Chris napriso

CEBU, Philippines - Kasamtangang nagtingkagol sa Mandaluyong City Criminal Investigation Detention Cell ang singer-actor nga si Chris Cayzer human gisulod niini ang duha ka condominium units nga wala’y pagtugot sa tag-iya. Suma pa sa kapolisan nga atol sa pagdakop nila niini murag wala sa iyang kaugalingon ang aktor. 

Lloydie interesado sa indie film

Wala pa masuwayi ni John Lloyd Cruz ang indie film apan suma pa niya nga interesado siya nga malakip niini apan dili lang karong panahona gumikan kay napa siya’y daghang commitments sa Star Cinema. Kahinumduman nga ubay-ubay na sa mga sikat nga mga artista ang nakasuway na nga nalakip sa indie film, kini sama nila ni Vilma Santos, Marian Rivera, Dingdong Dantes, Eugene Dominggo,Judy Ann Santos, Gretchen Barreto ug uban pa.

Estilo ni Jennica

Gitataw ni Jennica Garcia nga normal lang gyud sa mag-uyab nga maglalis usahay apan kinahanglan lang gyud nga dili magpadala sa kalagot aron dili mosangpot sa panagbuwag ang taud-taud na nga relasyon. Nagkanayon si Jennica nga gi-apply niya ang maong pamaagi hinungdan nga nagpabilin gihapon ang relasyon nila ni Alwyn Uytingco.

Nag-away gihapon

Matud pa nga nisuway diay unta og balik si Paulo Avelino sa panimalay nila ni LJ Reyes apan wala gihapon kini tinggi sa aktres hinungdan nga nigawas na lang og  balik ang aktor.

Benjie wala mahadlok

Wala matud pa mahadlok si Benjie Paras sa giingong pagtingog ni Jackie Foster kalabot sa ilang problema. Matud pa ni Benjie nga nasayod siya sa iyang kaugalingon nga wala gyud siya’y gibuhat nga dautan. (Sanden J. Anadia)