Sinasadya raw ni Kris: Kahit may utos na ang korte James hindi pa rin mahiram si Bimby, laging bitbit ni Kris

PIK: Ngayon na ang huling linggo ng afternoon drama ng GMA 7 na Bukod Kang Pinagpala.

Naglalaban pa rin ang tatlong ina na sina Camille Prats, Jackie Rice, at Jennica Garcia kung sino ang magmamay-ari kay Lara (Mona Louise Rey). Hanggang sa merong mamamatay sa tatlong inang ito.

Sa dalawang maiiwan, kanino sa kanila mapupunta si Lara?

PAK: Totoo bang hindi pa rin nagkikita sina James Yap at ang anak niyang si Bimby?

Pinaaga ni James ang biyahe niya pabalik ng Maynila galing ng Escalante, Negros Occidental para magkita na sila ng anak niya.

Pero ang nabalitaan namin, hindi ito natuloy dahil kasama nito si Kris Aquino.

May order ang korte na hindi puwedeng lumapit si James ng 100 meters sa dating asawa kaya hindi niya malapitan si Bimby kung kasama nga si Kris.           

Hanggang sa finals ng Pilipinas Got Talent ay kasama ni Kris si Bimby kaya nagtataka ang iba dahil ang buong akala nila mahihiram na ni James ang kanilang anak.

Reliable ang nagsabi sa amin na ayaw daw ni Kris na mahiram ni James ang kanilang anak kaya lagi niya itong sinasama.

BOOM: Nakakaawa ang isang may-ari ng brand ng sapatos na nag-i-sponsor sa isang young actress dahil napahiya ito nang minsang naghatid ng mga sapatos para kay young actress.

Nang tiningnan daw ni young actress ang mga sapatos na dala nung may-ari ay natuwa naman daw ito dahil nagandahan siya.

Ipinakita niya sa stylist niya kung okay ba ang mga sapatos na iyon. Mataray daw ang sagot ni stylist na hindi maganda dahil nakakalaki raw sa paa ni young actress. Hindi alam ni stylist na may-ari mismo ang naghatid ng mga sapatos na iyon.           

Ang nakakaloka pa, naniwala si young actress sa komento ng stylist. Sumunod ito sa stylist niya sa fitting at basta na lang iniwan si may-ari.

Hindi man lang daw nagpasalamat at basta iniwan na lang ang nakakaa­wang sponsor na napahiya sa mga nakasaksi sa dressing room na pinaghatiran niya ng sapatos.

Kaagad daw niyang kinansela ang sponsorship kay young actress.