Pagbalik sa Bisayang Dako

CEBU, Philippines - Taud-taud na nga nanimuyo didto sa Amerika, apan dili gyud mapugngan sa Crystal Voice of Asia nga si Sheryn Regis ang pagkanta busa iyang gipahimuslan ang pagbakasyon niya  dinhi sa Pilipinas.

Sa  pag-guest niya sa programang Okryan sa dyRC Radyo Calungsod niining bag-o lang, iyang gitataw nga gimingaw na siya pag-ayo sa Cebu. Tsika pa ni Sheryn nga nipuyo siya didto sa Amerika kauban ang iyang bana nga si Earl Echiverri ug anak nga si Sweety sa Sugar Land, Texas, USA gumikan kay gusto niya nga mag-grade one ang iyang anak sa maong dapit.

“Ganahan ko nga mag-grade one akong anak didto. Salamat sad kaayo kay naa man pud akong ubang relatives didto,” suma pa ni Sheryn. Mipauli si Sheryn sa Sugbo adtong Enero aron musalmot sa Sinulog sanglit deboto man siya ni Senor Santo Nino. Wala niya damha nga magpusot-pusot ang iyang guestings, busa nahukman niya nga magpabilin usa sa Pilipinas sulod sa lima ka buwan.

“Mingaw gyud kaayo didto,  kay ang among lugar man gud , gamay ra ang Pinoy, kay ang uban busy man pud sa work, “ nagkanayon ang Cebuana singer. Sa wala pa molarga  si Sheryn, nakakuha na gyud siya og sign nga motikang sa laing nasud, gumikan kay nakuha niya ang iyang visa niadtong Enero niadtong 2010 samtang nagsingabot ang Sinulog.

“Nindot gyud siya kaayo nga sign, kay pag-una gud, nagduha-duha gyud ko. Mo-stay ba ko didto og dugay o four months ba, pero nalingaw ra man sad ko didto,” tsika pa ni Sheryn.

Aminado si Sheryn nga dugay pa gyud unta siya molarga apan kalit-kalit lang kini na nasulod sa iyang huna-huna.

“Dili man gud nato malikayan, nga ganahan na pud ka molarga bisan pa man nga buhi pa kaayo ang career naku ato. Niadto ko didto para sa akong family ug sa akong daughter,” ni Sheryn pa.

Nangatol gyud ang iyang baba sa usa ka tuig nga wala nga pagkanta hangtud nga ni-audition siya og usa ka musical  play sa maong dapit.

Nagtoo siya nga dili siya madawat gumikan kay wala siya kabantay nga dunay mga Asian sa maong stage play.

“Ilaha kung gi-google , na-shock sila kay celebrity daw ko dinhi sa Pilipinas, siyempre humble man gyud ko pagkatawo,” matud pa niya.

Singko anyos pa lang siya nagsugod sa pagsalmot og mga singing contest ug nagsugod siya sa dyRC sa panahon ni Art Maloy.

Mahiligon siya mosalmot og mga beauty pageant niadto sa mga barangay, apan kutob lang siya sa runner-up ug ma-best in talent.

Aminado si Sheryn nga duna gyud siya’y mga kritiko apan wala siya magpaapekto niini. “Dili man nako sila mapugos nga maganahan nako,  seguro makatabang pud na nako aron mabantayan nako nga duna ba koy sayop nga nabuhat,” say pa niya. Bisan abroad pa ang iyang amahan niadto apan naningkamot gihapon siya aron makagasto sa iyang kaugalingon.

“Wala mana nagpasabot nga kung abroad imong papa kay daghan na gyud ka og kuwarta, “ matud pa ni Sheryn.

Gipasigarbo pag-ayo ni Sheryn ang iyang pagka Cebuana gumikan kay usa kini kalidad nga iyang ipanghambog ngadto sa ubang tawo.

“Proud jud kay ko, kay anywhere I go,  moingon gyud ko nga being a Cebuana is my only identity.

Si Sheryn ubos na karon sa Medianation Ink nga gidumala sa iyang kanhi manager sa Star Records nga si Annabelle Regalado ug ni Marvin Agustin. Gumikan niini, freelancer si Sheryn o mahimo siyang mugawas sa bisan unsa nga TV network depende sa proyekto.

Kasamtangan siya nga nag-promote sa iyang digital single ‘Sinungaling Mong Puso” nga kasamtangang nalakip sa Top 3 Most Downloaded Songs sa My Music Store. (Sanden J. Anadia)