Yves Flores: Sakto Lang

CEBU, Philippines - Sa kadaghang mga bag-ong artista nga nanimpalad karon sa showbiz, ang produkto sa Pinoy Big Brother Teen Edition nga si Yves Flores ra siguro ang nag-inusarang bituon nga wala mangandoy nga musikat og maayo.

Sakto lang. Ayaw ko ng masyadong sikat kasi ang hirap nun. Slowly but surely lang,” nagkanayon ang ambongang batan-on nga taga Tarlac dihang nahinabi sa pipila ka mga sakop sa E-Group sa iyang pagbisita sa Sugbo kauban si Karen Reyes isip celebrity guests sa A Million Thanks Raffle Promo sa Gaisano Inc., nga didto gipahigayon sa Balamban Town Center nianang pagka hapon ug gisundan sa gihugupan pag-ayo nila nga show sa Gaisano Country Mall pagka gabii.

Kining 18-anyos nga Business Management student sa Tarlac College of Holy Spirit, nakaplagan sa iyang kanhi manager nga si Melvin Magallanes pinaagi sa Facebook, duha ka tuig na ang milabay. Si Magallanes matud pa, higala sa kaubang maestra sa iyang inahan busa nagkauyon sila nga ang nahisgutan  maoy mudumala niya. Giganoy siya niini paingon sa kalibutan sa beauty pageants. Sulod sa duha ka tuig lima ka beauty pageants tanan ang iyang nasalmutan, diin puros siya mitapos isip first runner-up. Sa gitas-on niya nga 5’11 pagkakaron, aminado si Yves nga niadtong mga panahon nga misalmot siya og beauty pageants, bata pa kaayo siya ug nalamoy siya sa mga beterano na niyang mga kaatbang. Dugang pa niini, daot matud pa siya adtong panahona.

Human niini, gibitbit siya ni Magallanes sa nataran sa GMA-7 diin naka guest siya sa Walang Tulugan ni Kuya Germs. Dayon nagmugna matud pa si Magallanes og boy band, diin didto niya nahimamat si Ryan Boyles isip co-member ug subli niyang nakauban sa PBB. Human sa usa ka tuig niya nga kontrata kang Magallanes, mipahawa na siya sa poder niini ug nanimpad sa PBB, diin nalakip siya sa 14 ka housemates. Didto na nagsugod ang tanan para niya, diin bisan man tuod og wala siya malakip sa gilusad nga Star Magic 2013, gihatagan gihapon matud pa siya og kontrata sa nahisgutang talent arm sa  ABS-CBN. Paggawas niya sa PBB house, diretso dayon siya nga gisalang sa “Kahit Puso’y Masugatan,” nila ni Iza Calzado, Gabby Concepcion, Andi Eigenmann ug Jake Cuenca. Aminado siya nga dili maayo iyang performance sa nahisgutang soap opera. “ Wala pa ako dun eh, bagong labas sa PBB.” Apan sa maong teleserye niya nahimamat ang second unit director nga si Ricky Rivero nga mao matud pa ang mibansay nilang mga naggikan sa reality show ug nalakip sa maong soap. Si Rivero matud pa ang pasensyoso nga nagtudlo nila unsaon pag-arte ug paghatag og kinabuhi ang ilang mga characters.

Mga magtutudlo ang mga ginikanan ni Yves. Sa iyang pagsulod sa showbiz, gipasidan-an matud pa siya nila nga maglikay sa bisyo, dili mudako ang ulo “at ayusin mo ang trabaho mo. Kasi kung di mo mamahalin, di ka rin mamahalin.”

Bukas na siya sa pre-marital sex. “Parang natural na lang eh,” niya pa. Apan kun siya maoy mangulitawo, kinaraan pa gihapon ang iyang istilo. Siya matud pa ang matang sa lalaki nga mamisita gyud sa panimalay sa babaye ug ilailahon ang pamilya niini. Wala siya’y uyab pagkakaron sanglit showbiz matud pa maoy iyang focus kay ganahan na siya niining trabahoa. Pero gisigihan siya og sungog ni Karen nga ang big winner matud pa nila nga si Myrtle Sarrosa maoy iring-iring niini. “Makinig sa payo ng mga nakakatanda, magtiyaga, magsipag, magkaroon ng disipilina sa sarili at gawin ang tama, ang dugang matud pa nga pahimangno sa iyang mga ginikanan niya karon nga nag-artista na kining  kamaguwangan sa tulo ka mga managsuon.

Suma pa ni Yves nga gipahibaw na matud pa siya sa management unsay iyang follow-up project. Usa kini ka light drama teleserye ug karong buwana gitakda nga ipahigayon ang ilang “bonding workshop.”