Wowie magminyo na!

CEBU, Philippines - Napatik sa www.fashionpulis.com adtong Domingo kining mga hulagway ni Wowie de Guzman kauban sa iyang pangasaw-unon nga naila lamang sa ngalan nga Sheryl gikan sa Lubao, Pampanga.

Gitakda na matud pa nga magpakasal ang duruha karong July 7, 2013. Suma pa sa mga commenters sa maong blogsite, gikan sa adunahan nga pamilya si Sheryl ug daghan og negosyo, diin pipila niini ang gidumala ni Wowie. Si Wowie ang orihinal nga loveteam ni Judy Ann Santos kaniadto, sa wala pa mapares ang Queen of Teleserye ngadto nila ni Rico Yan, Piolo Pascual ug sa iyang bana karon nga si Ryan Agoncillo.

Gikatahong nagkarelasyon kaniadto sila si Wowie ug China Cojuangco.

Pa-cute gihapon

Tsika pa ni Xian Lim nga dili  siya kahulagway sa sitwasyon nila karon ni Kim Chiu. Ang importante alang kaniya nga malipayon sila sa usa’g-usa ug gihulagway niya si Kim nga espesyal sa iyang kinabuhi. “Si Kim kapag nakikita ko, parang complete na 'yung araw ko,” nagkanayon si Xian.

Sarah maka-relate sa contestants

Gibutyag ni Sarah Geronimo nga maka-relate gyud siya sa tanang milinya aron lang gyud makasalmot sa programang The Voice busa nakahibalo siya nga dili gyud lalim ang naagian sa mga tawo nga  ganahan mosalmot og mga singing competition. Matud pa ni Sarah nga naagian na niadto ang pagsalmot sa bisan unsa nga singing contest ug naabot gyud niya ang iyang pangandoy nga mahimong sikat nga singer.

Cancer patient giduaw ni Vice

Gigahinan og oras ni Vice Ganda ang pagbisita sa iyang 6 anyos nga fan nga naghambin sa sakit nga cancer nga si Angel Mangubat. Emosyonal nga gibutyag ni Vice nga gihimo niya nga inspirasyon ang bata gumikan kay mopahiyom gihapon kini  bisan pa man sa sitwasyon nga giatubang niini.

Nalapas

Aminado si Angel Locsin nga nalapas na siya sa target niya nga edad nga mosulod sa kaminyoon. Una nga gipadayag sa aktres nga inigabot niya og 22 anyos, ganahan na siya makabaton og pamilya apan naabot na lang siya karon og 28 anyos apan wala gihapon siya magminyo. Suma pa ni Angel nga moabot ra ang saktong panahon alang sa maong butang ug labing importante nga nagkalig-on ang relasyon nila ni Phil Young-husband.

Julia hukman sa MMK

Sa  dili pa ang seryeng Confradia, makita una si  Julia Barretto sa sunod nga episode sa Maalaala Mo Kaya. Puwerting lipaya ni Julia gumikan kay sa dihang nagplano pa siya niadto nga mosulod sa showbiz, gipangandoy na niya nga malakip sa MMK gumikan kay makita gyud ang katag niini sa pag-arte ilabi na sa hinilakay nga eksena.

Nasakpan sa Bohol

Wala gyud motug-an sila si  Jolo Revilla ug Jodi Sta. Maria kung unsa nga lugar ang ilang gibakasyonan, apan nasigpitan gihapon ang duha sa usa ka beach resort sa Bohol. Kuyog sa duha ang tagsa-tagsa nila ka mga anak sa kanhi nila mga partner.

Kean mihimakak sa isyu

Gihimakak sa  lead vocalist  sa bandang Callalily nga si Kean Cipriano ang taho nga matud pa nakahatag siya og kagubot ug nanukmag sa usa ka kauban niya  sa taping sa Banana Nite sa ABS-CBN. Tsika pa sa singer nga dili usab tinuod nga napungot siya sa gipabuhat niya sa maong show.

Kiray napul-an ni Igi

Komedya pa ni Kiray Celis nga napul-an na siya sa iyang screen partner Igi Boy Flores.“Wala na ba akong ibang lalaki? Nakakasawa na rin kasi,” tsika pa niya ngadto sa PEP.

Obligasyon

Gihatagan og dako nga mga papel sila si Mark Bautista, Jennylyn Mercado ug Jolina Magdangal sa pagpalig-on sa  Sunday All Stars. Motabang ang tulo sa paghatag og dugang mga ideya sa nagkadaiya nga production number sa maong show.

Tricycle ang sakyanan

Nakaingon ang apohan ni Charice nga si Tess Relucio nga hayahay kaayo ang iyang apo gumikan kay BMW ang sakyanan niini. Tsika pa ni Tess nga padayon siya nga nagsakay og tricycle sa iyang mga lakaw. 

Pinoy movies ipasalida sa NY

Ubay-ubay ka Pinoy movies ang malantawan sa New York Asian Film Festival nga magsugod karong June 28 hangtud sa July 15.  Kini naglangkob sa Pridyider, Rigodon, ,Vesuvius, Catnip ug  Aberya.

Anak ni Melanie todo rampa

Aktibo ang anak ni  Melanie Marquez nga si Maxene sa nagkadaiyang fashion show nga gipahigayon didto sa Amerika. Gipasigarbo ni Melanie ang iyang anak gumikan kay naliwat kaniya ang pinasohan niini.

Dako og grado

Mapahiyomong gipahibalo ni  Angeli Pangilinan nga dako kaayo og nakuhang grado ang anak niya nga si Gab Valenciano kinsa nagtungha sa Amerika. Matud pa niya nga 99% ang average nga nakuha ni Gab sa duha ka eksaminasyon niini. Gikuha ni Gab ang kursong Recording Arts sa Full Sail University.

Allen naglaum

Nagmalaumon si Allen Dizon nga makalangkat og ikaduhang acting award sa pag-arte niya  sa indie film nga Lauriana. Una na nga gipadayag ni Allen nga duna siya’y dedikasyon sa iyang trabaho busa iyaha gyud kini nga tarungon bisan unsa pa nga role ang ihatag kaniya.

Gardo dili interesado sa politika

Tsika pa ni Gardo Versoza nga mas pilion pa niya nga mahimong direktor sa indie film kaysa mosulod og politika. Matud pa niya nga nalingaw na siya sa showbiz ug wala gyud sa iyang huna-huna sukad pa niadto nga mahimong politiko.