Yuri Dekada

CEBU, Philippines - Usa na pud ka Domingo ang atong saw-an mga Sweet Butanding tungod kay BisChika na! Ugma back to school na para sa mga estudyante eskwela gyud mo og tarung kay si Nanay o si Tatay nagtrabaho og maayo para naa moy ikabalon sa eskwelahan. Mao nga sa tanang estudyante: Maayong pagbalik sa pag-eskwela.

Pero karung Domingoha espesyal kaayo ang akong ipaambit kaninyo para sa ikanapulo ka tuig nako sa showbiz industry, ang titulo niini... Yuri Dekada! Hahahaha! FlashBack Sunday ang akong dating karun, ang akong journey sa GMA7 Cebu isip production assistant hangtud nahimong on cam talent. Dili nako makalimtan nga ang GMA7 Cebu mao ang ikawalo nakong trabaho nagsugod ko sa usa tindahan sa Colon, pag-self supporting student nako nitrabaho ko sa usa ka fastfood chain, pizza parlor, recreation center, magazine store, coffee shop, events company, cellphone company ug nasayod ba mo nga ni sideline pako sa sikat nga designer nga si Jed Sevilla isip assistant niya? Basta day-off nako gababag ko sa boutique ni mamah Jed Sevilla.

Hangtud naabot ang panahon nga ang akong mga tiil padung sa SM City Cebu Event Centre para himamaton nako ang akong nahimong boss ug mentor nga si madam Lily Yap para sa usa ka interview kay nagkinahanglan sila og production assistant sa Singgit Cebu. Nigawas ang una nakong karakter sa maong programa isip si Megalala kay gikinahanglan sa maong show ang usa ka simang, murag clown nga molingaw, sa maong programa, busa Production Assistant/Mega Lala ang akong drama nga manghatag og premyo sa mga balay, sa mga games segment sa show naa ko para magpaHugyaw.  Pagkahuman sa unom ka tuig sa Singgit Cebu nahimugso ang Oi Show Nato Ni! Makahinumdom pako nga ako ang molista sa mga mo audition apan tawagon ko sa creative consultant sa GMA Manila para e-partner og host sa mga nag-audition. Na-shock na lang ko nga pagkahuman sa whole day audition apil nako isip usa sa mga hosts sa Oi show nato ni! Duha ka tuig among gilingaw ang mga Kapuso pinaagi sa sayawan, kantahan, mga segments nga maka hugyaw pero sad to say everything had to end. Nihilak ming tanan sa katapusan namong taping. Murag dili mi katuo apan gidawat namo ang kamatuoran.

Kung dunay mahuman nga programa aduna usay magsugod---nahimugso ang Istayl Nato usa ka magazine show nga nagpakita sa kanindot sa Cebu ug sa Pilipinas. Sa maong show ang host namo kay si Bb.Pilipinas World 2006 Anna Maris Igpit ug ang StarStruck Avanger Chad Burden, diha usab si Benjamin isip segment host. Ako ang nahimong associate producer sa maong show, dili na unta ko mag on cam apan gitawag ko sa panahon, adunay mga segment nga ako mismo ang nag-host. Siguro gipangita ko sa mga viewers mao nga ang nahitabo kung wala si Chad kami ni Anna na ang pares. Usa ka tuig kapin ang maong programa, ang nakalahi sa Oi Show Nato Ni, natapos kini nga wala’y farewell episode. Kalit lang kami nahanaw sa ere, nawala na parang bula ang Istayl Nato nga ang katapusang lugar nga among gi feature mao ang Camotes Island ang kauban ni Anna atong panahona kay si...Kinsa siya? Mao na to siya! Mao gyud ni ang kinabuhi sa showbiz, dili permanente, didto usab nagsugod ang mga Kapuso Mall Show ug mga Festivals nga kauban gihapon nako si Anna Maris Igpit. Ug sa tuig 2010, nahimo akong parte sa numero unong morning show, ang Buenamano Balita kauban si Alan Dominggo, Lou Ann Rondina ug nahimo nakong partner nga Ching Pelayo Dacua. Ang pagmata og sayo sa buntag dili ingon ana kasayon apan kung imong mahatagan og kalipay ang matag panimalay ang tanan maupay.  Siyempre mga Sweet Butanding nahimong dakong tabang usab sa akong showbiz career ang mahimong parte sa Banat Hugyaw. Sa among editor nga si Ryan Mark Borinaga ug si sir Bhoy Mendoza nisuporta usab sa akong BisChika career

Salamat sa akong mentor nga Madam Lily Yap nga maoy nakakita sa akong potensiyal, ang Entertainment TV forces, ang News and Public Affairs - Buenamano Balita family. Ug dako kaayo ang utang kabubut-on nako sa tanang viewers sa mga programa nga naapil ko ug sa mga nagsubay sa Banat Hugyaw BisChika! Salamat!

Sa umaabot nga tuig, kung unsa man ang gitagana sa Kahitas-an kanako maghinaut ko nga naa lang gihapon kamo para mosuporta. Apan laumi ninyo nga akong buhaton ang tanan nga mas mahatagan pa kamo og mga Impormasyon,BisChika ug Kalingawan. Kining tanan nga akong naabot dili kini magmalampuson kung wala kamo. Mao nga mao na ni siya all over the world!