Cebu Ms. Philippines Earth bets, Kinsa nila ang mosunod ni Karla Henry?
CEBU, Philippines - Bag-o pa lang nahuman ang labing gipaabot nga Bb. Pilipinas. Walay usa sa tulo ka pambato sa Sugbo ang naapil sa Top 15. Apan dili kini nato angay’ng ikasagmuyo, tungod kay dili gihapon kita mabintahaan kun sangka sa kaanyag ug kautokan ang hisgotan. Pakyas man tuod ang atong Binibini bets apan sayod kita nga mihatag sila’g maayong labok atol sa pageant night nga siguradong nakapakulba sa ilang competitors.
Daklit ra kadto nga kasub-anan kay nagmadaugon man si Sinulog Festival Queen Jamie Herrel sa iyang kampanya ug maoy nahimong Reyna ng Aliwan 2013 niadtong miagong semana. Gipildi ni Herrel ang 16 ka mga kandidata nga nagrepresentar sa nagkadaiyang festivals sa Pilipinas, ug siya ang mihatag sa ikalima ka sunod-sunod nga daug sa maong nasudnong bangga. Sayo ning tuiga, tulo na ka Sugbuanon ang nagmadaugon. Sila si Nathaniel Tiu (first runner-up), Cassandra Yu (second runner-up), ug Yves Campos (second runner-up) nakakulit og pangalan sa nasudnong indigay nga Mr. and Ms. Olive-C Campus Model Philippines.
Ug karon, upat na usab nato ka mga igsuon ang nagkinahanglan sa atong suporta aron magmalampuson sila sa ilang tinguha nga mamahimong Ms. Philippines Earth 2013. Sila si Mira-Mae Dimmerling sa Bogo City, Jessa Marie Cariaga sa Boljoon (suportado sa Olive-C), Teffanie Llamada sa Cebu City, ug Lucena Rose Magdadaro sa Sogod. Kinsa kaha nilang upat ang mosunod ni Karla Paula Henry? Si Karla maoy nakalangkat sa korona niadtong 2008, ug siya usab ang midaug nga Ms. Earth 2008. Kun idlas ang korona, maayo na kaayo ang makasunod sa mga Sugbuanong tunob nilang Ms. Philippines-Air 2001 Maria del Carmen Antigua, Ms. Philippines-Water 2009 Kirstie Joan Babor, ug Ms. Philippines-Water 2011 Muriel Adrienne Orais.
Sa preliminaries, mitala na og maayong standing ang atong mga pambato. Si Lucena Rose nakakuha na og gold sa makeup challenge ug bronze sa swimsuit competition. Si Teffanie usab nakaangkon og bronze alang sa most enthusiastic learner challenge ug gold sa environmental knowledge challenge. Sa overall tally, nag-tie sa unang pwesto sila si Lucena ug Teffanie. Samtang si Jessa Marie nakaangkon usab sa mga corporate awards nga Ms. Hannah’s Zipline Princess ug Ms. Enchanted Kingdom.
Timailhan kining tanan nga dako og tsansa ang mga Cebuana nga makaangkon sa kadaugan. Maghiusa ta sa pagpaluyo sa atong mga pambato. Gitakda ang ilang coronation night karong Abril 19 (ugma) didto sa SM Mall of Asia Convention Center.
Heart misalmot sa Gwiyomi fever
Lakip si Heart Evangelista sa mga artista nga nisakay sa kasikat sa "Gwiyomi". Nakita ang aktres sa latest YouTube video sa comedy duo nga Moymoy Palaboy. Makita usab sa maong video ang Basketball player nga si Chris Tiu. (BANAT NEWS)
- Latest
