Sam nagpa-tutor na para hindi maalangan sa pagta-Tagalog

Mukha talagang mapapasubo sa aktingan si Sam Milby sa bagong seryeng Huwag Ka Lang Mawawala, dating Against All Odds na kung saan he will have to pit talents with not only Judy Ann Santos kundi maging kay KC Concepcion din.

Kay Jericho Rosales unang na-assign ang role pero dahil may una na itong natanggap na commitment kung kaya kay Sam ito naibigay. Hopeful lang si Sam na magiging maganda siyang pamalit kay Jericho. Nag-aral pa siya nang husto ng Tagalog sa tulong ng isang tutor para hindi siya maalangan sa kanyang role.

Kris nakasilip ng pag-asang award sa indie film

Excited si Kris Bernal sa gagawin niyang indie film na ididirek ni Gil Portes. Matagal na siyang artista at wala na siyang mahihiling pa na material na bagay dahil lahat ng gustuhin at kailanganin niya ay nakuha na niya. Ang kulang na lamang ay marating niya ‘yung rurok ng kanyang pagiging artista.

Healthy at happy din ang love life niya. Bagaman at hindi pa sila ni Carl Guevara, patungo na rito ang kanilang relasyon. Napakagalante nitong binigyan siya ng libreng biyahe sa Singapore for her birthday.

Award na lang talaga ang kulang para makumpleto ang career niya. Ilang buwan pa bago mapanood ang bagong serye niya sa GMA kasama si Aljur Abrenica kaya may panahon siya na napag-aralan at mapaganda ang gagawin niyang indie film. “Dream ko talagang magka-award. Pero hindi naman ako nagmamadali, I’m just grateful na dumating ang offer ni direk Gil.  With his film nakatanaw ako ng pag-asa na mabigyan ito ng katuparan,” anang artista na walang napagsidlan ang katuwaan sa mga nangyayari sa kanyang buhay at karera ngayon.

Kasalbahihan ni Little Juan ini-enjoy ng mga manonood

Mukhang tama lang ang pasya ng ABS-CBN na gawan ng prequel ang Juan dela Cruz at isabay ang pagpapalabas ng My Little Juan sa Juan dela Cruz. Sa gabi nga lamang napapanood ang serye ni Coco Martin pero ang istorya ng kanyang kabataan na nagtatampok sa tinatawag na bagong child wonder ng local television na si Izzy Canillo kasama si Jaime Fabregas ay pam-buena manong atraksyon sa hapon, pagkatapos ng It’s Showtime.

Enjoy ang manonood na masaksihan ang kabataan ng isa sa pinaka-“salbaheng” bata sa  isang  serye na ginawang nakakatawa dahil sa ganung edad naman ay hindi pa alam ng bata kung ano ang tama sa mali. Mabuti na lamang at napunta siya sa kandili ng isang pari at magagawan nito ng paraan na mabago ang kanyang pagkatao at mapalaki siyang mabait.

Nakakaiyak din ang naging pagbabati ng kambal na sina Margo at Celyn sa Ina, Kapatid, Anak na ginagampanan nina Maja Salvador at Kim Chiu. Lumabas ang kagalingan sa pag-arte ng dalawang kabataang artistang  babae. Mukhang nakalimutan nila ang kanilang mga personal na problema dahil nagampanan nila ng buong husay at conviction ang kanilang mga roles.

AiAi nakahanap ng maraming kaibigan

Ewan ko na lamang kung ano ang nararamdaman ng nakahiwalayang mister ni AiAi delas Alas dahil santambak ang simpatiya na bumubuhos na pabor sa komedyante. Hindi lamang si Willie Revillame ang pumunta ng kanyang bahay para  samahan siya sa kanyang pinagdaraanan, pati ang napaka-abalang pangulo ng  bansa na si P-Noy ay nagagawa pang alamin ang kanyang kalagayan sa pamamagitan ng text. Ito lamang ay sapat na para maibsan ang bigat ng kanyang problema. Malaking suporta rin ito para ma-realize niya na she may have lost her man, but she found a lot of friends.

Kylie problemado sa pagiging kaskasero ni Aljur

Hindi ang problema niya sa Unforgettable ang nagbibigay ng alalahanin kay Kylie Padilla kundi ang pagiging kaskasero ng kanyang nobyong si Aljur Abrenica. Wala pang isang buwan ang bago nitong kotse ay naibangga na nito at nawasak na! Mabuti na lamang at ang kotse lamang ang nasira at hindi siya nadamay. Pero may dapat siyang gawin para hindi agad mabuwis ang buhay ni Aljur dahilan lamang sa mabilis nitong pagmamaneho.

Dami lang ng manliligaw ang problema ng character ni Kylie na Anna sa Unforgettable. ‘Di lang mga buhay ang nag-aagawan para siya matulungan, pati kaluluwa ng mga patay na sina Mark Herras at Polo Ravales ay namomorblema rin sa kanya.

Panoorin ang Unforgettable after Eat Bulaga.