad na usab dinhi sa Sugbo ang banggiitang komentarista sa Mindanao nga si Noel Bernito kinsa mao usab ang nagsilbi nga station manager sa maong istasyon. Nagkanayon si Cabusao nga 24 oras magtugaw-tugaw sa kahanginan ang Brigada News FM busa dali ra dayon nga mahatud sa katawhan  kung dunay breaking news.

Gawas sa Sugbo,  aduna’y Brigada News FM sa ubang dapit sa nasud kung diin positibo ang nadawat nga feedback niini hinungdan nga gipalapdan ang ilang serbisyo ug naabot na sa nagkadaiyang dapit sama sa General Santos, Cotabato, Zamboanga, Davao City ug Cagayan de Oro. Dinhi sa Sugbo, nagsugod na sa miaging buwan ang test broadcast, ug giingong mga bag-o gyud nga ekipo ang gipang-install niini.

“Han-ay gyud ang mahimo namo nga operasyon, kay naa gyud mi igong tawo sa news room ug sa field,” dugang pa ni Cabusao.

Suma pa niya nga ang pagbukas sa Brigada News FM maghatag pa sa mga tawo og dugang kapilian sa istasyon nga gusto nila nga paminawon nga dunay balanse nga programming.

Aminado si Cabusao nga makatigi sa Brigada News FM ang nakauna na dinhi sa Sugbo nga  Radyo Singko 101.9 News FM.

“Ang nakalahi lang sa amo, kay puros local programs ang atong gidalit nga mao gyud ang gipangita sa mga tawo,” nagkanayon si Cabusao.

Aduna pud sila’y mga hugyaw nga mga talk show kung diin moimbitar sila og nagkadaiyang personalidad.

Panahon sa kadlawon, modestino usab sila og reporter aron ma-monitor gyud kanunay ang kasikas sa palibot.

Nagmalaumon si Cabusao nga kung unsa kainit ang pagdawat sa mga tawo sa Brigada News FM sa ubang dapit sa nasud, mao pud  kini ang mahitabo dinhi sa Sugbo. Hinuon samtang magdagan ang adlaw, aduna’y mga bag-ong programa ang kalit nga motumaw sa Brigada News FM nga  maoy gipangita sa masa. (Sanden J. Anadia)