Paghimugso sa Male Anatomy

CEBU, Philippines - Ang Moonwalk Cebu Event and Model Management Promotions naila sa social-networking sites isip “small group that ventures big.”

Wala kini magpanagana paghimugso sa dagkong mga kalingawan sama sa Robinsons Fuente Campus Idol, Ms. Sta. Babe, Cebu Runway’s Best, ug uban pa. Aduna usab kini dakong partisipasyon sa mga inilang kompetisyon nga  naglakip sa Mr. and Ms. Olive-C Campus Model ug Best Bodies of Summer. Dangpanan usab ang grupo sa mga batan-ong buot magiyahan sa ilang mga pangandoy nga mamahimong modelo sa umaabot.

Sa dili madugay, lain na usab nga dakong laraw ang buot ipabuhagay sa grupo nga giapilan nila ni Jake Rhodel Silva ug ning tagsulat, inubanan sa pagsuporta nilang Rodskie Quizon, Rhyss Gabato, ug Glenn Aparis. Kini mao ang Male Anatomy, The Battle Flight of Cebu’s Sexiest Men Alive. Usa kini ka all-male beauty and brain competition. “Male Anatomy and all-male mean that the contestants should all be 100% masculine. No doubt that he is real male in heart, mind, and actions,” padayag ni Silva.

Plano sa grupo nga makig-tie up sa dagkong male pageant organizations sa kaulohan aron mamahimo kining mas hugyaw. Magsugod ang pagpangita sa mga contestants sa sunod buwan. Ang finals night himuon sa Septembre, buot ipasabot nga daghan ang mga prepageant activities nga buhaton sama sa photo shoot, press presentation, mall tour, sports challenge, modeling ug personality development workshop, teambuilding, ug charity work. “Gikan sa siguro mga 50 ka finalists, hashasan sila aron mahimo na lang 15 atol sa coronation night,” dugang-pasabot ni Quizon.

Lima ka mga titulo ang nagpaabot sa palarang mga modernong Adan. Kini naglakip sa Male Anatomy Universe, Male Anatomy World, Male Anatomy International, Male Anatomy Earth, ug Male Anatomy Supranational. “Male Anatomy Universe mao ang pinaka-winner nila and the rest would be runners-up,” hirit usab ni Aparis. “Excited na gyud ang mga kababayen-an ug kabayotang Sugbuanon tungod kay unang higayon nilang masaksihan ang kompetisyon nga tinud-anay nga mga lalaki gyud ang sentro,” panapos-sugyot ni Gabato.

Nagdapit ang Moonwalk Cebu sa mga industriya dinhi sa Sugbo sa pag-apil isip mga sponsor. Sa tanang mga Sugbuanong lalaki nga buot moapil sa contest, mahimo kamong mokontak sa grupo sa 09103052328 / 09225013240 / 09322014276.