Uwan
CEBU, Philippines - Nagtinaguktok na pud ang mga dagkong lusok sa uwan diha sa atop. Sonata kini sa atong mga dalunggan ug ang kabugnaw niini, muhapuhap sa atong mga dughan. Ang uwan maghimo kanatong emosyonal, mulab-as sa kagahapon masakit man o malipayon. Sa mga bata ang uwan kahigayonan aron magbasa-basa, sanglit lahi usab ang dala niini nga emosyon. Ang pagkaligo sa uwan makahinam, makalipay, alegre ug makalingaw.
Ang uwan para kanako dili lamang makapagaan sa akong pagbati, kundili mupahinumdom usab kanako sa kinabuhi sa isla kaniadto. Sa okRYAN sa dyRC adtong Lunes may mga okRYANians nga mipaambit nga ang uwan matud pa makapahinumdum niadtong mga panahon nga magdali sila og bangon sa higayon nga magkanaas na ang uwan. Kini aron pagbutang og planggana, baldi ug uban pa sa angayan niining mahimutangan sulod sa balay aron masawud ang tulo sa uwan nga muagi diha sa busluton nga atop. Ang uban pud midugang nga magbuntag matud pa sila og banwas sa baha nga musulod sa ilang balay gumikan sa makusog nga pagbunok sa uwan. Ug namahayag ko nga nakasabot ko sa ilang pasabot, maka relate ko sanglit sama kanila, ingon niana usab ang kasinatian namo kaniadto o basin pa gani mas pa.
Ang bagyong Ruping niadtong 1990, nga labihan ka kusog ang gidala nga hangin milupad sa among atop nga nipa, as in ang tibuok atop gyud. Ang kusog nga uwan niini, mibasa sa among mga butang. Ang una namong balay kawayan ang salog ug bungbong. Nindot tong among balay kay bugnaw, apan paghuman sa unom ka tuig tuyong gilukat kay gipapahawa mi sa tag-iya gumikan sa pasangil nga wala mi mubotar sa ilang kandidato. Yes, no vote ibot ang peg ato, which was really sad and was very painful sa akong mama kay produkto kadtong balaya sa iyang loan sa City Savings Bank isip magtutudlo sa publikong tunghaan.
Pwes kay timawa man intawon mi, samtang gipatukod pa among bag-ong balay which took years before it was finished, sa among gamay nga tindahan lamang sa mi kaniadto namuyo for I think three years or four. Usa or duha ra ka dupa ang gidak-on, susama kadak-a sa akong cubicle karon diri sa Banat News newsroom, semento ang sawog, amakan ang bungbong ug nipa ang atop. Inig ka buntag tindahan to siya, inig ka gabii higdaanan. Puwes inig ka gabii, among hapinan og karton usa pa ipatong ang banig aron walay tung-og, dili ta mag-utot. Pakkk! Unya kay mu-uwan man og kusog nya naa may mga buslot ang atop ang among muskitero patungan namo og mga plastic cover para dili mi mabasa unya magdulog pud mi og kabo, kaserola ug uban pa nga maoy musawod sa ubang tinulo sa uwan. Unya kay mugara man gyud og bundak ang uwan, muhunob among sawog, usahay musulod ang tubig nga resulta sa pagbaha. Ang ending, magtuk-ong mi nga mangatulog, mura mi og mga manok nga gipokwang, manitmit sa katugnaw.
Hay that was life then! I can joke about it now, but really it was never easy. Sa mga nagbasa aning atong okRYAN karon nga nasugamak niining maong sitwasyon, I know how it feels. Sige lang, just keep your faith ablaze. Kay kun dili sa tanang panahon mag-uwan, ingon niana pud ang kinabuhi. Dili sa tanang panahon nga ikaw mag-antos ug kanunay nga anaa sa ubos. Kun mulurang ang uwan ug mupahiyom ang bangaw, ugma sa tukmang panahon, musubang ang kalampusan ug kalipay diha kanimo ug sa imong pamilya. Pakpak!
* * *
Good day Ryan, this is Myrna Boadwalk of Balamban, as I read your letter “Look Up and Prayâ€, sakto jud ka sa imong gisulti, dili tanan ganahan nato kaay nay uban gusto nga birahun ta paubos ug nay malipay nga magtan-aw sa usa ka tawo nga naparot tungod na sa inggit. Nindot basahon ang imong nasulat…0932347****
Good morning okRYan. Ganahan ko sa imung message karon sa imohang column. Naigo man gd ko kay mao jd na akong buhaton kuan man gud di man ta kay ko tantong gwapa, di ko perfect ka au, pero maglibog lang jud ko nganong daghan masuya nako niya wa koy laing himuon pasagdaan nalang nako…Yanney Samson, Bitoon Dumanjug..0909238****
Hi rye ur 100% ryt dat prayer s d best weapon to protect us from ol evil & temptations for our God is merciful & compassionate…Mrs. Nacario, Cebu City…0918530****
Hi kuya ry, gud morning! Ganahan kay ku’s gisuwat nimo run kuya.Ka relate jud ku. Thanks kuya! God bless! I love you, mwuah! Kimberly here from Toledo City…0946207****
* * *
Reaksyon? Ipadala kana kauban ang imong ngalan ug address ngadto sa 0939-131-6599, sa dili pa ang 12 noon karong adlawa, July 5. Magdungog gihapon kita pinaagi sa okRYAN sa dyRC-Radyo Calungsod 648 kHz., matag 10am to 12 noon, Lunes hangtud sa Sabado.
Naa pud koy Facebook para sa ganahan lang. Ang akong email add: [email protected].
- Latest
