Gihimakak sa usa ka staff, make-up artists ug candidates nagutman

CEBU, Philippines - Gibato og isyu ang bag-ohay lang nga natapos nga Miss Mandaue 2013, nga gipahigayon sa Heritage Plaza diha sa dakbayan. Buntag pa lamang niadtong Miyerkules, nag-uwan na ang yangungo sa mga pipila ka sakop sa Make-Up Artist Club-Cebu (MUAC-Cebu) sa social networking site nga Facebook gumikan sa para nila dili maayong pagtagad sa tagdumala sa maong indigay adtong Martes, ang adlaw sa pageant.

Mireklamo sila gumikan kay ala una sa hapon matud pa sila gipaadto sa venue, apan wala sila pakan-a o nagutman sila, hinungdan nga ang uban nila nagpungko-pungko na lang nga miresulta sa pagsakit sa tiyan.

Sa FB page sa maong kahugpungan mi-post si Malayka Yamas niini:”Mao diay nga wala gyud ta pakaona nila kay nay nakadungog didto sa taas taga committee sa Miss Mandaue niingon “ngano daw pakaonon ang mga make-up artist nga dako mana sila kaayo og bayad si sir (ngalan gipugngan sa Banat News Hugyaw kay wala makontak ang natungdan) ang nagsulti…Wala mi mahangol anang inyong show nga ka cheapan, mas bongga pa ang show sa miss paknaan ug miss opao.”

Si Rhino J. Deiparine miingon: After sa nahitabo sa Miss Mandaue, I think kinahanglan na jud nga magmeeting ang officers and member sa MUAC-C kanang TARONG ug KLARO.”

Si Ramil Solis mipahungaw pud pinaagi sa usa ka FB thread nga, “grabe kaayo ang committee, wala jud mi atimana as in, mga candidate pasmo tawn, nakuyawan tawn.”

Laing make-up artist nga si Roy Tizon ang mipaambit, “sus ala1 pa ta didto nya wa gyuy pakabana maski tubig…looy lang tas kandidata kuyapan sa kagutom!!!!!!”

Dugang pa niya, “maski dili na lang sa make-up artists kay naa man si Jonas Borces mupakaon nato, mga kandidata intawn nangapasmo paet, kit kit na lang ug kuku tulon og laway…”

Si Wen Wen Zaspa nga na-chat sa BNH adtong Miyerkules sa hapon miingon nga, “nagpungko-pungko mi, ang ending nagsakit akong tiyan, 10 times nako nagbalik sa cr.”

Giangkon ni Zaspa nga aduna silay   talent fee para sa ilang serbisyo, apan alang niya responsibilidad gihapon sa organizer nga pakan-on sila kay, “ala una pa baya mi gipaadto kagahapon.”

Usa ka tinubdan ang mitug-an sa BNH nga may pagkaon nga miabot alas nuwebe na sa gabii, apan uwahi na sanglit ang mga make-up artists ug designers humana nangaon sa pungko-pungko. Dugang tsika nga nakuha sa BNH mao nga may naluoy sa mga kandidata sa backstage hinungdan nga nanghatag kini og  “candies” aron pagpugong sa kagutom.

Apan ang usa sa staff sa maong indigay nga si Walter Alebio nga nahinabi sa BNH pinaagi sa telepono kagahapon sa hapon mihimakak sa taho kabahin sa kandidata nga nakuyapan gumikan sa kagutom. Nagkanayon si Alebio nga iyang nahinabi ang handler sa kandidata nga nakuyapan ug nisugilon kini nga wala kini gana nga mokaon niadtong higayona gumikan sa pressure.

Samtang ang tigpamaba sa dakbayan nga si Roger Paller miingon nga nahinabi niya ang pageant coordinator nga si Clarence Sanchez atol sa pageant night ug nisugilon kini kaniya nga pinakaon gyud ang mga kandidata.

Gitawagan sa BNH si Sanchez pinaagi sa telepono apan dili kini makontak. Ang numero niini nga nahuptan sa BNH naggikan kang Paller.

Kahinumduman nga dili kini ang unang higayon nga mireklamo ang mga make-up artists nga sila nagutman. Sa Miss Cebu pipila na ka tuig ang milabay mitumaw pud kining maong isyu. Ni Zaspa  pa: Nahitabo bitaw ni sa Ms Cebu the same issue ug ni paghot dayon ko sa fb, ug pagka ugma nanawag sila Philip R, Marco Protacio and etch to say sorry ug buffet among noak  (kaon) the following Ms Cebu.. aw nag padala pato og formal letter si Marco Protacio to say sorry with matching token nga chocolate cake from waterfront (siya man to ang chairman sa Ms. Cebu during that time).

Usa ka pageant mentor pud ang misugilon sa BNH nga usa sa mga hurado ang nahibulong nganong wala na ibalik ang final result ngadto nila alang sa ilang pirma, sa wala pa kini hingpit nga gipahibawo. Sa nasayran nga sa dinagkong mga pageant sama sa Bb. Pilipinas, pakit-on gyud ang mga hurado sa final result, diin kun dili sila makauyon niini mahitabo gyud ang “deliberation” hangtud nga magkauyon na ang tanan, kauban ang organizing committee.

(Bukas ang BNH alang sa dugang habig sa mga tagdumala sa maong indigay.)

Justin nag-atubang na pud og isyu

Nag-atubang na usab karon og bag-ong isyu ang singer nga si Justin Bieber human matud pa nga posibleng kuwestiyonon  siya sa mga otoridad sa Dubai gumikan sa over speeding.

Matud pa nga nipabulhot og maayo ang singer samtang nagmaneho kini sa iyang sakyanan gikan sa  hotel paingon sa Sevens Stadium kung diin gipahigayon ang iyang two-night concert.

Suma pa sa usa ka testigo nga wala nagpaila, nga hapit maaksidente ang singer gumikan sa kakusog sa dagan niini.Sa pag-agi ni Justin sa  Sheikh Zayed Road, nisiga ang  speed cameras.